5. කුම්භවග්ගො

291. සුරාඝටජාතකං (2-5-1)

121. සබ්බකාමදදං කුම්භං, කුටං ලද්ධාන ධුත්තකො;

යාව නං අනුපාලෙති, තාව සො සුඛමෙධති.

122. යදා මත්තො ච දිත්තො ච, පමාදා කුම්භමබ්භිදා;

තදා නග්ගො ච පොත්ථො ච, පච්ඡා බාලො විහඤ්ඤති.

123. එවමෙව යො ධනං ලද්ධා, පමත්තො [අමත්තා (සී.), අමත්තො (පී.)] පරිභුඤ්ජති;

පච්ඡා තප්පති දුම්මෙධො, කුටං භිත්වාව [කුටං භින්නොව (සී. පී.), කුටභින්නොව (?)] ධුත්තකොති.

සුරාඝට [භද්‍රඝට (සී. පී.), භද්‍රඝටභෙදක (ස්‍යා.)] ජාතකං පඨමං.

292. සුපත්තජාතකං (3-5-2)

124. බාරාණස්‍යං [බාරාණස්සං (සී. පී.)] මහාරාජ, කාකරාජා නිවාසකො [නිවාසිකො (සී. පී.)];

අසීතියා සහස්සෙහි, සුපත්තො පරිවාරිතො.

125. තස්ස දොහළිනී භරියා, සුඵස්සා භක්ඛිතුමිච්ඡති [මච්ඡමිච්ඡති (සී. පී.)];

රඤ්ඤො මහානසෙ පක්කං, පච්චග්ඝං රාජභොජනං.

126. තෙසාහං පහිතො දූතො, රඤ්ඤො චම්හි ඉධාගතො;

භත්තු අපචිතිං කුම්මි, නාසායමකරං [මකරිං (සී. නිස්සය)] වණන්ති.

සුපත්තජාතකං දුතියං.

293. කායනිබ්බින්දජාතකං (3-5-3)

127. ඵුට්ඨස්ස මෙ අඤ්ඤතරෙන බ්‍යාධිනා, රොගෙන බාළ්හං දුඛිතස්ස රුප්පතො;

පරිසුස්සති ඛිප්පමිදං කළෙවරං, පුප්ඵං යථා පංසුනි ආතපෙ කතං.

128. අජඤ්ඤං ජඤ්ඤසඞ්ඛාතං, අසුචිං සුචිසම්මතං;

නානාකුණපපරිපූරං, ජඤ්ඤරූපං අපස්සතො.

129. ධිරත්ථුමං ආතුරං පූතිකායං, ජෙගුච්ඡියං අස්සුචිං බ්‍යාධිධම්මං;

යත්ථප්පමත්තා අධිමුච්ඡිතා පජා, හාපෙන්ති මග්ගං සුගතූපපත්තියාති.

කායනිබ්බින්ද [කායවිච්ඡන්ද (සී.), කායවිච්ඡින්ද (පී.)] ජාතකං තතියං.

294. ජම්බුඛාදකජාතකං (3-5-4)

130. කොයං බින්දුස්සරො වග්ගු, සරවන්තාන [පවදන්තාන (සී. පී.)] මුත්තමො;

අච්චුතො ජම්බුසාඛාය, මොරච්ඡාපොව කූජති.

131. කුලපුත්තොව ජානාති [කුලපුත්තො පජානාති (ස්‍යා. ක.)], කුලපුත්තං [කුලපුත්තෙ (සී. පී.)] පසංසිතුං;

බ්‍යග්ඝච්ඡාපසරීවණ්ණ, භුඤ්ජ සම්ම දදාමි තෙ.

132. චිරස්සං වත පස්සාමි, මුසාවාදී සමාගතෙ;

වන්තාදං කුණපාදඤ්ච, අඤ්ඤමඤ්ඤං පසංසකෙති.

ජම්බුඛාදකජාතකං චතුත්ථං.

295. අන්තජාතකං (3-5-5)

133. උසභස්සෙව තෙ ඛන්ධො, සීහස්සෙව විජම්භිතං;

මිගරාජ නමො ත්‍යත්ථු, අපි කිඤ්චි ලභාමසෙ.

134. කුලපුත්තොව ජානාති, කුලපුත්තං පසංසිතුං;

මයූරගීවසඞ්කාස, ඉතො පරියාහි වායස.

135. මිගානං සිඞ්ගාලො [කොත්ථුකො (සී. පී.), කොට්ඨුකො (ස්‍යා.)] අන්තො, පක්ඛීනං පන වායසො;

එරණ්ඩො අන්තො රුක්ඛානං, තයො අන්තා සමාගතාති.

අන්තජාතකං පඤ්චමං.

296. සමුද්දජාතකං (3-5-6)

136. කො නායං [කො න්වායං (ස්‍යා.)] ලොණතොයස්මිං, සමන්තා පරිධාවති;

මච්ඡෙ මකරෙ ච වාරෙති, ඌමීසු ච විහඤ්ඤති.

