၃. တိကနိပါတော
၁. သင်္ကပ္ပဝဂ္ဂေါ
၂၅၁. သင်္ကပ္ပရာဂဇာတကံ (၃-၁-၁)
၁. သင်္ကပ္ပရာဂဓောတေန၊ ဝိတက္ကနိသိတေန စ၊
နာလင်္ကတေန ဘဒြေန [နေဝါလင်္ကတဘဒြေန (သျာ.)]၊ ဥသုကာရာကတေန စ [န ဥသုကာရကတေန စ (သီ. သျာ. ပီ.)].
၂. န ကဏ္ဏာယတမုတ္တေန၊ နာပိ မောရူပသေဝိနာ၊
တေနမှိ ဟဒယေ ဝိဒ္ဓေါ၊ သဗ္ဗင်္ဂပရိဒါဟိနာ.
၃. အာဝေဓဉ္စ န ပဿာမိ၊ ယတော ရုဟိရမဿဝေ၊
ယာဝ အယောနိသော စိတ္တံ၊ သယံ မေ ဒုက္ခမာဘတန္တိ.
သင်္ကပ္ပရာဂဇာတကံ ပဌမံ.
၂၅၂. တိလမုဋ္ဌိဇာတကံ (၃-၁-၂)
၄. အဇ္ဇာပိ မေ တံ မနသိ [သရသိ (က.)]၊ ယံ မံ တွံ တိလမုဋ္ဌိယာ၊
ဗာဟာယ မံ ဂဟေတွာန၊ လဋ္ဌိယာ အနုတာဠယိ.
၅. နနု ဇီဝိတေ န ရမသိ၊ ယေနာသိ ဗြာဟ္မဏာဂတော၊
ယံ မံ ဗာဟာ ဂဟေတွာန၊ တိက္ခတ္တုံ အနုတာဠယိ.
၆. အရိယော အနရိယံ ကုဗ္ဗန္တံ [ကုဗ္ဗာနံ (သီ. ပီ.)၊ ကုဗ္ဗံ (သျာ.)]၊ ယော ဒဏ္ဍေန နိသေဓတိ၊
သာသနံ တံ န တံ ဝေရံ၊ ဣတိ နံ ပဏ္ဍိတာ ဝိဒူတိ.
တိလမုဋ္ဌိဇာတကံ ဒုတိယံ.
၂၅၃. မဏိကဏ္ဌဇာတကံ (၃-၁-၃)
၇. မမန္နပါနံ ဝိပုလံ ဥဠာရံ၊ ဥပ္ပဇ္ဇတီမဿ မဏိဿ ဟေတု၊
တံ တေ န ဒဿံ အတိယာစကောသိ၊ န စာပိ တေ အဿမမာဂမိဿံ.
၈. သုသူ ယထာ သက္ခရဓောတပါဏီ၊ တာသေသိ မံ သေလံ ယာစမာနော၊
တံ တေ န ဒဿံ အတိယာစကောသိ၊ န စာပိ တေ အဿမမာဂမိဿံ.
၉. န တံ ယာစေ ယဿ ပိယံ ဇိဂီသေ [ဇိဂိံသေ (သီ. သျာ. ပီ.)]၊ ဒေဿော ဟောတိ အတိယာစနာယ၊
နာဂေါ မဏိံ ယာစိတော ဗြာဟ္မဏေန၊ အဒဿနံယေဝ တဒဇ္ဈဂမာတိ.
မဏိကဏ္ဌဇာတကံ တတိယံ.
၂၅၄. ကုဏ္ဍကကုစ္ဆိသိန္ဓဝဇာတကံ (၃-၁-၄)
၁၀. ဘုတွာ တိဏပရိဃာသံ၊ ဘုတွာ အာစာမကုဏ္ဍကံ၊
ဧတံ တေ ဘောဇနံ အာသိ၊ ကသ္မာ ဒါနိ န ဘုဉ္ဇသိ.
၁၁. ယတ္ထ ပေါသံ န ဇာနန္တိ၊ ဇာတိယာ ဝိနယေန ဝါ၊
ဗဟုံ [ပဟူ (သီ. ပီ.)၊ ပဟုံ (သျာ. က.)] တတ္ထ မဟာဗြမှေ၊ အပိ အာစာမကုဏ္ဍကံ.
