330. සීලවීමංසජාතකං (4-3-10)

117. සීලං කිරෙව කල්‍යාණං, සීලං ලොකෙ අනුත්තරං;

පස්ස ඝොරවිසො නාගො, සීලවාති න හඤ්ඤති.

118. යාවදෙවස්සහූ කිඤ්චි, තාවදෙව අඛාදිසුං;

සඞ්ගම්ම කුලලා ලොකෙ, න හිංසන්ති අකිඤ්චනං.

119. සුඛං නිරාසා සුපති, ආසා ඵලවතී සුඛා;

ආසං නිරාසං කත්වාන, සුඛං සුපති පිඞ්ගලා.

120. න සමාධිපරො අත්ථි, අස්මිං ලොකෙ පරම්හි ච;

න පරං නාපි අත්තානං, විහිංසති සමාහිතොති.

සීලවීමංසජාතකං දසමං.

කුටිදූසකවග්ගො තතියො.

තස්සුද්දානං –

සමනුස්ස -සදුද්දුභ-යාචනකො, අථ මෙණ්ඩවරුත්තම-ගොධවරො;

අථ කායසකෙපුක භොතීවරො, අථ රාධසුසීලවරෙන දසාති.