၃၇၀. ပလာသဇာတကံ (၅-၂-၁၀)

၁၀၅. ဟံသော ပလာသမဝစ၊ နိဂြောဓော သမ္မ ဇာယတိ၊

အင်္ကသ္မိံ [အင်္ဂသ္မိံ (က.)] တေ နိသိန္နောဝ၊ သော တေ မမ္မာနိ ဆေစ္ဆတိ [ဆိဇ္ဇတိ (က.)].

၁၀၆. ဝဍ္ဎတာမေဝ [ဝဒ္ဓိတမေဝ (က.)] နိဂြောဓော၊ ပတိဋ္ဌဿ ဘဝါမဟံ၊

ယထာ ပိတာ စ မာတာ စ [ပိတာ ဝါ မာတာ ဝါ (ပီ.)၊ မာတာ ဝါ ပိတာ ဝါ (က.)]၊ ဧဝံ မေ သော ဘဝိဿတိ.

၁၀၇. ယံ တွံ အင်္ကသ္မိံ ဝဍ္ဎေသိ၊ ခီရရုက္ခံ ဘယာနကံ၊

အာမန္တ ခေါ တံ ဂစ္ဆာမ၊ ဝုဍ္ဎိ မဿ န ရုစ္စတိ.

၁၀၈. ဣဒါနိ ခေါ မံ ဘာယေတိ၊ မဟာနေရုနိဒဿနံ၊

ဟံသဿ အနဘိညာယ၊ မဟာ မေ ဘယမာဂတံ.

၁၀၉. န တဿ ဝုဍ္ဎိ ကုသလပ္ပသတ္ထာ၊ ယော ဝဍ္ဎမာနော ဃသတေ ပတိဋ္ဌံ၊

တဿူပရောဓံ ပရိသင်္ကမာနော၊ ပတာရယီ မူလဝဓာယ ဓီရောတိ.

ပလာသဇာတကံ ဒသမံ.

ဝဏ္ဏာရောဟဝဂ္ဂေါ ဒုတိယော [ဣမဿုဒ္ဒါနံ တတိယဝဂ္ဂပရိယောသာနေ ဘဝိဿတိ].