၅. ပဉ္စကနိပါတော
၁. မဏိကုဏ္ဍလဝဂ္ဂေါ
၃၅၁. မဏိကုဏ္ဍလဇာတကံ (၅-၁-၁)
၁. ဇီနော ရထဿံ မဏိကုဏ္ဍလေ စ၊ ပုတ္တေ စ ဒါရေ စ တထေဝ ဇီနော၊
သဗ္ဗေသု ဘောဂေသု အသေသကေသု [အသေသိတေသု (သီ. ပီ.)၊ အသေသိကေသု (က.)]၊ ကသ္မာ န သန္တပ္ပသိ သောကကာလေ.
၂. ပုဗ္ဗေဝ မစ္စံ ဝိဇဟန္တိ ဘောဂါ၊ မစ္စော ဝါ တေ [စ နေ (ပီ.)၊ ဓနေ (က.)] ပုဗ္ဗတရံ ဇဟာတိ၊
အသဿတာ ဘောဂိနော ကာမကာမိ၊ တသ္မာ န သောစာမဟံ သောကကာလေ.
၃. ဥဒေတိ အာပူရတိ ဝေတိ [ပူရေတိ ခီယတိ (သျာ.)] စန္ဒော၊ အတ္ထံ တပေတွာန [အန္ဓံ တပေတွာန (က.)၊ အတ္ထင်္ဂမေတွာန (သျာ.)၊ ဧတ္ထ ‘‘တပေတွာန အတ္ထံ ပလေတီ’’တိ သမ္ဗန္ဓော] ပလေတိ သူရိယော၊
ဝိဒိတာ [ဝိဇိတာ (သျာ.)] မယာ သတ္တုက လောကဓမ္မာ၊ တသ္မာ န သောစာမဟံ သောကကာလေ.
၄. အလသော ဂိဟီ ကာမဘောဂီ န သာဓု၊ အသညတော ပဗ္ဗဇိတော န သာဓု၊
ရာဇာ န သာဓု အနိသမ္မကာရီ၊ ယော ပဏ္ဍိတော ကောဓနော တံ န သာဓု.
၅. နိသမ္မ ခတ္တိယော ကယိရာ၊ နာနိသမ္မ ဒိသမ္ပတိ၊
နိသမ္မကာရိနော ရာဇ [ရညော (သီ. သျာ.)]၊ ယသော ကိတ္တိ စ ဝဍ္ဎတီတိ.
မဏိကုဏ္ဍလဇာတကံ ပဌမံ.
၃၅၂. သုဇာတဇာတကံ (၅-၁-၂)
၆. ကိံ နု သန္တရမာနောဝ၊ လာယိတွာ ဟရိတံ တိဏံ၊
ခါဒ ခါဒါတိ လပသိ၊ ဂတသတ္တံ ဇရဂ္ဂဝံ.
၇. န ဟိ အန္နေန ပါနေန၊ မတော ဂေါဏော သမုဋ္ဌဟေ၊
တွဉ္စ တုစ္ဆံ ဝိလပသိ၊ ယထာ တံ ဒုမ္မတီ တထာ.
၈. တထေဝ တိဋ္ဌတိ သီသံ၊ ဟတ္ထပါဒါ စ ဝါလဓိ၊
သောတာ တထေဝ တိဋ္ဌန္တိ [သော တာတ တထေဝ တိဋ္ဌတိ (က.)]၊ မညေ ဂေါဏော သမုဋ္ဌဟေ.
၉. နေဝယျကဿ သီသဉ္စ [သီသံ ဝါ (သီ. သျာ. ပီ.)]၊ ဟတ္ထပါဒါ စ ဒိဿရေ၊
ရုဒံ မတ္တိကထူပသ္မိံ၊ နနု တွညေဝ ဒုမ္မတိ.
