၂. ဝဏ္ဏာရောဟဝဂ္ဂေါ
၃၆၁. ဝဏ္ဏာရောဟဇာတကံ (၅-၂-၁)
၆၀. ဝဏ္ဏာရောဟေန ဇာတိယာ၊ ဗလနိက္ကမနေန စ၊
သုဗာဟု န မယာ သေယျော၊ သုဒါဌ ဣတိ ဘာသသိ.
၆၁. ဝဏ္ဏာရောဟေန ဇာတိယာ၊ ဗလနိက္ကမနေန စ၊
သုဒါဌော န မယာ သေယျော၊ သုဗာဟု ဣတိ ဘာသသိ.
၆၂. ဧဝံ စေ မံ ဝိဟရန္တံ၊ သုဗာဟု သမ္မ ဒုဗ္ဘသိ၊
န ဒါနာဟံ တယာ သဒ္ဓိံ၊ သံဝါသမဘိရောစယေ.
၆၃. ယော ပရေသံ ဝစနာနိ၊ သဒ္ဒဟေယျ [သဒ္ဒဟေထ (သီ. သျာ. ပီ.)] ယထာတထံ၊
ခိပ္ပံ ဘိဇ္ဇေထ မိတ္တသ္မိံ၊ ဝေရဉ္စ ပသဝေ ဗဟုံ.
၆၄. န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊
ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟီတိ.
ဝဏ္ဏာရောဟဇာတကံ ပဌမံ.
၃၆၂. သီလဝီမံသဇာတကံ (၅-၂-၂)
၆၅. သီလံ သေယျော သုတံ သေယျော၊ ဣတိ မေ သံသယော အဟု၊
သီလမေဝ သုတာ သေယျော၊ ဣတိ မေ နတ္ထိ သံသယော.
၆၆. မောဃာ ဇာတိ စ ဝဏ္ဏော စ၊ သီလမေဝ ကိရုတ္တမံ၊
သီလေန အနုပေတဿ၊ သုတေနတ္ထော န ဝိဇ္ဇတိ.
၆၇. ခတ္တိယော စ အဓမ္မဋ္ဌော၊ ဝေဿော စာဓမ္မနိဿိတော၊
တေ ပရိစ္စဇ္ဇုဘော လောကေ၊ ဥပပဇ္ဇန္တိ ဒုဂ္ဂတိံ.
၆၈. ခတ္တိယာ ဗြာဟ္မဏာ ဝေဿာ၊ သုဒ္ဒါ စဏ္ဍာလပုက္ကုသာ၊
ဣဓ ဓမ္မံ စရိတွာန၊ ဘဝန္တိ တိဒိဝေ သမာ.
၆၉. န ဝေဒါ သမ္ပရာယာယ၊ န ဇာတိ နာပိ [နောပိ (ပီ.)] ဗန္ဓဝါ၊
သကဉ္စ သီလံ သံသုဒ္ဓံ၊ သမ္ပရာယာယ သုခါယ စာတိ [သုခါဝဟန္တိ (သီ. သျာ.)].
သီလဝီမံသဇာတကံ ဒုတိယံ.
၃၆၃. ဟိရိဇာတကံ (၅-၂-၃)
၇၀. ဟိရိံ တရန္တံ ဝိဇိဂုစ္ဆမာနံ၊ တဝါဟမသ္မီ ဣတိ ဘာသမာနံ၊
သေယျာနိ ကမ္မာနိ အနာဒိယန္တံ၊ နေသော မမန္တိ ဣတိ နံ ဝိဇညာ.
၇၁. ယဉှိ ကယိရာ တဉှိ ဝဒေ၊ ယံ န ကယိရာ န တံ ဝဒေ၊
အကရောန္တံ ဘာသမာနံ၊ ပရိဇာနန္တိ ပဏ္ဍိတာ.
၇၂. န သော မိတ္တော ယော သဒါ အပ္ပမတ္တော၊ ဘေဒါသင်္ကီ ရန္ဓမေဝါနုပဿီ၊
ယသ္မိဉ္စ သေတီ ဥရသီဝ ပုတ္တော၊ သ ဝေ မိတ္တော ယော အဘေဇ္ဇော ပရေဟိ.
၇၃. ပါမောဇ္ဇကရဏံ ဌာနံ၊ ပသံသာဝဟနံ သုခံ၊
ဖလာနိသံသော ဘာဝေတိ၊ ဝဟန္တော ပေါရိသံ ဓုရံ.
