328. අනනුසොචියජාතකං (4-3-8)
109. බහූනං විජ්ජතී භොතී, තෙහි මෙ කිං භවිස්සති;
තස්මා එතං න සොචාමි, පියං සම්මිල්ලහාසිනිං.
110. තං තං චෙ අනුසොචෙය්‍ය, යං යං තස්ස න විජ්ජති;
අත්තානමනුසොචෙය්‍ය, සදා මච්චුවසං පතං.
111. න හෙව ඨිතං නාසීනං, න සයානං න පද්ධගුං [පත්ථගුං (ස්‍යා.)];
යාව බ්‍යාති නිමිසති, තත්‍රාපි රසතී [සරතී (සී. ස්‍යා. පී.)] වයො.
112. තත්ථත්තනි වතප්පද්ධෙ [වත පන්ථෙ (ස්‍යා.), වත බන්ධෙ (ක.) වත + ප-අද්ධෙ = වතප්පද්ධෙ], විනාභාවෙ අසංසයෙ;
භූතං සෙසං දයිතබ්බං, වීතං අනනුසොචියන්ති [චවිතං නානුසොචියන්ති (ස්‍යා.), මතන්තං නානුසොචියං (ක.)].
අනනුසොචියජාතකං අට්ඨමං.