၇. ဗောဓိပက္ခိယဝဂ္ဂေါ

၁. သံယောဇနသုတ္တံ

၅၃၁. သာဝတ္ထိနိဒါနံ. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ [သံယောဇနာနံ ပဟာနာယ (သျာ. က.)] သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ သံဝတ္တန္တီ’’တိ. ပဌမံ.

၂. အနုသယသုတ္တံ

၅၃၂. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ အနုသယသမုဂ္ဃါတာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ အနုသယသမုဂ္ဃါတာယ သံဝတ္တန္တီ’’တိ. ဒုတိယံ.

၃. ပရိညာသုတ္တံ

၅၃၃. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ အဒ္ဓါနပရိညာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ အဒ္ဓါနပရိညာယ သံဝတ္တန္တီ’’တိ. တတိယံ.

၄. အာသဝက္ခယသုတ္တံ

၅၃၄. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ အာသဝါနံ ခယာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ အာသဝါနံ ခယာယ သံဝတ္တန္တီ’’တိ.

‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ သံဝတ္တန္တိ၊ အနုသယသမုဂ္ဃါတာယ သံဝတ္တန္တိ၊ အဒ္ဓါနပရိညာယ သံဝတ္တန္တိ၊ အာသဝါနံ ခယာယ သံဝတ္တန္တိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ ဘာဝိတာနိ ဗဟုလီကတာနိ သံယောဇနပ္ပဟာနာယ သံဝတ္တန္တိ၊ အနုသယသမုဂ္ဃါတာယ သံဝတ္တန္တိ၊ အဒ္ဓါနပရိညာယ သံဝတ္တန္တိ၊ အာသဝါနံ ခယာယ သံဝတ္တန္တီ’’တိ. စတုတ္ထံ.

၅. ပဌမဖလသုတ္တံ

၅၃၅. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ. ဣမေသံ ခေါ၊ ဘိက္ခဝေ၊ ပဉ္စန္နံ ဣန္ဒြိယာနံ ဘာဝိတတ္တာ ဗဟုလီကတတ္တာ ဒွိန္နံ ဖလာနံ အညတရံ ဖလံ ပါဋိကင်္ခံ – ဒိဋ္ဌေဝ ဓမ္မေ အညာ၊ သတိ ဝါ ဥပါဒိသေသေ အနာဂါမိတာ’’တိ. ပဉ္စမံ.

၆. ဒုတိယဖလသုတ္တံ

၅၃၆. ‘‘ပဉ္စိမာနိ၊ ဘိက္ခဝေ၊ ဣန္ဒြိယာနိ. ကတမာနိ ပဉ္စ? သဒ္ဓိန္ဒြိယံ။ပေ။ ပညိန္ဒြိယံ – ဣမာနိ ခေါ၊ ဘိက္ခဝေ၊ ပဉ္စိန္ဒြိယာနိ. ဣမေသံ ခေါ၊ ဘိက္ခဝေ၊ ပဉ္စန္နံ ဣန္ဒြိယာနံ ဘာဝိတတ္တာ ဗဟုလီကတတ္တာ သတ္တ ဖလာ သတ္တာနိသံသာ ပါဋိကင်္ခါ. ကတမေ သတ္တ ဖလာ သတ္တာနိသံသာ? ဒိဋ္ဌေဝ ဓမ္မေ ပဋိကစ္စ အညံ အာရာဓေတိ၊ နော စေ ဒိဋ္ဌေဝ ဓမ္မေ ပဋိကစ္စ အညံ အာရာဓေတိ၊ အထ မရဏကာလေ အညံ အာရာဓေတိ. နော စေ ဒိဋ္ဌေဝ ဓမ္မေ အညံ အာရာဓေတိ၊ နော စေ မရဏကာလေ အညံ အာရာဓေတိ၊ အထ ပဉ္စန္နံ ဩရမ္ဘာဂိယာနံ သံယောဇနာနံ ပရိက္ခယာ အန္တရာပရိနိဗ္ဗာယီ ဟောတိ၊ ဥပဟစ္စပရိနိဗ္ဗာယီ ဟောတိ၊ အသင်္ခါရပရိနိဗ္ဗာယီ ဟောတိ၊ သသင်္ခါရပရိနိဗ္ဗာယီ ဟောတိ၊ ဥဒ္ဓံသောတော ဟောတိ အကနိဋ္ဌဂါမီ. ဣမေသံ ခေါ၊ ဘိက္ခဝေ၊ ပဉ္စန္နံ ဣန္ဒြိယာနံ ဘာဝိတတ္တာ ဗဟုလီကတတ္တာ ဣမေ သတ္တ ဖလာ သတ္တာနိသံသာ ပါဋိကင်္ခါ’’တိ. ဆဋ္ဌံ.

၇. ပဌမရုက္ခသုတ္တံ

၅၃၇. ‘‘သေယျထာပိ ဘိက္ခဝေ၊ ယေ ကေစိ ဇမ္ဗုဒီပကာ ရုက္ခာ၊ ဇမ္ဗူ တေသံ အဂ္ဂမက္ခာယတိ၊ ဧဝမေဝ ခေါ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. ဝီရိယိန္ဒြိယံ။ပေ။ သတိန္ဒြိယံ။ပေ။ သမာဓိန္ဒြိယံ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ၊ ဘိက္ခဝေ၊ ယေ ကေစိ ဇမ္ဗုဒီပကာ ရုက္ခာ၊ ဇမ္ဗူ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. သတ္တမံ.

၈. ဒုတိယရုက္ခသုတ္တံ

၅၃၈. ‘‘သေယျထာပိ၊ ဘိက္ခဝေ၊ ယေ ကေစိ ဒေဝါနံ တာဝတိံသာနံ ရုက္ခာ၊ ပါရိဆတ္တကော တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. ဝီရိယိန္ဒြိယံ။ပေ။ သတိန္ဒြိယံ။ပေ။ သမာဓိန္ဒြိယံ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ၊ ဘိက္ခဝေ၊ ယေ ကေစိ ဒေဝါနံ တာဝတိံသာနံ ရုက္ခာ၊ ပါရိဆတ္တကော တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. အဋ္ဌမံ.

၉. တတိယရုက္ခသုတ္တံ

၅၃၉. ‘‘သေယျထာပိ၊ ဘိက္ခဝေ၊ ယေ ကေစိ အသုရာနံ ရုက္ခာ၊ စိတ္တပါဋလိ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ ဘိက္ခဝေ၊ ယေ ကေစိ အသုရာနံ ရုက္ခာ၊ စိတ္တပါဋလိ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. နဝမံ.

၁၀. စတုတ္ထရုက္ခသုတ္တံ

၅၄၀. ‘‘သေယျထာပိ၊ ဘိက္ခဝေ၊ ယေ ကေစိ သုပဏ္ဏာနံ ရုက္ခာ၊ ကူဋသိမ္ဗလီ [ကောဋသိမ္ဗလိ (သျာ. ကံ.)] တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ၊ ဘိက္ခဝေ၊ ယေ ကေစိ သုပဏ္ဏာနံ ရုက္ခာ၊ ကူဋသိမ္ဗလီ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. ဒသမံ.

ဗောဓိပက္ခိယဝဂ္ဂေါ သတ္တမော.

တဿုဒ္ဒါနံ –

သံယောဇနာ အနုသယာ၊ ပရိညာ အာသဝက္ခယာ၊

ဒွေ ဖလာ စတုရော ရုက္ခာ၊ ဝဂ္ဂေါ တေန ပဝုစ္စတီတိ.