329. කාළබාහුජාතකං (4-3-9)

113. යං අන්නපානස්ස පුරෙ ලභාම, තං දානි සාඛමිගමෙව ගච්ඡති;

ගච්ඡාම දානි වනමෙව රාධ, අසක්කතා චස්ම ධනඤ්ජයාය [ධනඤ්චයාය (ක.)].

114. ලාභො අලාභො යසො අයසො ච, නින්දා පසංසා ච සුඛඤ්ච දුක්ඛං;

එතෙ අනිච්චා මනුජෙසු ධම්මා, මා සොචි කිං සොචසි පොට්ඨපාද.

115. අද්ධා තුවං පණ්ඩිතකොසි රාධ, ජානාසි අත්ථානි අනාගතානි;

කථං නු සාඛාමිගං දක්ඛිසාම [දක්ඛියාම (ක.), දක්ඛාම (ස්‍යා.)], නිද්ධාවිතං [නිද්ධාපිතං (සී. ස්‍යා.), නිබ්බාපිතං (පී.), නිච්ඡදං (ක.)] රාජකුලතොව ජම්මං.

116. චාලෙති කණ්ණං භකුටිං කරොති, මුහුං මුහුං භායයතෙ [භායතෙ (ස්‍යා.), භායාපතෙ (ක.)] කුමාරෙ;

සයමෙව තං කාහති කාළබාහු, යෙනාරකා ඨස්සති අන්නපානාති.

කාළබාහුජාතකං නවමං.