၁၀. အာဒိတ္တံ ဝတ မံ သန္တံ၊ ဃတသိတ္တံဝ ပါဝကံ၊
ဝါရိနာ ဝိယ ဩသိဉ္စံ [ဩသိဉ္စိ (က.)]၊ သဗ္ဗံ နိဗ္ဗာပယေ ဒရံ.
၁၁. အဗ္ဗဟီ [အဗ္ဗူဠှံ (သီ. သျာ.)၊ အဗ္ဘူဠှံ (က.)] ဝတ မေ သလ္လံ၊ ယမာသိ ဟဒယဿိတံ [သောကံ ဟဒယနိဿိတံ (သီ. သျာ.)]၊
ယော မေ သောကပရေတဿ၊ ပိတု သောကံ အပါနုဒိ.
၁၂. သောဟံ အဗ္ဗူဠှသလ္လောသ္မိ၊ ဝီတသောကော အနာဝိလော၊
န သောစာမိ န ရောဒါမိ၊ တဝ သုတွာန မာဏဝ.
၁၃. ဧဝံ ကရောန္တိ သပ္ပညာ၊ ယေ ဟောန္တိ အနုကမ္ပကာ၊
ဝိနိဝတ္တေန္တိ သောကမှာ၊ သုဇာတော ပိတရံ ယထာတိ.
သုဇာတဇာတကံ ဒုတိယံ.
၃၅၃. ဝေနသာခဇာတကံ (၅-၁-၃)
၁၄. နယိဒံ နိစ္စံ ဘဝိတဗ္ဗံ ဗြဟ္မဒတ္တ၊ ခေမံ သုဘိက္ခံ သုခတာ စ ကာယေ၊
အတ္ထစ္စယေ မာ အဟု သမ္ပမူဠှော၊ ဘိန္နပ္လဝေါ သာဂရဿေဝ မဇ္ဈေ.
၁၅. ယာနိ ကရောတိ ပုရိသော၊ တာနိ အတ္တနိ ပဿတိ၊
ကလျာဏကာရီ ကလျာဏံ၊ ပါပကာရီ စ ပါပကံ၊
ယာဒိသံ ဝပတေ ဗီဇံ၊ တာဒိသံ ဟရတေ ဖလံ.
၁၆. ဣဒံ တဒါစရိယဝစော၊ ပါရာသရိယော ယဒဗြဝိ၊
မာ သု [မာ ဿု (သီ. သျာ. ပီ.)] တွံ အကရိ ပါပံ၊ ယံ တွံ ပစ္ဆာ ကတံ တပေ.
၁၇. အယမေဝ သော ပိင်္ဂိယ [သော ပိင်္ဂိယော (သျာ.)၊ သောပိ ဘိယျော (က.)] ဝေနသာခေါ၊ [ဓောနသာခေါ (က. သီ. ပီ.)] ယမှိ ဃာတယိံ ခတ္တိယာနံ သဟဿံ၊
အလင်္ကတေ စန္ဒနသာရာနုလိတ္တေ၊ တမေဝ ဒုက္ခံ ပစ္စာဂတံ မမံ.
၁၈. သာမာ စ [သာမာပိ (သီ. သျာ.)] ခေါ စန္ဒနလိတ္တဂတ္တာ [ဂတ္တီ (က. သီ. သျာ. ပီ.)]၊ လဋ္ဌီဝ သောဘဉ္ဇနကဿ ဥဂ္ဂတာ၊
အဒိသွာ [အဒိသွာဝ (သီ.)] ကာလံ ကရိဿာမိ ဥဗ္ဗရိံ၊ တံ မေ ဣတော ဒုက္ခတရံ ဘဝိဿတီတိ.
ဝေနသာခဇာတကံ [ဓောနသာခဇာတကံ (က. သီ. ပီ.)] တတိယံ.
၃၅၄. ဥရဂဇာတကံ (၅-၁-၄)
၁၉. ဥရဂေါဝ တစံ ဇိဏ္ဏံ၊ ဟိတွာ ဂစ္ဆတိ သံ တနုံ၊
ဧဝံ သရီရေ နိဗ္ဘောဂေ၊ ပေတေ ကာလင်္ကတေ သတိ.
