၉. တတိယရုက္ခသုတ္တံ

၅၃၉. ‘‘သေယျထာပိ၊ ဘိက္ခဝေ၊ ယေ ကေစိ အသုရာနံ ရုက္ခာ၊ စိတ္တပါဋလိ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ ဘိက္ခဝေ၊ ယေ ကေစိ အသုရာနံ ရုက္ခာ၊ စိတ္တပါဋလိ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. နဝမံ.