၁၀. စတုတ္ထရုက္ခသုတ္တံ

၅၄၀. ‘‘သေယျထာပိ၊ ဘိက္ခဝေ၊ ယေ ကေစိ သုပဏ္ဏာနံ ရုက္ခာ၊ ကူဋသိမ္ဗလီ [ကောဋသိမ္ဗလိ (သျာ. ကံ.)] တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယ. ကတမေ စ၊ ဘိက္ခဝေ၊ ဗောဓိပက္ခိယာ ဓမ္မာ? သဒ္ဓိန္ဒြိယံ၊ ဘိက္ခဝေ၊ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ။ပေ။ ပညိန္ဒြိယံ ဗောဓိပက္ခိယော ဓမ္မော၊ တံ ဗောဓာယ သံဝတ္တတိ. သေယျထာပိ၊ ဘိက္ခဝေ၊ ယေ ကေစိ သုပဏ္ဏာနံ ရုက္ခာ၊ ကူဋသိမ္ဗလီ တေသံ အဂ္ဂမက္ခာယတိ၊ ဧဝမေဝ ခေါ၊ ဘိက္ခဝေ၊ ယေ ကေစိ ဗောဓိပက္ခိယာ ဓမ္မာ၊ ပညိန္ဒြိယံ တေသံ အဂ္ဂမက္ခာယတိ၊ ယဒိဒံ – ဗောဓာယာ’’တိ. ဒသမံ.

ဗောဓိပက္ခိယဝဂ္ဂေါ သတ္တမော.

တဿုဒ္ဒါနံ –

သံယောဇနာ အနုသယာ၊ ပရိညာ အာသဝက္ခယာ၊

ဒွေ ဖလာ စတုရော ရုက္ခာ၊ ဝဂ္ဂေါ တေန ပဝုစ္စတီတိ.