၂၀. ဍယှမာနော န ဇာနာတိ၊ ဉာတီနံ ပရိဒေဝိတံ၊
တသ္မာ ဧတံ န သောစာမိ၊ ဂတော သော တဿ ယာ ဂတိ.
၂၁. အနဝှိတော တတော အာဂါ၊ အနနုညာတော [နာနုညာတော (က.)] ဣတော ဂတော၊
ယထာဂတော တထာ ဂတော၊ တတ္ထ ကာ ပရိဒေဝနာ.
၂၂. ဍယှမာနော န ဇာနာတိ၊ ဉာတီနံ ပရိဒေဝိတံ၊
တသ္မာ ဧတံ န သောစာမိ၊ ဂတော သော တဿ ယာ ဂတိ.
၂၃. သစေ ရောဒေ ကိသာ [ကိသီ (ပီ.)] အဿံ၊ တဿာ မေ ကိံ ဖလံ သိယာ၊
ဉာတိမိတ္တသုဟဇ္ဇာနံ၊ ဘိယျော နော အရတီ သိယာ.
၂၄. ဍယှမာနော န ဇာနာတိ၊ ဉာတီနံ ပရိဒေဝိတံ၊
တသ္မာ ဧတံ န သောစာမိ၊ ဂတော သော တဿ ယာ ဂတိ.
၂၅. ယထာပိ ဒါရကော စန္ဒံ၊ ဂစ္ဆန္တမနုရောဒတိ၊
ဧဝံ သမ္ပဒမေဝေတံ၊ ယော ပေတမနုသောစတိ.
၂၆. ဍယှမာနော န ဇာနာတိ၊ ဉာတီနံ ပရိဒေဝိတံ၊
တသ္မာ ဧတံ န သောစာမိ၊ ဂတော သော တဿ ယာ ဂတိ.
၂၇. ယထာပိ ဥဒကကုမ္ဘော၊ ဘိန္နော အပ္ပဋိသန္ဓိယော၊
ဧဝံ သမ္ပဒမေဝေတံ၊ ယော ပေတမနုသောစတိ.
၂၈. ဍယှမာနော န ဇာနာတိ၊ ဉာတီနံ ပရိဒေဝိတံ၊
တသ္မာ ဧတံ န သောစာမိ၊ ဂတော သော တဿ ယာ ဂတီတိ.
ဥရဂဇာတကံ စတုတ္ထံ.
၃၅၅. ဃဋဇာတကံ (၅-၁-၅)
၂၉. အညေ သောစန္တိ ရောဒန္တိ၊ အညေ အဿုမုခါ ဇနာ၊
ပသန္နမုခဝဏ္ဏောသိ၊ ကသ္မာ ဃဋ [ဃတ (သီ. ပီ.)] န သောစသိ.
၃၀. နာဗ္ဘတီတဟရော သောကော၊ နာနာဂတသုခါဝဟော၊
တသ္မာ ဓင်္က [ဝံက (ပီ.)] န သောစာမိ၊ နတ္ထိ သောကေ ဒုတီယတာ [သောကော ဒုတီယကာ (က.)].
၃၁. သောစံ ပဏ္ဍု ကိသော ဟောတိ၊ ဘတ္တဉ္စဿ န ရုစ္စတိ၊
အမိတ္တာ သုမနာ ဟောန္တိ၊ သလ္လဝိဒ္ဓဿ ရုပ္ပတော.
၃၂. ဂါမေ ဝါ ယဒိ ဝါရညေ၊ နိန္နေ ဝါ ယဒိ ဝါ ထလေ၊
ဌိတံ မံ နာဂမိဿတိ၊ ဧဝံ ဒိဋ္ဌပဒေါ အဟံ.
