3. කුටිදූසකවග්ගො

321. කුටිදූසකජාතකං (4-3-1)

81. මනුස්සස්සෙව තෙ සීසං, හත්ථපාදා ච වානර;

අථ කෙන නු වණ්ණෙන, අගාරං තෙ න විජ්ජති.

82. මනුස්සස්සෙව මෙ සීසං, හත්ථපාදා ච සිඞ්ගිල [සිඞ්ගාල (ක.), පිඞ්ගල (ටීකා)];

යාහු සෙට්ඨා මනුස්සෙසු, සා මෙ පඤ්ඤා න විජ්ජති.

83. අනවට්ඨිතචිත්තස්ස, ලහුචිත්තස්ස දුබ්භිනො [දූභිනො (පී.)];

නිච්චං අද්ධුවසීලස්ස, සුඛභාවො [සුචිභාවො (සී.), සුඛභාගො (?)] න විජ්ජති.

84. සො කරස්සු ආනුභාවං, වීතිවත්තස්සු සීලියං;

සීතවාතපරිත්තාණං, කරස්සු කුටවං [කුටිකං (සී. ස්‍යා.)] කපීති.

කුටිදූසක [සිඞ්ගාලසකුණ (ක.)] ජාතකං පඨමං.

322. දුද්දුභජාතකං (4-3-2)

85. දුද්දුභායති [දද්දභායති (සී. පී.)] භද්දන්තෙ, යස්මිං දෙසෙ වසාමහං;

අහම්පෙතං න ජානාමි, කිමෙතං දුද්දුභායති.

86. බෙලුවං පතිතං සුත්වා, දුද්දුභන්ති [දද්දභන්ති (සී.)] සසො ජවි;

සසස්ස වචනං සුත්වා, සන්තත්තා මිගවාහිනී.

87. අප්පත්වා පදවිඤ්ඤාණං, පරඝොසානුසාරිනො;

පනාදපරමා බාලා, තෙ හොන්ති පරපත්තියා.

88. යෙ ච සීලෙන සම්පන්නා, පඤ්ඤායූපසමෙ රතා;

ආරකා විරතා ධීරා, න හොන්ති පරපත්තියාති.

දුද්දුභජාතකං [දද්දභජාතකං (සී. පී.)] දුතියං.

323. බ්‍රහ්මදත්තජාතකං (4-3-3)

89. ද්වයං යාචනකො රාජ, බ්‍රහ්මදත්ත නිගච්ඡති;

අලාභං ධනලාභං වා, එවං ධම්මා හි යාචනා.

90. යාචනං රොදනං ආහු, පඤ්චාලානං රථෙසභ;

යො යාචනං පච්චක්ඛාති, තමාහු පටිරොදනං.

91. මා මද්දසංසු රොදන්තං, පඤ්චාලා සුසමාගතා;

තුවං වා පටිරොදන්තං, තස්මා ඉච්ඡාමහං රහො.

92. දදාමි තෙ බ්‍රාහ්මණ රොහිණීනං, ගවං සහස්සං සහ පුඞ්ගවෙන;

අරියො හි අරියස්ස කථං න දජ්ජා [දජ්ජෙ (සී.), දජ්ජං (?)], සුත්වාන ගාථා තව ධම්මයුත්තාති.

බ්‍රහ්මදත්තජාතකං තතියං.

324. චම්මසාටකජාතකං (4-3-4)

93. කල්‍යාණරූපො වතයං චතුප්පදො, සුභද්දකො චෙව සුපෙසලො ච;

යො බ්‍රාහ්මණං ජාතිමන්තූපපන්නං, අපචායති මෙණ්ඩවරො යසස්සී.

94. මා බ්‍රාහ්මණ ඉත්තරදස්සනෙන, විස්සාසමාපජ්ජි චතුප්පදස්ස;

දළ්හප්පහාරං අභිකඞ්ඛමානො [අභිකත්තුකාමො (ස්‍යා.)], අවසක්කතී දස්සති සුප්පහාරං.

