နမော တဿ ဘဂဝတော အရဟတော သမ္မာသမ္ဗုဒ္ဓဿ

ခုဒ္ဒကနိကာယေ

ဇာတကပါဠိ

(ပဌမော ဘာဂေါ)

၁. ဧကကနိပါတော

၁. အပဏ္ဏကဝဂ္ဂေါ

၁. အပဏ္ဏကဇာတကံ

၁. အပဏ္ဏကံ ဌာနမေကေ၊ ဒုတိယံ အာဟု တက္ကိကာ၊

ဧတဒညာယ မေဓာဝီ၊ တံ ဂဏှေ ယဒပဏ္ဏကန္တိ [တံ ဂဏှေယျ အပဏ္ဏကံ (က.)].

အပဏ္ဏကဇာတကံ ပဌမံ.

၂. ဝဏ္ဏုပထဇာတကံ

၂. အကိလာသုနော ဝဏ္ဏုပထေ [ဝဏ္ဏပထေ (က.)] ခဏန္တာ၊ ဥဒင်္ဂဏေ တတ္ထ ပပံ အဝိန္ဒုံ၊

ဧဝံ မုနီ ဝီရိယ [မုနိ ဝိရိယ (ပီ.)၊ မုနိ ဝီရိယ (သျာ. က.)] ဗလူပပန္နော၊ အကိလာသု ဝိန္ဒေ ဟဒယဿ သန္တိန္တိ.

ဝဏ္ဏုပထဇာတကံ ဒုတိယံ.

၃. သေရိဝဝါဏိဇဇာတကံ

၃. ဣဓ စေ နံ [ဣဓ စေ ဟိ နံ (သီ. ပီ.)] ဝိရာဓေသိ၊ သဒ္ဓမ္မဿ နိယာမတံ [နိယာမကံ (သျာ. က.)]၊

စိရံ တွံ အနုတပ္ပေသိ [အနုတပေဿသိ (သီ. ပီ.)၊ အနုတပ္ပိဿသိ (?)]၊ သေရိဝါယံဝ ဝါဏိဇောတိ.

သေရိဝဝါဏိဇဇာတကံ တတိယံ.

၄. စူဠသေဋ္ဌိဇာတကံ

၄. အပ္ပကေနပိ မေဓာဝီ၊ ပါဘတေန ဝိစက္ခဏော၊

သမုဋ္ဌာပေတိ အတ္တာနံ၊ အဏုံ အဂ္ဂိံဝ သန္ဓမန္တိ.

စူဠ [စုလ္လ (သီ.)၊ စုလ္လက (သျာ. ပီ.)] သေဋ္ဌိဇာတကံ စတုတ္ထံ.

၅. တဏ္ဍုလနာဠိဇာတကံ

၅. [ကိမဂ္ဃတီ တဏ္ဍုလနာဠိကာ စ၊ ဗာရာဏသီ အန္တရဗာဟိရာနိ၊ အဿပဉ္စသတေ တာနိ၊ ဧကာ တဏ္ဍုလနာဠိကာတိ၊ (သျာ.)] ကိမဂ္ဃတိ တဏ္ဍုလနာဠိကာယ၊ အဿာန မူလာယ ဝဒေဟိ ရာဇ [နာဠိကာ စ (သီ.)၊ နာဠိကာယ (က. သီ. အဋ္ဌ.)]၊

ဗာရာဏသိံ သန္တရဗာဟိရတော [ဗာဟိရန္တံ (သီ.)]၊ အယမဂ္ဃတိ တဏ္ဍုလနာဠိကာတိ [ကိမဂ္ဃတီ ဝဏ္ဍုလနာဠိကာ စ၊ ဗာရာဏသီ အန္တရဗာဟိရာနိ၊ အဿပဉ္စသတေ တာနိ၊ ဧကာ တဏ္ဍုလနာဠိကာတိ၊ (သျာ.)].

တဏ္ဍုလနာဠိဇာတကံ ပဉ္စမံ.

၆. ဒေဝဓမ္မဇာတကံ

၆. ဟိရိဩတ္တပ္ပသမ္ပန္နာ၊ သုက္ကဓမ္မသမာဟိတာ၊

သန္တော သပ္ပုရိသာ လောကေ၊ ဒေဝဓမ္မာတိ ဝုစ္စရေတိ.

ဒေဝဓမ္မဇာတကံ ဆဋ္ဌံ.

၇. ကဋ္ဌဟာရိဇာတကံ

၇. ပုတ္တော တျာဟံ မဟာရာဇ၊ တွံ မံ ပေါသ ဇနာဓိပ၊

အညေပိ ဒေဝေါ ပေါသေတိ၊ ကိဉ္စ [ကိဉ္စိ (က.)] ဒေဝေါ သကံ ပဇန္တိ.