၃၃. ယဿတ္တာ နာလမေကောဝ၊ သဗ္ဗကာမရသာဟရော၊
သဗ္ဗာပိ ပထဝီ တဿ၊ န သုခံ အာဝဟိဿတီတိ.
ဃဋဇာတကံ ပဉ္စမံ.
၃၅၆. ကောရဏ္ဍိယဇာတကံ (၅-၁-၆)
၃၄. ဧကော အရညေ ဂိရိကန္ဒရာယံ၊ ပဂ္ဂယှ ပဂ္ဂယှ သိလံ ပဝေစ္ဆသိ [ပဝေဇ္ဈသိ (သျာ. သီ. အဋ္ဌ.)]၊
ပုနပ္ပုနံ သန္တရမာနရူပေါ၊ ကောရဏ္ဍိယ [ကာရဏ္ဍိယ (သီ. သျာ. ပီ.)] ကော နု တဝ ယိဓတ္ထော.
၃၅. အဟဉှိမံ သာဂရ သေဝိတန္တံ၊ သမံ ကရိဿာမိ ယထာပိ ပါဏိ၊
ဝိကိရိယ သာနူနိ စ ပဗ္ဗတာနိ စ၊ တသ္မာ သိလံ ဒရိယာ ပက္ခိပါမိ.
၃၆. နယိမံ မဟိံ အရဟတိ ပါဏိကပ္ပံ၊ သမံ မနုဿော ကရဏာယ မေကော၊
မညာမိမညေဝ ဒရိံ ဇိဂီသံ [ဇိဂိံသံ (သီ. သျာ. ပီ.)]၊ ကောရဏ္ဍိယ ဟာဟသိ [ဟာယသိ (သျာ. က.)] ဇီဝလောကံ.
၃၇. သစေ အဟံ [အယံ (သီ. သျာ. ပီ.)] ဘူတဓရံ န သက္ကာ [သက္ကော (သျာ. က.)]၊ သမံ မနုဿော ကရဏာယ မေကော၊
ဧဝမေဝ တွံ ဗြဟ္မေ ဣမေ မနုဿေ၊ နာနာဒိဋ္ဌိကေ နာနယိဿသိ တေ [နေ (က.)].
၃၈. သင်္ခိတ္တရူပေန ဘဝံ မမတ္ထံ၊ အက္ခာသိ ကောရဏ္ဍိယ ဧဝမေတံ၊
ယထာ န သက္ကာ ပထဝီ သမာယံ၊ ကတ္တုံ မနုဿေန တထာ မနုဿာတိ.
ကောရဏ္ဍိယဇာတကံ ဆဋ္ဌံ.
၃၅၇. လဋုကိကဇာတကံ (၅-၁-၇)
၃၉. ဝန္ဒာမိ တံ ကုဉ္ဇရ သဋ္ဌိဟာယနံ၊ အာရညကံ ယူထပတိံ ယသဿိံ၊
ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယ.
၄၀. ဝန္ဒာမိ တံ ကုဉ္ဇရ ဧကစာရိံ၊ အာရညကံ ပဗ္ဗတသာနုဂေါစရံ၊
ပက္ခေဟိ တံ ပဉ္ဇလိကံ ကရောမိ၊ မာ မေ ဝဓီ ပုတ္တကေ ဒုဗ္ဗလာယ၊
၄၁. ဝမိဿာမိ တေ လဋုကိကေ ပုတ္တကာနိ၊ ကိံ မေ တုဝံ ကာဟသိ ဒုဗ္ဗလာသိ၊
သတံ သဟဿာနိပိ တာဒိသီနံ၊ ဝါမေန ပါဒေန ပပေါထယေယျံ.
၄၂. န ဟေဝ သဗ္ဗတ္ထ ဗလေန ကိစ္စံ၊ ဗလဉှိ ဗာလဿ ဝဓာယ ဟောတိ၊
ကရိဿာမိ တေ နာဂရာဇာ အနတ္ထံ၊ ယော မေ ဝဓီ ပုတ္တကေ ဒုဗ္ဗလာယ.
