၃၆၅. အဟိတုဏ္ဍိကဇာတကံ (၅-၂-၅)

၈၀. ဓုတ္တောမှိ သမ္မ သုမုခ၊ ဇူတေ အက္ခပရာဇိတော၊

ဟရေဟိ [သေဝေဟိ (ပီ.)] အမ္ဗပက္ကာနိ၊ ဝီရိယံ တေ ဘက္ခယာမသေ.

၈၁. အလိကံ ဝတ မံ သမ္မ၊ အဘူတေန ပသံသသိ၊

ကော တေ သုတော ဝါ ဒိဋ္ဌော ဝါ၊ သုမုခေါ နာမ မက္ကဋော.

၈၂. အဇ္ဇာပိ မေ တံ မနသိ [တေ မံ သရသိ (က.)]၊ ယံ မံ တွံ အဟိတုဏ္ဍိက၊

ဓညာပဏံ ပဝိသိတွာ၊ မတ္တော [မုတ္တော (က.)] ဆာတံ ဟနာသိ မံ.

၈၃. တာဟံ သရံ ဒုက္ခသေယျံ၊ အပိ ရဇ္ဇမ္ပိ ကာရယေ၊

နေဝါဟံ ယာစိတော ဒဇ္ဇံ၊ တထာ ဟိ ဘယတဇ္ဇိတော.

၈၄. ယဉ္စ ဇညာ ကုလေ ဇာတံ၊ ဂဗ္ဘေ တိတ္တံ အမစ္ဆရိံ၊

တေန သခိဉ္စ မိတ္တဉ္စ၊ ဓီရော သန္ဓာတုမရဟတီတိ.

အဟိတုဏ္ဍိကဇာတကံ ပဉ္စမံ.