ကဋ္ဌဟာရိ [ကဋ္ဌဝါဟန (က.)] ဇာတကံ သတ္တမံ.

၈. ဂါမဏိဇာတကံ

၈. အပိ အတရမာနာနံ၊ ဖလာသာဝ သမိဇ္ဈတိ၊

ဝိပက္ကဗြဟ္မစရိယောသ္မိ၊ ဧဝံ ဇာနာဟိ ဂါမဏီတိ.

ဂါမဏိဇာတကံ အဋ္ဌမံ.

၉. မဃဒေဝဇာတကံ

၉. ဥတ္တမင်္ဂရုဟာ မယှံ၊ ဣမေ ဇာတာ ဝယောဟရာ၊

ပါတုဘူတာ ဒေဝဒူတာ၊ ပဗ္ဗဇ္ဇာသမယော မမာတိ.

မဃဒေဝ [မခါဒေဝ (သီ. ပီ.)၊ ဒေဝဒူတ (က.)] ဇာတကံ နဝမံ.

၁၀. သုခဝိဟာရိဇာတကံ

၁၀. ယဉ္စ အညေ န ရက္ခန္တိ၊ ယော စ အညေ န ရက္ခတိ၊

သ ဝေ ရာဇ သုခံ သေတိ၊ ကာမေသု အနပေက္ခဝါတိ.

သုခဝိဟာရိဇာတကံ ဒသမံ.

အပဏ္ဏကဝဂ္ဂေါ ပဌမော.

တဿုဒ္ဒါနံ –

ဝရာပဏ္ဏက ဝဏ္ဏုပထ သေရိဝရော၊ သုဝိစက္ခဏ တဏ္ဍုလနာဠိကဿာ၊

ဟိရိ ပုတ္တဝရုတ္တဂါမဏိနာ၊ ယော စ န ရက္ခတိ တေန ဒသာတိ.

၂. သီလဝဂ္ဂေါ

၁၁. လက္ခဏမိဂဇာတကံ

၁၁. ဟောတိ သီလဝတံ အတ္ထော၊ ပဋိသန္ထာရ [ပဋိသန္ဓာရ (က.)] ဝုတ္တိနံ၊

လက္ခဏံ ပဿ အာယန္တံ၊ ဉာတိသံဃပုရက္ခတံ [ပုရက္ခိတံ (သျာ.)၊ ပုရေက္ခိတံ (က.)]၊

အထ ပဿသိမံ ကာဠံ၊ သုဝိဟီနံဝ ဉာတိဘီတိ.

လက္ခဏမိဂဇာတကံ ပဌမံ.

၁၂. နိဂြောဓမိဂဇာတကံ

၁၂. နိဂြောဓမေဝ သေဝေယျ၊ န သာခမုပသံဝသေ၊

နိဂြောဓသ္မိံ မတံ သေယျော၊ ယဉ္စေ သာခသ္မိ [သာခသ္မိံ (သီ. ပီ.)] ဇီဝိတန္တိ.

နိဂြောဓမိဂဇာတကံ ဒုတိယံ.

၁၃. ကဏ္ဍိဇာတကံ

၁၃. ဓိရတ္ထု ကဏ္ဍိနံ သလ္လံ၊ ပုရိသံ ဂါဠှဝေဓိနံ၊

ဓိရတ္ထု တံ ဇနပဒံ၊ ယတ္ထိတ္ထီ ပရိဏာယိကာ၊

တေ စာပိ ဓိက္ကိတာ [ဓိက္ကတာ (?)] သတ္တာ၊ ယေ ဣတ္ထီနံ ဝသံဂတာတိ.

ကဏ္ဍိဇာတကံ တတိယံ.

၁၄. ဝါတမိဂဇာတကံ

၁၄. န ကိရတ္ထိ ရသေဟိ ပါပိယော၊ အာဝါသေဟိ ဝ [ဝါ (သဗ္ဗတ္ထ)] သန္ထဝေဟိ ဝါ၊

ဝါတမိဂံ ဂဟနနိဿိတံ [ဂေဟနိဿိတံ (သီ. ပီ.)]၊ ဝသမာနေသိ ရသေဟိ သဉ္ဇယောတိ.

ဝါတမိဂဇာတကံ စတုတ္ထံ.

၁၅. ခရာဒိယဇာတကံ

၁၅. အဋ္ဌက္ခုရံ ခရာဒိယေ၊ မိဂံ ဝင်္ကာတိဝင်္ကိနံ၊

သတ္တဟိ ကာလာတိက္ကန္တံ [သတ္တဟိ ကလာဟ’တိက္ကန္တံ (သီ.)၊ သတ္တကာလေဟ’တိက္ကန္တံ (သျာ.)၊ သတ္တဟိ ကာလာဟ’တိက္ကန္တံ (ပီ.)]၊ န နံ ဩဝဒိတုဿဟေတိ.