၄၃. ကာကဉ္စ ပဿ လဋုကိကံ၊ မဏ္ဍူကံ နီလမက္ခိကံ၊
ဧတေ နာဂံ အဃာတေသုံ၊ ပဿ ဝေရဿ ဝေရိနံ၊
တသ္မာ ဟိ ဝေရံ န ကယိရာထ၊ အပ္ပိယေနပိ ကေနစီတိ.
လဋုကိကဇာတကံ သတ္တမံ.
၃၅၈. စူဠဓမ္မပါလဇာတကံ (၅-၁-၈)
၄၄. အဟမေဝ ဒူသိယာ ဘူနဟတာ၊ ရညော မဟာပတာပဿ၊
ဧတံ မုဉ္စတု ဓမ္မပါလံ၊ ဟတ္ထေ မေ ဒေဝ ဆေဒေဟိ.
၄၅. အဟမေဝ ဒူသိယာ ဘူနဟတာ၊ ရညော မဟာပတာပဿ၊
ဧတံ မုဉ္စတု ဓမ္မပါလံ၊ ပါဒေ မေ ဒေဝ ဆေဒေဟိ.
၄၆. အဟမေဝ ဒူသိယာ ဘူနဟတာ၊ ရညော မဟာပတာပဿ၊
ဧတံ မုဉ္စတု ဓမ္မပါလံ၊ သီသံ မေ ဒေဝ ဆေဒေဟိ.
၄၇. န ဟိ [နဟ (သီ. သျာ. ပီ.) ဧတ္ထ ဟ-ကာရော ခေဒေ] နူနိမဿ ရညော၊ မိတ္တာမစ္စာ စ ဝိဇ္ဇရေ သုဟဒါ၊
ယေ န ဝဒန္တိ ရာဇာနံ၊ မာ ဃာတယိ ဩရသံ ပုတ္တံ.
၄၈. န ဟိ [နဟ (သီ. သျာ. ပီ.) ဧတ္ထ ဟ-ကာရော ခေဒေ] နူနိမဿ ရညော၊ ဉာတီ မိတ္တာ စ ဝိဇ္ဇရေ သုဟဒါ၊
ယေ န ဝဒန္တိ ရာဇာနံ၊ မာ ဃာတယိ အတြဇံ ပုတ္တံ.
၄၉. စန္ဒနသာရာနုလိတ္တာ၊ ဗာဟာ ဆိဇ္ဇန္တိ ဓမ္မပါလဿ၊
ဒါယာဒဿ ပထဗျာ၊ ပါဏာ မေ ဒေဝ ရုဇ္ဈန္တီတိ.
စူဠဓမ္မပါလဇာတကံ အဋ္ဌမံ.
၃၅၉. သုဝဏ္ဏမိဂဇာတကံ (၅-၁-၉)
၅၀. ဝိက္ကမ ရေ ဟရိပါဒ [မဟာမိဂ (သီ. သျာ. ပီ.)]၊ ဝိက္ကမ ရေ မဟာမိဂ [ဟရီပဒ (သီ. သျာ. ပီ.)]၊
ဆိန္ဒ ဝါရတ္တိကံ ပါသံ၊ နာဟံ ဧကာ ဝနေ ရမေ.
၅၁. ဝိက္ကမာမိ န ပါရေမိ၊ ဘူမိံ သုမ္ဘာမိ ဝေဂသာ၊
ဒဠှော ဝါရတ္တိကော ပါသော၊ ပါဒံ မေ ပရိကန္တတိ.
၅၂. အတ္ထရဿု ပလာသာနိ၊ အသိံ နိဗ္ဗာဟ လုဒ္ဒက၊
ပဌမံ မံ ဝဓိတွာန၊ ဟန ပစ္ဆာ မဟာမိဂံ.