၁၂. တွဉ္စ ခေါ မံ ပဇာနာသိ၊ ယာဒိသာယံ ဟယုတ္တမော၊
ဇာနန္တော ဇာနမာဂမ္မ၊ န တေ ဘက္ခာမိ ကုဏ္ဍကန္တိ.
ကုဏ္ဍကကုစ္ဆိသိန္ဓဝဇာတကံ စတုတ္ထံ.
၂၅၅. သုကဇာတကံ (၃-၁-၅)
၁၃. ယာဝ သော မတ္တမညာသိ၊ ဘောဇနသ္မိံ ဝိဟင်္ဂမော၊
တာဝ အဒ္ဓါနမာပါဒိ၊ မာတရဉ္စ အပေါသယိ.
၁၄. ယတော စ ခေါ ဗဟုတရံ၊ ဘောဇနံ အဇ္ဈဝါဟရိ [အဇ္ဈုပါဟရိ (သီ. ပီ.)]၊
တတော တတ္ထေဝ သံသီဒိ၊ အမတ္တညူ ဟိ သော အဟု.
၁၅. တသ္မာ မတ္တညုတာ သာဓု၊ ဘောဇနသ္မိံ အဂိဒ္ဓတာ [အဂိဒ္ဓိတာ (သျာ. က.)]၊
အမတ္တညူ ဟိ သီဒန္တိ၊ မတ္တညူ စ န သီဒရေတိ.
သုကဇာတကံ ပဉ္စမံ.
၂၅၆. ဇရူဒပါနဇာတကံ (၃-၁-၆)
၁၆. ဇရူဒပါနံ ခဏမာနာ၊ ဝါဏိဇာ ဥဒကတ္ထိကာ၊
အဇ္ဈဂမုံ အယသံ လောဟံ [အဇ္ဈဂံသု အယောလောဟံ (သီ. သျာ. ပီ.)]၊ တိပုသီသဉ္စ ဝါဏိဇာ၊
ရဇတံ ဇာတရူပဉ္စ၊ မုတ္တာ ဝေဠူရိယာ ဗဟူ.
၁၇. တေ စ တေန အသန္တုဋ္ဌာ၊ ဘိယျော ဘိယျော အခါဏိသုံ၊
တေ တတ္ထာသီဝိသော [တတ္ထ အာသီဝိသော (က.)၊ တတ္ထပါသီဝိသော (သျာ.)] ဃောရော၊ တေဇဿီ တေဇသာ ဟနိ.
၁၈. တသ္မာ ခဏေ နာတိခဏေ၊ အတိခါတံ [အတိခဏံ (က.)] ဟိ ပါပကံ၊
ခါတေန စ [ခဏေန စ (က.)၊ ခဏနေန (သျာ.)] ဓနံ လဒ္ဓံ၊ အတိခါတေန [အတိခဏေန (က.)] နာသိတန္တိ.
ဇရူဒပါနဇာတကံ ဆဋ္ဌံ.
၂၅၇. ဂါမဏိစန္ဒဇာတကံ (၃-၁-၇)
၁၉. နာယံ ဃရာနံ ကုသလော၊ လောလော အယံ ဝလီမုခေါ၊
ကတံ ကတံ ခေါ ဒူသေယျ၊ ဧဝံဓမ္မမိဒံ ကုလံ.
၂၀. နယိဒံ စိတ္တဝတော လောမံ၊ နာယံ အဿာသိကော မိဂေါ၊
သိဋ္ဌံ [သတ္ထံ (သီ. သျာ. ပီ.)] မေ ဇနသန္ဓေန၊ နာယံ ကိဉ္စိ ဝိဇာနတိ.
၂၁. န မာတရံ ပိတရံ ဝါ၊ ဘာတရံ ဘဂိနိံ သကံ၊
ဘရေယျ တာဒိသော ပေါသော၊ သိဋ္ဌံ ဒသရထေန မေတိ.
ဂါမဏိစန္ဒ [ဂါမဏိစဏ္ဍ (သီ. ပီ.)] ဇာတကံ သတ္တမံ.
၂၅၈. မန္ဓာတုဇာတကံ (၃-၁-၈)
၂၂. ယာဝတာ စန္ဒိမသူရိယာ၊ ပရိဟရန္တိ ဒိသာ ဘန္တိ ဝိရောစနာ [ဝိရောစမာနာ (က.)]၊
သဗ္ဗေဝ ဒါသာ မန္ဓာတု၊ ယေ ပါဏာ ပထဝိဿိတာ [ပဌဝိနိဿိတာ (သီ. ပီ.)၊ ပဌဝိဿိတာ (သျာ.)].