ခရာဒိယဇာတကံ ပဉ္စမံ.

၁၆. တိပလ္လတ္ထမိဂဇာတကံ

၁၆. မိဂံ တိပလ္လတ္ထ [တိပလ္လတ္တ (က.)] မနေကမာယံ၊ အဋ္ဌက္ခုရံ အဍ္ဎရတ္တာပပါယိံ [အဍ္ဎရတ္တာဝပါယိံ (သီ. ပီ.)]၊

ဧကေန သောတေန ဆမာဿသန္တော၊ ဆဟိ ကလာဟိတိဘောတိ [ကလာဟတိဘောတိ (သီ. သျာ. ပီ.)] ဘာဂိနေယျောတိ.

တိပလ္လတ္ထမိဂဇာတကံ ဆဋ္ဌံ.

၁၇. မာလုတဇာတကံ

၁၇. ကာဠေ ဝါ ယဒိ ဝါ ဇုဏှေ၊ ယဒါ ဝါယတိ မာလုတော၊

ဝါတဇာနိ ဟိ သီတာနိ၊ ဥဘောတ္ထမပရာဇိတာတိ.

မာလုတဇာတကံ သတ္တမံ.

၁၈. မတကဘတ္တဇာတကံ

၁၈. ဧဝံ စေ သတ္တာ ဇာနေယျုံ၊ ဒုက္ခာယံ ဇာတိသမ္ဘဝေါ၊

န ပါဏော ပါဏိနံ ဟညေ၊ ပါဏဃာတီ ဟိ သောစတီတိ.

မတကဘတ္တဇာတကံ အဋ္ဌမံ.

၁၉. အာယာစိတဘတ္တဇာတကံ

၁၉. သစေ မုစ္စေ [မုဉ္စေ (သီ. သျာ. ပီ.)] ပေစ္စ မုစ္စေ [မုဉ္စေ (သီ. သျာ. ပီ.)]၊ မုစ္စမာနော ဟိ ဗဇ္ဈတိ၊

န ဟေဝံ ဓီရာ မုစ္စန္တိ၊ မုတ္တိ ဗာလဿ ဗန္ဓနန္တိ.

အာယာစိတဘတ္တဇာတကံ နဝမံ.

၂၀. နဠပါနဇာတကံ

၂၀. ဒိသွာ ပဒမနုတ္တိဏ္ဏံ၊ ဒိသွာနောတရိတံ ပဒံ၊

နဠေန ဝါရိံ ပိဿာမ [ပိဝိဿာမ (သီ. သျာ. ပီ.)]၊ နေဝ [န စ (က.)] မံ တွံ ဝဓိဿသီတိ.

နဠပါနဇာတကံ ဒသမံ.

သီလဝဂ္ဂေါ ဒုတိယော.

တဿုဒ္ဒါနံ –

အထ လက္ခဏ သာခ ဓိရတ္ထု ပုန၊ န ကိရတ္ထိ ရသေဟိ ခရာဒိယာ၊

အတိဘောတိ ဝရ [ရသ (သဗ္ဗတ္ထ)] မာလုတ ပါဏ၊ မုစ္စေန နဠအဝှယနေန ဘဝန္တိ ဒသာတိ.

၃. ကုရုင်္ဂဝဂ္ဂေါ

၂၁. ကုရုင်္ဂမိဂဇာတကံ

၂၁. ဉာတမေတံ ကုရုင်္ဂဿ၊ ယံ တွံ သေပဏ္ဏိ သိယျသိ [သေယျသိ (သီ. သျာ. ပီ.)]၊

အညံ သေပဏ္ဏိ ဂစ္ဆာမိ၊ န မေ တေ ရုစ္စတေ ဖလန္တိ.

ကုရုင်္ဂမိဂဇာတကံ ပဌမံ.

၂၂. ကုက္ကုရဇာတကံ

၂၂. ယေ ကုက္ကုရာ ရာဇကုလမှိ ဝဒ္ဓါ၊ ကောလေယျကာ ဝဏ္ဏဗလူပပန္နာ၊

တေမေ န ဝဇ္ဈာ မယမသ္မ ဝဇ္ဈာ၊ နာယံ သဃစ္စာ ဒုဗ္ဗလဃာတိကာယန္တိ.

ကုက္ကုရဇာတကံ ဒုတိယံ.

၂၃. ဂေါဇာနီယဇာတကံ

၂၃. အပိ ပဿေန သေမာနော၊ သလ္လေဘိ သလ္လလီကတော၊

သေယျောဝ ဝဠဝါ ဂေါဇော [ဘောဇ္ဇော (သီ.)၊ ဘောဇ္ဈော (သျာ. ပီ.)]၊ ယုဉ္ဇ မညေဝ သာရထီတိ.