၅၃. န မေ သုတံ ဝါ ဒိဋ္ဌံ ဝါ၊ ဘာသန္တိံ မာနုသိံ မိဂိံ [န မေ သုတာ ဝါ ဒိဋ္ဌာ ဝါ၊ ဘာသန္တီ မာနုသိံ မိဂီ (ဋီကာ)]၊
တွဉ္စ ဘဒ္ဒေ သုခီ ဟောဟိ၊ ဧသော စာပိ မဟာမိဂေါ.
၅၄. ဧဝံ လုဒ္ဒက နန္ဒဿု၊ သဟ သဗ္ဗေဟိ ဉာတိဘိ၊
ယထာဟမဇ္ဇ နန္ဒာမိ၊ မုတ္တံ ဒိသွာ မဟာမိဂန္တိ.
သုဝဏ္ဏမိဂဇာတကံ နဝမံ.
၃၆၀. သုယောနန္ဒီဇာတကံ (၅-၁-၁၀)
၅၅. ဝါတိ ဂန္ဓော တိမိရာနံ၊ ကုသမုဒ္ဒေါ စ [ဝ (သျာ. ပီ.)] ဃောသဝါ၊
ဒူရေ ဣတော သုယောနန္ဒီ [ဣတော ဟိ သုသန္ဒီ (သီ. သျာ.)၊ ဣတောပိ သုဿောန္ဒီ (ပီ.)]၊ တမ္ဗကာမာ တုဒန္တိ မံ.
၅၆. ကထံ သမုဒ္ဒမတရိ၊ ကထံ အဒ္ဒက္ခိ သေဒုမံ [သေရုမံ (သီ. သျာ. ပီ.)]၊
ကထံ တဿာ စ တုယှဉ္စ၊ အဟု သဂ္ဂ [အဂ္ဂ (သီ. သျာ.)] သမာဂမော.
၅၇. ကုရုကစ္ဆာ [ဘရုကစ္ဆာ (သီ. သျာ. ပီ.)] ပယာတာနံ၊ ဝါဏိဇာနံ ဓနေသိနံ၊
မကရေဟိ အဘိဒါ [မကရေဟိဗ္ဘိဒါ (သီ.)၊ မကရေဟိ’ဘိဒါ (သျာ.)၊ မကရေဟိ ဘိန္နာ (ပီ.)] နာဝါ၊ ဖလကေနာဟမပ္လဝိံ.
၅၈. သာ မံ သဏှေန မုဒုနာ၊ နိစ္စံ စန္ဒနဂန္ဓိနီ၊
အင်္ဂေန [အင်္ကေန (ပီ. က.)] ဥဒ္ဓရီ ဘဒ္ဒါ၊ မာတာ ပုတ္တံဝ ဩရသံ.
၅၉. သာ မံ အန္နေန ပါနေန၊ ဝတ္ထေန သယနေန စ၊
အတ္တနာပိ စ မန္ဒက္ခီ၊ ဧဝံ တမ္ဗ ဝိဇာနာဟီတိ.
သုယောနန္ဒီဇာတကံ ဒသမံ.
မဏိကုဏ္ဍလဝဂ္ဂေါ ပဌမော.
တဿုဒ္ဒါနံ –
အထ ဇိနဝရော ဟရိတံ တိဏကော၊ အထ ဘိန္နပ္လဝေါ ဥရဂေါဝ ဃဋော၊
ဒရိယာ ပုန ကုဉ္ဇရ ဘူနဟတာ၊ မိဂမုတ္တမသဂ္ဂဝရေန ဒသာတိ.
၂. ဝဏ္ဏာရောဟဝဂ္ဂေါ
၃၆၁. ဝဏ္ဏာရောဟဇာတကံ (၅-၂-၁)
၆၀. ဝဏ္ဏာရောဟေန ဇာတိယာ၊ ဗလနိက္ကမနေန စ၊
သုဗာဟု န မယာ သေယျော၊ သုဒါဌ ဣတိ ဘာသသိ.