299. කොමාරපුත්තජාතකං (3-5-9)

145. පුරෙ තුවං සීලවතං සකාසෙ, ඔක්කන්තිකං [ඔක්කන්දිකං (සී. ස්‍යා. පී.)] කීළසි අස්සමම්හි;

කරොහරෙ [කරොහි රෙ (ක.)] මක්කටියානි මක්කට, න තං මයං සීලවතං රමාම.

146. සුතා හි මය්හං පරමා විසුද්ධි, කොමාරපුත්තස්ස බහුස්සුතස්ස;

මා දානි මං මඤ්ඤි තුවං යථා පුරෙ, ඣානානුයුත්තො විහරාමි [ඣානානුයුත්තා විහරාම (සී. පී.)] ආවුසො.

147. සචෙපි සෙලස්මි වපෙය්‍ය බීජං, දෙවො ච වස්සෙ න හි තං විරූළ්හෙ [නෙව හි තං රුහෙය්‍ය (සී. පී.), න හි තං විරූහෙ (?)];

සුතා හි තෙ සා පරමා විසුද්ධි, ආරා තුවං මක්කට ඣානභූමියාති.

කොමාරපුත්තජාතකං නවමං.