95. ඌරුට්ඨි [ඌරට්ඨි (සී.)] භග්ගං පවට්ටිතො [පතිතො (සී. ස්‍යා.)] ඛාරිභාරො, සබ්බඤ්ච භණ්ඩං බ්‍රාහ්මණස්ස [බ්‍රාහ්මණස්සීධ (ක. සී. පී.), බ්‍රාහ්මණස්සෙව (ක. සී. ස්‍යා. ක.)] භින්නං;

උභොපි බාහා පග්ගය්හ [පග්ගය්‍යෙව (ස්‍යා.), පග්ගහීය (?)] කන්දති [බාහා පග්ගය්‍ය කන්දති (පී. ක.)], අභිධාවථ හඤ්ඤතෙ බ්‍රහ්මචාරී.

96. එවං සො නිහතො සෙති, යො අපූජං පසංසති [නමස්සති (පී.)];

යථාහමජ්ජ පහතො, හතො මෙණ්ඩෙන දුම්මතීති.

චම්මසාටකජාතකං චතුත්ථං.

325. ගොධරාජජාතකං (4-3-5)

97. සමණං තං මඤ්ඤමානො, උපගච්ඡිමසඤ්ඤතං;

සො මං දණ්ඩෙන පාහාසි, යථා අස්සමණො තථා.

98. කිං තෙ ජටාහි දුම්මෙධ, කිං තෙ අජිනසාටියා;

අබ්භන්තරං තෙ ගහනං, බාහිරං පරිමජ්ජසි.

99. එහි ගොධ නිවත්තස්සු, භුඤ්ජ සාලීනමොදනං;

තෙලං ලොණඤ්ච මෙ අත්ථි, පහූතං මය්හ පිප්ඵලි.

100. එස භිය්‍යො පවෙක්ඛාමි, වම්මිකං සතපොරිසං;

තෙලං ලොණඤ්ච කිත්තෙසි [කින්තෙසි (ස්‍යා. පී.)], අහිතං මය්හ පිප්ඵලීති.

ගොධරාජජාතකං පඤ්චමං.

326. කක්කාරුජාතකං (4-3-6)

101. කායෙන යො නාවහරෙ, වාචාය න මුසා භණෙ;

යසො ලද්ධා න මජ්ජෙය්‍ය, ස වෙ කක්කාරුමරහති.

102. ධම්මෙන විත්තමෙසෙය්‍ය, න නිකත්‍යා ධනං හරෙ;

භොගෙ ලද්ධා න මජ්ජෙය්‍ය, ස වෙ කක්කාරුමරහති.

103. යස්ස චිත්තං අහාලිද්දං, සද්ධා ච අවිරාගිනී;

එකො සාදුං න භුඤ්ජෙය්‍ය, ස වෙ කක්කාරුමරහති.

104. සම්මුඛා වා තිරොක්ඛා වා [පරොක්ඛා වා (පී.), පරම්මුඛා (ක.)], යො සන්තෙ න පරිභාසති;

යථාවාදී තථාකාරී, ස වෙ කක්කාරුමරහතීති.

කක්කාරුජාතකං ඡට්ඨං.

327. කාකවතීජාතකං (4-3-7)

105. වාති චායං [වායං (ක.)] තතො ගන්ධො, යත්ථ මෙ වසතී පියා;

දූරෙ ඉතො හි කාකවතී [කාකාතී (සී.), කාකාති (ස්‍යා. පී.)], යත්ථ මෙ නිරතො මනො.

106. කථං සමුද්දමතරී, කථං අතරි කෙපුකං [කෙබුකං (සී. පී.)];

කථං සත්ත සමුද්දානි, කථං සිම්බලිමාරුහි.

107. තයා සමුද්දමතරිං, තයා අතරි කෙපුකං [කෙබුකං (සී. පී.)];

තයා සත්ත සමුද්දානි, තයා සිම්බලිමාරුහිං.

108. ධිරත්ථුමං මහාකායං, ධිරත්ථුමං අචෙතනං;

යත්ථ ජායායහං ජාරං, ආවහාමි වහාමි චාති.