၂၃. န ကဟာပဏဝဿေန၊ တိတ္တိ ကာမေသု ဝိဇ္ဇတိ၊
အပ္ပဿာဒါ ဒုခါ ကာမာ၊ ဣတိ ဝိညာယ ပဏ္ဍိတော.
၂၄. အပိ ဒိဗ္ဗေသု ကာမေသု၊ ရတိံ သော နာဓိဂစ္ဆတိ၊
တဏှက္ခယရတော ဟောတိ၊ သမ္မာသမ္ဗုဒ္ဓသာဝကောတိ.
မန္ဓာတုဇာတကံ အဋ္ဌမံ.
၂၅၉. တိရီဋဝစ္ဆဇာတကံ (၃-၁-၉)
၂၅. နယိမဿ ဝိဇ္ဇာမယမတ္ထိ ကိဉ္စိ၊ န ဗန္ဓဝေါ နော ပန တေ သဟာယော၊
အထ ကေန ဝဏ္ဏေန တိရီဋဝစ္ဆော [တိရီဋိဝစ္ဆော (သျာ. က.)]၊ တေဒဏ္ဍိကော ဘုဉ္ဇတိ အဂ္ဂပိဏ္ဍံ.
၂၆. အာပါသု [အာဝါသု (က.)] မေ ယုဒ္ဓပရာဇိတဿ၊ ဧကဿ ကတွာ ဝိဝနသ္မိ ဃောရေ၊
ပသာရယီ ကိစ္ဆဂတဿ ပါဏိံ၊ တေနူဒတာရိံ ဒုခသံပရေတော.
၂၇. ဧတဿ ကိစ္စေန ဣဓာနုပတ္တော၊ ဝေသာယိနော ဝိသယာ ဇီဝလောကေ၊
လာဘာရဟော တာတ တိရီဋဝစ္ဆော၊ ဒေထဿ ဘောဂံ ယဇထဉ္စ [ယဇတဉ္စ (သီ. ပီ.)၊ ယဇိတဉ္စ (သျာ.)] ယညန္တိ.
တိရီဋဝစ္ဆဇာတကံ နဝမံ.
၂၆၀. ဒူတဇာတကံ (၃-၁-၁၀)
၂၈. ယဿတ္ထာ ဒူရမာယန္တိ၊ အမိတ္တမပိ ယာစိတုံ၊
တဿူဒရဿဟံ ဒူတော၊ မာ မေ ကုဇ္ဈ [ကုဇ္ဈိ (သီ. ပီ.)] ရထေသဘ.
၂၉. ယဿ ဒိဝါ စ ရတ္တော စ၊ ဝသမာယန္တိ မာဏဝါ၊
တဿူဒရဿဟံ ဒူတော၊ မာ မေ ကုဇ္ဈ [ကုဇ္ဈိ (သီ. ပီ.)] ရထေသဘ.
၃၀. ဒဒါမိ တေ ဗြာဟ္မဏ ရောဟိဏီနံ၊ ဂဝံ သဟဿံ သဟ ပုင်္ဂဝေန၊
ဒူတော ဟိ ဒူတဿ ကထံ န ဒဇ္ဇံ၊ မယမ္ပိ တဿေဝ ဘဝါမ ဒူတာတိ.
ဒူတဇာတကံ ဒသမံ.
သင်္ကပ္ပဝဂ္ဂေါ ပဌမော.
တဿုဒ္ဒါနံ –
ဥသုကာရဝရော တိလမုဋ္ဌိ မဏိ၊ ဟယရာဇ ဝိဟင်္ဂမ အာသိဝိသော၊
ဇနသန္ဓ ကဟာပဏဝဿ ပုန၊ တိရိဋံ ပုန ဒူတဝရေန ဒသာတိ.
၂. ပဒုမဝဂ္ဂေါ
၂၆၁. ပဒုမဇာတကံ (၃-၂-၁)
၃၁. ယထာ ကေသာ စ မဿူ စ၊ ဆိန္နံ ဆိန္နံ ဝိရူဟတိ၊
ဧဝံ ရူဟတု တေ နာသာ၊ ပဒုမံ ဒေဟိ ယာစိတော.