ဂေါဇာနီယ [ဘောဇာဇာနီယ (သီ. သျာ. ပီ.)] ဇာတကံ တတိယံ.

၂၄. အာဇညဇာတကံ

၂၄. ယဒါ ယဒါ ယတ္ထ ယဒါ၊ ယတ္ထ ယတ္ထ ယဒါ ယဒါ၊

အာဇညော ကုရုတေ ဝေဂံ၊ ဟာယန္တိ တတ္ထ ဝါဠဝါတိ.

အာဇညဇာတကံ စတုတ္ထံ.

၂၅. တိတ္ထဇာတကံ

၂၅. အညမညေဟိ တိတ္ထေဟိ၊ အဿံ ပါယေဟိ သာရထိ၊

အစ္စာသနဿ ပုရိသော၊ ပါယာသဿပိ တပ္ပတီတိ.

တိတ္ထဇာတကံ ပဉ္စမံ.

၂၆. မဟိဠာမုခဇာတကံ

၂၆. ပုရာဏစောရာန ဝစော နိသမ္မ၊ မဟိဠာမုခေါ ပေါထယမနွစာရီ၊

သုသညတာနဉှိ ဝစော နိသမ္မ၊ ဂဇုတ္တမော သဗ္ဗဂုဏေသု အဋ္ဌာတိ.

မဟိဠာမုခဇာတကံ ဆဋ္ဌံ.

၂၇. အဘိဏှဇာတကံ

၂၇. နာလံ ကဗဠံ ပဒါတဝေ၊ န စ ပိဏ္ဍံ န ကုသေ န ဃံသိတုံ၊

မညာမိ အဘိဏှဒဿနာ၊ နာဂေါ သ္နေဟမကာသိ [သိနေဟမကာသိ (သီ. သျာ. ပီ.)] ကုက္ကုရေတိ.

အဘိဏှဇာတကံ သတ္တမံ.

၂၈. နန္ဒိဝိသာလဇာတကံ

၂၈. မနုညမေဝ ဘာသေယျ၊ နာမနုညံ ကုဒါစနံ၊

မနုညံ ဘာသမာနဿ၊ ဂရုံ ဘာရံ ဥဒဒ္ဓရိ၊

ဓနဉ္စ နံ အလာဘေသိ၊ တေန စတ္တမနော အဟူတိ.

နန္ဒိဝိသာလဇာတကံ အဋ္ဌမံ.

၂၉. ကဏှဇာတကံ

၂၉. ယတော ယတော ဂရု ဓုရံ၊ ယတော ဂမ္ဘီရဝတ္တနီ၊

တဒါဿု ကဏှံ ယုဉ္ဇန္တိ၊ သွာဿု တံ ဝဟတေ ဓုရန္တိ.

ကဏှဇာတကံ နဝမံ.

၃၀. မုနိကဇာတကံ

၃၀. မာ မုနိကဿ ပိဟယိ၊ အာတုရန္နာနိ ဘုဉ္ဇတိ၊

အပ္ပေါဿုက္ကော ဘုသံ ခါဒ၊ ဧတံ ဒီဃာယုလက္ခဏန္တိ.

မုနိကဇာတကံ ဒသမံ.

ကုရုင်္ဂဝဂ္ဂေါ တတိယော.

တဿုဒ္ဒါနံ –

ကုရုင်္ဂဿ ကုက္ကုရဂေါဇဝရော၊ ပုန ဝါဠဝဿသိရိဝှယနော [သိရိဝယနော (သဗ္ဗတ္ထ)]၊

မဟိဠာမုခနာမနုညဝရော၊ ဝဟတေ ဓုရ မုနိကေန ဒသာတိ.

၄. ကုလာဝကဝဂ္ဂေါ

၃၁. ကုလာဝကဇာတကံ

၃၁. ကုလာဝကာ မာတလိ သိမ္ဗလိသ္မိံ၊ ဤသာမုခေန ပရိဝဇ္ဇယဿု၊

ကာမံ စဇာမ အသုရေသု ပါဏံ၊ မာ မေ ဒိဇာ ဝိက္ကုလဝါ [မာယိမေ ဒိဇာ ဝိကုလာဝါ (သီ. သျာ. ပီ.)] အဟေသုန္တိ.

ကုလာဝကဇာတကံ ပဌမံ.

၃၂. နစ္စဇာတကံ

၃၂. ရုဒံ မနုညံ ရုစိရာ စ ပိဋ္ဌိ၊ ဝေဠုရိယဝဏ္ဏူပနိဘာ [ဝဏ္ဏူပဋိဘာ (သျာ.)၊ ဝဏ္ဏသန္နိဘာ (က.)] စ ဂီဝါ၊