၇၄. ပဝိဝေကရသံ ပိတွာ၊ ရသံ ဥပသမဿ စ၊
နိဒ္ဒရော ဟောတိ နိပ္ပါပေါ၊ ဓမ္မပ္ပီတိရသံ ပိဝန္တိ.
ဟိရိဇာတကံ တတိယံ.
၃၆၄. ခဇ္ဇောပနကဇာတကံ (၅-၂-၄)
၇၅. ကော နု သန္တမှိ ပဇ္ဇောတေ၊ အဂ္ဂိပရိယေသနံ စရံ၊
အဒ္ဒက္ခိ ရတ္တိ [ရတ္တိံ (သျာ.)] ခဇ္ဇောတံ၊ ဇာတဝေဒံ အမညထ.
၇၆. သွဿ ဂေါမယစုဏ္ဏာနိ၊ အဘိမတ္ထံ တိဏာနိ စ၊
ဝိပရီတာယ သညာယ၊ နာသက္ခိ ပဇ္ဇလေတဝေ.
၇၇. ဧဝမ္ပိ အနုပါယေန၊ အတ္ထံ န လဘတေ မိဂေါ [မူဂေါ (သျာ.)]၊
ဝိသာဏတော ဂဝံ ဒေါဟံ၊ ယတ္ထ ခီရံ န ဝိန္ဒတိ.
၇၈. ဝိဝိဓေဟိ ဥပါယေဟိ၊ အတ္ထံ ပပ္ပေါန္တိ မာဏဝါ၊
နိဂ္ဂဟေန အမိတ္တာနံ၊ မိတ္တာနံ ပဂ္ဂဟေန စ.
၇၉. သေနာမောက္ခပလာဘေန [သေနီ မောက္ခူပလာဘေန (သျာ.)]၊ ဝလ္လဘာနံ နယေန စ၊
ဇဂတိံ ဇဂတိပါလာ၊ အာဝသန္တိ ဝသုန္ဓရန္တိ.
ခဇ္ဇောပနကဇာတကံ စတုတ္ထံ.
၃၆၅. အဟိတုဏ္ဍိကဇာတကံ (၅-၂-၅)
၈၀. ဓုတ္တောမှိ သမ္မ သုမုခ၊ ဇူတေ အက္ခပရာဇိတော၊
ဟရေဟိ [သေဝေဟိ (ပီ.)] အမ္ဗပက္ကာနိ၊ ဝီရိယံ တေ ဘက္ခယာမသေ.
၈၁. အလိကံ ဝတ မံ သမ္မ၊ အဘူတေန ပသံသသိ၊
ကော တေ သုတော ဝါ ဒိဋ္ဌော ဝါ၊ သုမုခေါ နာမ မက္ကဋော.
၈၂. အဇ္ဇာပိ မေ တံ မနသိ [တေ မံ သရသိ (က.)]၊ ယံ မံ တွံ အဟိတုဏ္ဍိက၊
ဓညာပဏံ ပဝိသိတွာ၊ မတ္တော [မုတ္တော (က.)] ဆာတံ ဟနာသိ မံ.
၈၃. တာဟံ သရံ ဒုက္ခသေယျံ၊ အပိ ရဇ္ဇမ္ပိ ကာရယေ၊
နေဝါဟံ ယာစိတော ဒဇ္ဇံ၊ တထာ ဟိ ဘယတဇ္ဇိတော.
၈၄. ယဉ္စ ဇညာ ကုလေ ဇာတံ၊ ဂဗ္ဘေ တိတ္တံ အမစ္ဆရိံ၊
တေန သခိဉ္စ မိတ္တဉ္စ၊ ဓီရော သန္ဓာတုမရဟတီတိ.
အဟိတုဏ္ဍိကဇာတကံ ပဉ္စမံ.
၃၆၆. ဂုမ္ဗိယဇာတကံ (၅-၂-၆)
၈၅. မဓုဝဏ္ဏံ မဓုရသံ၊ မဓုဂန္ဓံ ဝိသံ အဟု၊
ဂုမ္ဗိယော ဃာသမေသာနော၊ အရညေ ဩဒဟီ ဝိသံ.
၈၆. မဓု ဣတိ မညမာနာ [မဓူတိ မညမာနာယ (က.)]၊ ယေ တံ ဝိသမခါဒိသုံ [ဝိသမသာယိသုံ (သီ. သျာ.)]၊
တေသံ တံ ကဋုကံ အာသိ၊ မရဏံ တေနုပါဂမုံ.
၈၇. ယေ စ ခေါ ပဋိသင်္ခါယ၊ ဝိသံ တံ ပရိဝဇ္ဇယုံ၊
တေ အာတုရေသု သုခိတာ၊ ဍယှမာနေသု နိဗ္ဗုတာ.