၃၂. ယထာ သာရဒိကံ ဗီဇံ၊ ခေတ္တေ ဝုတ္တံ ဝိရူဟတိ၊
ဧဝံ ရူဟတု တေ နာသာ၊ ပဒုမံ ဒေဟိ ယာစိတော.
၃၃. ဥဘောပိ ပလပန္တေတေ [ဝိလပန္တေတေ (သျာ. က.)]၊ အပိ ပဒ္မာနိ ဒဿတိ၊
ဝဇ္ဇုံ ဝါ တေ န ဝါ ဝဇ္ဇုံ၊ နတ္ထိ နာသာယ ရူဟနာ၊
ဒေဟိ သမ္မ ပဒုမာနိ၊ အဟံ ယာစာမိ ယာစိတောတိ.
ပဒုမဇာတကံ ပဌမံ.
၂၆၂. မုဒုပါဏိဇာတကံ (၃-၂-၂)
၃၄. ပါဏိ စေ မုဒုကော စဿ၊ နာဂေါ စဿ သုကာရိတော၊
အန္ဓကာရော စ ဝဿေယျ၊ အထ နူန တဒါ သိယာ.
၃၅. အနလာ မုဒုသမ္ဘာသာ၊ ဒုပ္ပူရာ တာ [ဒုပ္ပူရတ္တာ (က.)] နဒီသမာ၊
သီဒန္တိ နံ ဝိဒိတွာန၊ အာရကာ ပရိဝဇ္ဇယေ.
၃၆. ယံ ဧတာ ဥပသေဝန္တိ၊ ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ၊ ခိပ္ပံ အနုဒဟန္တိ နန္တိ.
မုဒုပါဏိဇာတကံ ဒုတိယံ.
၂၆၃. စူဠပလောဘနဇာတကံ (၃-၂-၃)
၃၇. အဘိဇ္ဇမာနေ ဝါရိသ္မိံ၊ သယံ [အယံ (က.)] အာဂမ္မ ဣဒ္ဓိယာ၊
မိဿီဘာဝိတ္ထိယာ ဂန္တွာ၊ သံသီဒသိ [သံသီဒတိ (က.)] မဟဏ္ဏဝေ.
၃၈. အာဝဋ္ဋနီ မဟာမာယာ၊ ဗြဟ္မစရိယဝိကောပနာ၊
သီဒန္တိ နံ ဝိဒိတွာန၊ အာရကာ ပရိဝဇ္ဇယေ.
၃၉. ယံ ဧတာ ဥပသေဝန္တိ၊ ဆန္ဒသာ ဝါ ဓနေန ဝါ၊
ဇာတဝေဒေါဝ သံ ဌာနံ၊ ခိပ္ပံ အနုဒဟန္တိ နန္တိ.
စူဠပလောဘန [စုလ္လပလောဘန (သီ. သျာ. ပီ.)] ဇာတကံ တတိယံ.
၂၆၄. မဟာပနာဒဇာတကံ (၃-၂-၄)
၄၀. ပနာဒေါ နာမ သော ရာဇာ၊ ယဿ ယူပေါ သုဝဏ္ဏယော၊
တိရိယံ သောဠသုဗ္ဗေဓော [သောဠသပဗ္ဗေဓော (သီ. ပီ.)]၊ ဥဒ္ဓမာဟု [ဥစ္စမာဟု (သီ. သျာ. ပီ.)] သဟဿဓာ.
၄၁. သဟဿကဏ္ဍော သတဂေဏ္ဍု [သတဘေဒေါ (သီ. ပီ.)၊ သတဘေဏ္ဍု (သီ. နိဿယ)]၊ ဓဇာသု ဟရိတာမယော၊
အနစ္စုံ တတ္ထ ဂန္ဓဗ္ဗာ၊ ဆ သဟဿာနိ သတ္တဓာ.
၄၂. ဧဝမေတံ [ဧဝမေဝ (က.)] တဒါ အာသိ၊ ယထာ ဘာသသိ ဘဒ္ဒဇိ၊
သက္ကော အဟံ တဒါ အာသိံ၊ ဝေယျာဝစ္စကရော တဝါတိ.
မဟာပနာဒဇာတကံ စတုတ္ထံ.
၂၆၅. ခုရပ္ပဇာတကံ (၃-၂-၅)
၄၃. ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ၊ ကသ္မာ နု တေ နာဟု ဆမ္ဘိတတ္တံ.
