၂၉၀. သီလဝီမံသကဇာတကံ (၃-၄-၁၀)

၁၁၈. သီလံ ကိရေဝ ကလျာဏံ၊ သီလံ လောကေ အနုတ္တရံ၊

ပဿ ဃောရဝိသော နာဂေါ၊ သီလဝါတိ န ဟညတိ.

၁၁၉. သောဟံ သီလံ သမာဒိဿံ၊ လောကေ အနုမတံ သိဝံ၊

အရိယဝုတ္တိသမာစာရော၊ ယေန ဝုစ္စတိ သီလဝါ.

၁၂၀. ဉာတီနဉ္စ ပိယော ဟောတိ၊ မိတ္တေသု စ ဝိရောစတိ၊

ကာယဿ ဘေဒါ သုဂတိံ၊ ဥပပဇ္ဇတိ သီလဝါတိ.

သီလဝီမံသကဇာတကံ ဒသမံ.

အဗ္ဘန္တရဝဂ္ဂေါ စတုတ္ထော.

တဿုဒ္ဒါနံ –

ဒုမ ကံသဝရုတ္တမဗျဂ္ဃမိဂါ၊ မဏယော မဏိ သာလုကမဝှယနော၊

အနုသာသနိယောပိ စ မစ္ဆဝရော၊ မဏိကုဏ္ဍလကေန ကိရေန ဒသာတိ.