327. කාකවතීජාතකං (4-3-7)

105. වාති චායං [වායං (ක.)] තතො ගන්ධො, යත්ථ මෙ වසතී පියා;

දූරෙ ඉතො හි කාකවතී [කාකාතී (සී.), කාකාති (ස්‍යා. පී.)], යත්ථ මෙ නිරතො මනො.

106. කථං සමුද්දමතරී, කථං අතරි කෙපුකං [කෙබුකං (සී. පී.)];

කථං සත්ත සමුද්දානි, කථං සිම්බලිමාරුහි.

107. තයා සමුද්දමතරිං, තයා අතරි කෙපුකං [කෙබුකං (සී. පී.)];

තයා සත්ත සමුද්දානි, තයා සිම්බලිමාරුහිං.

108. ධිරත්ථුමං මහාකායං, ධිරත්ථුමං අචෙතනං;

යත්ථ ජායායහං ජාරං, ආවහාමි වහාමි චාති.

කාකවතීජාතකං සත්තමං.