၈၈. ဧဝမေဝ မနုဿေသု၊ ဝိသံ ကာမာ သမောဟိတာ၊
အာမိသံ ဗန္ဓနဉ္စေတံ၊ မစ္စုဝေသော [ပစ္စုဝသော (သီ. သျာ.)] ဂုဟာသယော.
၈၉. ဧဝမေဝ ဣမေ ကာမေ၊ အာတုရာ ပရိစာရိကေ [ပရိစာရကေ (က.)]၊
ယေ သဒါ ပရိဝဇ္ဇေန္တိ၊ သင်္ဂံ လောကေ ဥပစ္စဂုန္တိ.
ဂုမ္ဗိယဇာတကံ ဆဋ္ဌံ.
၃၆၇. သာဠိယဇာတကံ (၅-၂-၇)
၉၀. ယွာယံ သာဠိယ [သာလိယ (သီ. သျာ. ပီ.)၊ သာဠိက (?)] ဆာပေါတိ၊ ကဏှသပ္ပံ အဂါဟယိ၊
တေန သပ္ပေနယံ ဒဋ္ဌော၊ ဟတော ပါပါနုသာသကော.
၉၁. အဟန္တာရ [အဟနန္တ (ပီ.)၊ အဟရန္တ (?)] မဟန္တာရံ၊ ယော နရော ဟန္တုမိစ္ဆတိ၊
ဧဝံ သော နိဟတော သေတိ၊ ယထာယံ ပုရိသော ဟတော.
၉၂. အဟန္တာရ [အဟနန္တ (သီ. သျာ. ပီ.)၊ အဟရန္တ (?)] မဃာတေန္တံ၊ ယော နရော ဟန္တုမိစ္ဆတိ၊
ဧဝံ သော နိဟတော သေတိ၊ ယထာယံ ပုရိသော ဟတော.
၉၃. ယထာ ပံသုမုဋ္ဌိံ ပုရိသော၊ ပဋိဝါတံ ပဋိက္ခိပေ၊
တမေဝ သော ရဇော ဟန္တိ၊ တထာယံ ပုရိသော ဟတော.
၉၄. ယော အပ္ပဒုဋ္ဌဿ နရဿ ဒုဿတိ၊ သုဒ္ဓဿ ပေါသဿ အနင်္ဂဏဿ၊
တမေဝ ဗာလံ ပစ္စေတိ ပါပံ၊ သုခုမော ရဇော ပဋိဝါတံဝ ခိတ္တောတိ.
သာဠိယဇာတကံ သတ္တမံ.
၃၆၈. တစသာရဇာတကံ (၅-၂-၈)
၉၅. အမိတ္တဟတ္ထတ္ထဂတာ [ဟတ္ထတ္တဂတာ (ကတ္ထစိ၊ သီ. နိယျ)]၊ တစသာရသမပ္ပိတာ၊
ပသန္နမုခဝဏ္ဏာတ္ထ၊ ကသ္မာ တုမှေ န သောစထ.
၉၆. န သောစနာယ ပရိဒေဝနာယ၊ အတ္ထောဝ လဗ္ဘော [အတ္ထော စ လဗ္ဘာ (သီ. သျာ.)၊ အတ္ထောဓ လဗ္ဘာ (အ. နိ. ၅.၄၈)] အပိ အပ္ပကောပိ၊
သောစန္တမေနံ ဒုခိတံ ဝိဒိတွာ၊ ပစ္စတ္ထိကာ အတ္တမနာ ဘဝန္တိ.
၉၇. ယတော စ ခေါ ပဏ္ဍိတော အာပဒါသု၊ န ဝေဓတီ အတ္ထဝိနိစ္ဆယညူ၊
ပစ္စတ္ထိကာဿ [ပစ္စတ္ထိကာ တေ (က.)] ဒုခိတာ ဘဝန္တိ၊ ဒိသွာ မုခံ အဝိကာရံ ပုရာဏံ.
၉၈. ဇပ္ပေန မန္တေန သုဘာသိတေန၊ အနုပ္ပဒါနေန ပဝေဏိယာ ဝါ၊
ယထာ ယထာ ယတ္ထ လဘေထ အတ္ထံ၊ တထာ တထာ တတ္ထ ပရက္ကမေယျ.
