၃၆၄. ခဇ္ဇောပနကဇာတကံ (၅-၂-၄)

၇၅. ကော နု သန္တမှိ ပဇ္ဇောတေ၊ အဂ္ဂိပရိယေသနံ စရံ၊

အဒ္ဒက္ခိ ရတ္တိ [ရတ္တိံ (သျာ.)] ခဇ္ဇောတံ၊ ဇာတဝေဒံ အမညထ.

၇၆. သွဿ ဂေါမယစုဏ္ဏာနိ၊ အဘိမတ္ထံ တိဏာနိ စ၊

ဝိပရီတာယ သညာယ၊ နာသက္ခိ ပဇ္ဇလေတဝေ.

၇၇. ဧဝမ္ပိ အနုပါယေန၊ အတ္ထံ န လဘတေ မိဂေါ [မူဂေါ (သျာ.)]၊

ဝိသာဏတော ဂဝံ ဒေါဟံ၊ ယတ္ထ ခီရံ န ဝိန္ဒတိ.

၇၈. ဝိဝိဓေဟိ ဥပါယေဟိ၊ အတ္ထံ ပပ္ပေါန္တိ မာဏဝါ၊

နိဂ္ဂဟေန အမိတ္တာနံ၊ မိတ္တာနံ ပဂ္ဂဟေန စ.

၇၉. သေနာမောက္ခပလာဘေန [သေနီ မောက္ခူပလာဘေန (သျာ.)]၊ ဝလ္လဘာနံ နယေန စ၊

ဇဂတိံ ဇဂတိပါလာ၊ အာဝသန္တိ ဝသုန္ဓရန္တိ.

ခဇ္ဇောပနကဇာတကံ စတုတ္ထံ.