၄၄. ဒိသွာ ခုရပ္ပေ ဓနုဝေဂနုန္နေ၊ ခဂ္ဂေ ဂဟီတေ တိခိဏေ တေလဓောတေ၊
တသ္မိံ ဘယသ္မိံ မရဏေ ဝိယူဠှေ၊ ဝေဒံ အလတ္ထံ ဝိပုလံ ဥဠာရံ.
၄၅. သော ဝေဒဇာတော အဇ္ဈဘဝိံ အမိတ္တေ၊ ပုဗ္ဗေဝ မေ ဇီဝိတမာသိ စတ္တံ၊
န ဟိ ဇီဝိတေ အာလယံ ကုဗ္ဗမာနော၊ သူရော ကယိရာ သူရကိစ္စံ ကဒါစီတိ.
ခုရပ္ပဇာတကံ ပဉ္စမံ.
၂၆၆. ဝါတဂ္ဂသိန္ဓဝဇာတကံ (၃-၂-၆)
၄၆. ယေနာသိ ကိသိယာ ပဏ္ဍု၊ ယေန ဘတ္တံ န ရုစ္စတိ၊
အယံ သော အာဂတော ဘတ္တာ [တာတော (သီ. သျာ. ပီ.)]၊ ကသ္မာ ဒါနိ ပလာယသိ.
၄၇. သစေ [န ခေါ (သျာ. က.)] ပနာဒိကေနေဝ၊ သန္ထဝေါ နာမ ဇာယတိ၊
ယသော ဟာယတိ ဣတ္ထီနံ၊ တသ္မာ တာတ ပလာယဟံ [ပလာယိဟံ (သျာ.)၊ ပလာယိတံ (က.)].
၄၈. ယဿဿိနံ ကုလေ ဇာတံ၊ အာဂတံ ယာ န ဣစ္ဆတိ၊
သောစတိ စိရရတ္တာယ၊ ဝါတဂ္ဂမိဝ ဘဒ္ဒလီတိ [ကုန္ဒလီတိ (သီ. ပီ.)၊ ဂဒြဘီတိ (သျာ.)].
ဝါတဂ္ဂသိန္ဓဝဇာတကံ ဆဋ္ဌံ.
၂၆၇. ကက္ကဋကဇာတကံ (၃-၂-၇)
၄၉. သိင်္ဂီမိဂေါ အာယတစက္ခုနေတ္တော၊ အဋ္ဌိတ္တစော ဝါရိသယော အလောမော၊
တေနာဘိဘူတော ကပဏံ ရုဒါမိ၊ မာ ဟေဝ မံ ပါဏသမံ ဇဟေယျ [ဇဟေယျာ (ပီ.) ဇဟာ’ယျေ (?)].
၅၀. အယျ န တံ ဇဟိဿာမိ၊ ကုဉ္ဇရံ သဋ္ဌိဟာယနံ [ကုဉ္ဇရ သဋ္ဌိဟာယန (သီ. ပီ.)]၊
ပထဗျာ စာတုရန္တာယ၊ သုပ္ပိယော ဟောသိ မေ တုဝံ.
၅၁. ယေ ကုဠီရာ သမုဒ္ဒသ္မိံ၊ ဂင်္ဂါယ ယမုနာယ [နမ္မဒါယ (သီ. ပီ.)] စ၊
တေသံ တွံ ဝါရိဇော သေဋ္ဌော၊ မုဉ္စ ရောဒန္တိယာ ပတိန္တိ.
ကက္ကဋက [ကုဠီရ (က.)] ဇာတကံ သတ္တမံ.
၂၆၈. အာရာမဒူသကဇာတကံ (၃-၂-၈)
၅၂. ယော ဝေ သဗ္ဗသမေတာနံ၊ အဟုဝါ သေဋ္ဌသမ္မတော၊
တဿာယံ ဧဒိသီ ပညာ၊ ကိမေဝ ဣတရာ ပဇာ.
၅၃. ဧဝမေဝ တုဝံ ဗြဟ္မေ၊ အနညာယ ဝိနိန္ဒသိ၊
ကထံ မူလံ အဒိသွာန [ကထံဟိ မူလံ အဒိတွာ (သျာ. ပီ.)]၊ ရုက္ခံ ဇညာ ပတိဋ္ဌိတံ.