၉၉. ယတော စ ဇာနေယျ အလဗ္ဘနေယျော၊ မယာ ဝ [မယာ ဝါ (သျာ. က.)] အညေန ဝါ ဧသ အတ္ထော၊
အသောစမာနော အဓိဝါသယေယျ၊ ကမ္မံ ဒဠှံ ကိန္တိ ကရောမိ ဒါနီတိ.
တစသာရဇာတကံ အဋ္ဌမံ.
၃၆၉. မိတ္တဝိန္ဒကဇာတကံ (၅-၂-၉)
၁၀၀. ကျာဟံ ဒေဝါနမကရံ၊ ကိံ ပါပံ ပကတံ မယာ၊
ယံ မေ သိရသ္မိံ ဩဟစ္စ [ဥဟစ္စ (က.)၊ ဥဟစ္စ (ပီ.)]၊ စက္ကံ ဘမတိ မတ္ထကေ.
၁၀၁. အတိက္ကမ္မ ရမဏကံ၊ သဒါမတ္တဉ္စ ဒူဘကံ၊
ဗြဟ္မတ္တရဉ္စ ပါသာဒံ၊ ကေနတ္ထေန ဣဓာဂတော.
၁၀၂. ဣတော ဗဟုတရာ ဘောဂါ၊ အတြ မညေ ဘဝိဿရေ၊
ဣတိ ဧတာယ သညာယ၊ ပဿ မံ ဗျသနံ ဂတံ.
၁၀၃. စတုဗ္ဘိ အဋ္ဌဇ္ဈဂမာ၊ အဋ္ဌာဟိပိ စ [အဋ္ဌာဟိ စာပိ (သီ. သျာ.)၊ အဋ္ဌာဘိ စာပိ (က.)] သောဠသ၊
သောဠသာဟိ စ ဗာတ္တိံသ၊ အတြိစ္ဆံ စက္ကမာသဒေါ၊
ဣစ္ဆာဟတဿ ပေါသဿ၊ စက္ကံ ဘမတိ မတ္ထကေ.
၁၀၄. ဥပရိဝိသာလာ ဒုပ္ပူရာ၊ ဣစ္ဆာ ဝိသဋဂါမိနီ [ဥပရိ ဝိသာလံ ဒုပ္ပူရံ၊ ဣစ္ဆာဝိသဒဂါမိနီ (သီ.)]၊
ယေ စ တံ အနုဂိဇ္ဈန္တိ၊ တေ ဟောန္တိ စက္ကဓာရိနောတိ.
မိတ္တဝိန္ဒကဇာတကံ နဝမံ.
၃၇၀. ပလာသဇာတကံ (၅-၂-၁၀)
၁၀၅. ဟံသော ပလာသမဝစ၊ နိဂြောဓော သမ္မ ဇာယတိ၊
အင်္ကသ္မိံ [အင်္ဂသ္မိံ (က.)] တေ နိသိန္နောဝ၊ သော တေ မမ္မာနိ ဆေစ္ဆတိ [ဆိဇ္ဇတိ (က.)].
၁၀၆. ဝဍ္ဎတာမေဝ [ဝဒ္ဓိတမေဝ (က.)] နိဂြောဓော၊ ပတိဋ္ဌဿ ဘဝါမဟံ၊
ယထာ ပိတာ စ မာတာ စ [ပိတာ ဝါ မာတာ ဝါ (ပီ.)၊ မာတာ ဝါ ပိတာ ဝါ (က.)]၊ ဧဝံ မေ သော ဘဝိဿတိ.
၁၀၇. ယံ တွံ အင်္ကသ္မိံ ဝဍ္ဎေသိ၊ ခီရရုက္ခံ ဘယာနကံ၊
အာမန္တ ခေါ တံ ဂစ္ဆာမ၊ ဝုဍ္ဎိ မဿ န ရုစ္စတိ.
၁၀၈. ဣဒါနိ ခေါ မံ ဘာယေတိ၊ မဟာနေရုနိဒဿနံ၊
ဟံသဿ အနဘိညာယ၊ မဟာ မေ ဘယမာဂတံ.
၁၀၉. န တဿ ဝုဍ္ဎိ ကုသလပ္ပသတ္ထာ၊ ယော ဝဍ္ဎမာနော ဃသတေ ပတိဋ္ဌံ၊
တဿူပရောဓံ ပရိသင်္ကမာနော၊ ပတာရယီ မူလဝဓာယ ဓီရောတိ.
ပလာသဇာတကံ ဒသမံ.
ဝဏ္ဏာရောဟဝဂ္ဂေါ ဒုတိယော [ဣမဿုဒ္ဒါနံ တတိယဝဂ္ဂပရိယောသာနေ ဘဝိဿတိ].