၃၆၈. တစသာရဇာတကံ (၅-၂-၈)

၉၅. အမိတ္တဟတ္ထတ္ထဂတာ [ဟတ္ထတ္တဂတာ (ကတ္ထစိ၊ သီ. နိယျ)]၊ တစသာရသမပ္ပိတာ၊

ပသန္နမုခဝဏ္ဏာတ္ထ၊ ကသ္မာ တုမှေ န သောစထ.

၉၆. န သောစနာယ ပရိဒေဝနာယ၊ အတ္ထောဝ လဗ္ဘော [အတ္ထော စ လဗ္ဘာ (သီ. သျာ.)၊ အတ္ထောဓ လဗ္ဘာ (အ. နိ. ၅.၄၈)] အပိ အပ္ပကောပိ၊

သောစန္တမေနံ ဒုခိတံ ဝိဒိတွာ၊ ပစ္စတ္ထိကာ အတ္တမနာ ဘဝန္တိ.

၉၇. ယတော စ ခေါ ပဏ္ဍိတော အာပဒါသု၊ န ဝေဓတီ အတ္ထဝိနိစ္ဆယညူ၊

ပစ္စတ္ထိကာဿ [ပစ္စတ္ထိကာ တေ (က.)] ဒုခိတာ ဘဝန္တိ၊ ဒိသွာ မုခံ အဝိကာရံ ပုရာဏံ.

၉၈. ဇပ္ပေန မန္တေန သုဘာသိတေန၊ အနုပ္ပဒါနေန ပဝေဏိယာ ဝါ၊

ယထာ ယထာ ယတ္ထ လဘေထ အတ္ထံ၊ တထာ တထာ တတ္ထ ပရက္ကမေယျ.

၉၉. ယတော စ ဇာနေယျ အလဗ္ဘနေယျော၊ မယာ ဝ [မယာ ဝါ (သျာ. က.)] အညေန ဝါ ဧသ အတ္ထော၊

အသောစမာနော အဓိဝါသယေယျ၊ ကမ္မံ ဒဠှံ ကိန္တိ ကရောမိ ဒါနီတိ.

တစသာရဇာတကံ အဋ္ဌမံ.