137. අනන්තපායී සකුණො, අතිත්තොති දිසාසුතො;

සමුද්දං පාතුමිච්ඡාමි, සාගරං සරිතං පතිං.

138. සො අයං හායති චෙව, පූරතෙ ච මහොදධි;

නාස්ස නායති පීතන්තො, අපෙය්‍යො කිර සාගරොති.

සමුද්දජාතකං ඡට්ඨං.

297. කාමවිලාපජාතකං (3-5-7)

139. උච්චෙ සකුණ ඩෙමාන, පත්තයාන විහඞ්ගම;

වජ්ජාසි ඛො ත්වං වාමූරුං, චිරං ඛො සා කරිස්සති [සරිස්සති (ක.)].

140. ඉදං ඛො සා න ජානාති, අසිං සත්තිඤ්ච ඔඩ්ඩිතං;

සා චණ්ඩී කාහති කොධං, තං මෙ තපති නො ඉදං [නො ඉධ (සී. ස්‍යා. පී.)].

141. එස උප්පලසන්නාහො, නික්ඛඤ්චුස්සීසකොහිතං [නික්ඛමුස්සීසකෙ කතං (සී. පී.), නික්ඛඤ්චුස්සීසකෙ කතං (ස්‍යා.)];

කාසිකඤ්ච මුදුං වත්ථං, තප්පෙතු ධනිකා පියාති [ධනකාමියාති (ස්‍යා. පී.), ධනකාමිකාති (සී.)].

කාමවිලාපජාතකං සත්තමං.

298. උදුම්බරජාතකං (3-5-8)

142. උදුම්බරා චිමෙ පක්කා, නිග්‍රොධා ච කපිත්ථනා;

එහි නික්ඛම භුඤ්ජස්සු, කිං ජිඝච්ඡාය මිය්‍යසි.

143. එවං සො සුහිතො හොති, යො වුඩ්ඪමපචායති;

යථාහමජ්ජ සුහිතො, දුමපක්කානි මාසිතො.

144. යං වනෙජො වනෙජස්ස, වඤ්චෙය්‍ය කපිනො කපි;

දහරො කපි [දහරොපි තං න (සී. පී.), දහරොපි න (ස්‍යා.)] සද්ධෙය්‍ය, න හි ජිණ්ණො ජරාකපීති.

උදුම්බරජාතකං අට්ඨමං.

299. කොමාරපුත්තජාතකං (3-5-9)

145. පුරෙ තුවං සීලවතං සකාසෙ, ඔක්කන්තිකං [ඔක්කන්දිකං (සී. ස්‍යා. පී.)] කීළසි අස්සමම්හි;

කරොහරෙ [කරොහි රෙ (ක.)] මක්කටියානි මක්කට, න තං මයං සීලවතං රමාම.

146. සුතා හි මය්හං පරමා විසුද්ධි, කොමාරපුත්තස්ස බහුස්සුතස්ස;

මා දානි මං මඤ්ඤි තුවං යථා පුරෙ, ඣානානුයුත්තො විහරාමි [ඣානානුයුත්තා විහරාම (සී. පී.)] ආවුසො.

147. සචෙපි සෙලස්මි වපෙය්‍ය බීජං, දෙවො ච වස්සෙ න හි තං විරූළ්හෙ [නෙව හි තං රුහෙය්‍ය (සී. පී.), න හි තං විරූහෙ (?)];

සුතා හි තෙ සා පරමා විසුද්ධි, ආරා තුවං මක්කට ඣානභූමියාති.

කොමාරපුත්තජාතකං නවමං.

300. වකජාතකං (3-5-10)

148. පරපාණරොධා [පරපාණඝාතෙ (ස්‍යා.), පරපාණරොචං (ක.)] ජීවන්තො, මංසලොහිතභොජනො;

වකො වතං සමාදාය, උපපජ්ජි උපොසථං.

149. තස්ස සක්කො වතඤ්ඤාය, අජරූපෙනුපාගමි;

වීතතපො අජ්ඣප්පත්තො, භඤ්ජි ලොහිතපො තපං.

150. එවමෙව ඉධෙකච්චෙ, සමාදානම්හි දුබ්බලා;

ලහුං කරොන්ති අත්තානං, වකොව අජකාරණාති.

වකජාතකං දසමං.

කුම්භවග්ගො පඤ්චමො.

තස්සුද්දානං –

වරකුම්භ සුපත්තසිරිව්හයනො, සුචිසම්මත බින්දුසරො චුසභො;

සරිතංපති චණ්ඩි ජරාකපිනා, අථ මක්කටියා වකකෙන දසාති.

අථ වග්ගුද්දානං –

සඞ්කප්පො පදුමො චෙව, උදපානෙන තතියං;

අබ්භන්තරං ඝටභෙදං, තිකනිපාතම්හිලඞ්කතන්ති.

තිකනිපාතං නිට්ඨිතං.