කාකවතීජාතකං සත්තමං.

328. අනනුසොචියජාතකං (4-3-8)

109. බහූනං විජ්ජතී භොතී, තෙහි මෙ කිං භවිස්සති;

තස්මා එතං න සොචාමි, පියං සම්මිල්ලහාසිනිං.

110. තං තං චෙ අනුසොචෙය්‍ය, යං යං තස්ස න විජ්ජති;

අත්තානමනුසොචෙය්‍ය, සදා මච්චුවසං පතං.

111. න හෙව ඨිතං නාසීනං, න සයානං න පද්ධගුං [පත්ථගුං (ස්‍යා.)];

යාව බ්‍යාති නිමිසති, තත්‍රාපි රසතී [සරතී (සී. ස්‍යා. පී.)] වයො.

112. තත්ථත්තනි වතප්පද්ධෙ [වත පන්ථෙ (ස්‍යා.), වත බන්ධෙ (ක.) වත + ප-අද්ධෙ = වතප්පද්ධෙ], විනාභාවෙ අසංසයෙ;

භූතං සෙසං දයිතබ්බං, වීතං අනනුසොචියන්ති [චවිතං නානුසොචියන්ති (ස්‍යා.), මතන්තං නානුසොචියං (ක.)].

අනනුසොචියජාතකං අට්ඨමං.

329. කාළබාහුජාතකං (4-3-9)

113. යං අන්නපානස්ස පුරෙ ලභාම, තං දානි සාඛමිගමෙව ගච්ඡති;

ගච්ඡාම දානි වනමෙව රාධ, අසක්කතා චස්ම ධනඤ්ජයාය [ධනඤ්චයාය (ක.)].

114. ලාභො අලාභො යසො අයසො ච, නින්දා පසංසා ච සුඛඤ්ච දුක්ඛං;

එතෙ අනිච්චා මනුජෙසු ධම්මා, මා සොචි කිං සොචසි පොට්ඨපාද.

115. අද්ධා තුවං පණ්ඩිතකොසි රාධ, ජානාසි අත්ථානි අනාගතානි;

කථං නු සාඛාමිගං දක්ඛිසාම [දක්ඛියාම (ක.), දක්ඛාම (ස්‍යා.)], නිද්ධාවිතං [නිද්ධාපිතං (සී. ස්‍යා.), නිබ්බාපිතං (පී.), නිච්ඡදං (ක.)] රාජකුලතොව ජම්මං.

116. චාලෙති කණ්ණං භකුටිං කරොති, මුහුං මුහුං භායයතෙ [භායතෙ (ස්‍යා.), භායාපතෙ (ක.)] කුමාරෙ;

සයමෙව තං කාහති කාළබාහු, යෙනාරකා ඨස්සති අන්නපානාති.

කාළබාහුජාතකං නවමං.

330. සීලවීමංසජාතකං (4-3-10)

117. සීලං කිරෙව කල්‍යාණං, සීලං ලොකෙ අනුත්තරං;

පස්ස ඝොරවිසො නාගො, සීලවාති න හඤ්ඤති.

118. යාවදෙවස්සහූ කිඤ්චි, තාවදෙව අඛාදිසුං;

සඞ්ගම්ම කුලලා ලොකෙ, න හිංසන්ති අකිඤ්චනං.

119. සුඛං නිරාසා සුපති, ආසා ඵලවතී සුඛා;

ආසං නිරාසං කත්වාන, සුඛං සුපති පිඞ්ගලා.

120. න සමාධිපරො අත්ථි, අස්මිං ලොකෙ පරම්හි ච;

න පරං නාපි අත්තානං, විහිංසති සමාහිතොති.

සීලවීමංසජාතකං දසමං.

කුටිදූසකවග්ගො තතියො.

තස්සුද්දානං –

සමනුස්ස -සදුද්දුභ-යාචනකො, අථ මෙණ්ඩවරුත්තම-ගොධවරො;

අථ කායසකෙපුක භොතීවරො, අථ රාධසුසීලවරෙන දසාති.