၃၆၉. မိတ္တဝိန္ဒကဇာတကံ (၅-၂-၉)

၁၀၀. ကျာဟံ ဒေဝါနမကရံ၊ ကိံ ပါပံ ပကတံ မယာ၊

ယံ မေ သိရသ္မိံ ဩဟစ္စ [ဥဟစ္စ (က.)၊ ဥဟစ္စ (ပီ.)]၊ စက္ကံ ဘမတိ မတ္ထကေ.

၁၀၁. အတိက္ကမ္မ ရမဏကံ၊ သဒါမတ္တဉ္စ ဒူဘကံ၊

ဗြဟ္မတ္တရဉ္စ ပါသာဒံ၊ ကေနတ္ထေန ဣဓာဂတော.

၁၀၂. ဣတော ဗဟုတရာ ဘောဂါ၊ အတြ မညေ ဘဝိဿရေ၊

ဣတိ ဧတာယ သညာယ၊ ပဿ မံ ဗျသနံ ဂတံ.

၁၀၃. စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ [အဋ္ဌာဟိ စာပိ (သီ. သျာ.)၊ အဋ္ဌာဘိ စာပိ (က.)] သောဠသ၊

သောဠသာဟိ စ ဗာတ္တိံသ၊ အတြိစ္ဆံ စက္ကမာသဒေါ၊

ဣစ္ဆာဟတဿ ပေါသဿ၊ စက္ကံ ဘမတိ မတ္ထကေ.

၁၀၄. ဥပရိဝိသာလာ ဒုပ္ပူရာ၊ ဣစ္ဆာ ဝိသဋဂါမိနီ [ဥပရိ ဝိသာလံ ဒုပ္ပူရံ၊ ဣစ္ဆာဝိသဒဂါမိနီ (သီ.)]၊

ယေ စ တံ အနုဂိဇ္ဈန္တိ၊ တေ ဟောန္တိ စက္ကဓာရိနောတိ.

မိတ္တဝိန္ဒကဇာတကံ နဝမံ.