၅. ကုမ္ဘဝဂ္ဂေါ
၂၉၁. သုရာဃဋဇာတကံ (၂-၅-၁)
၁၂၁. သဗ္ဗကာမဒဒံ ကုမ္ဘံ၊ ကုဋံ လဒ္ဓါန ဓုတ္တကော၊
ယာဝ နံ အနုပါလေတိ၊ တာဝ သော သုခမေဓတိ.
၁၂၂. ယဒါ မတ္တော စ ဒိတ္တော စ၊ ပမာဒါ ကုမ္ဘမဗ္ဘိဒါ၊
တဒါ နဂ္ဂေါ စ ပေါတ္ထော စ၊ ပစ္ဆာ ဗာလော ဝိဟညတိ.
၁၂၃. ဧဝမေဝ ယော ဓနံ လဒ္ဓါ၊ ပမတ္တော [အမတ္တာ (သီ.)၊ အမတ္တော (ပီ.)] ပရိဘုဉ္ဇတိ၊
ပစ္ဆာ တပ္ပတိ ဒုမ္မေဓော၊ ကုဋံ ဘိတွာဝ [ကုဋံ ဘိန္နောဝ (သီ. ပီ.)၊ ကုဋဘိန္နောဝ (?)] ဓုတ္တကောတိ.
သုရာဃဋ [ဘဒြဃဋ (သီ. ပီ.)၊ ဘဒြဃဋဘေဒက (သျာ.)] ဇာတကံ ပဌမံ.
၂၉၂. သုပတ္တဇာတကံ (၃-၅-၂)
၁၂၄. ဗာရာဏသျံ [ဗာရာဏဿံ (သီ. ပီ.)] မဟာရာဇ၊ ကာကရာဇာ နိဝါသကော [နိဝါသိကော (သီ. ပီ.)]၊
အသီတိယာ သဟဿေဟိ၊ သုပတ္တော ပရိဝါရိတော.
၁၂၅. တဿ ဒေါဟဠိနီ ဘရိယာ၊ သုဖဿာ ဘက္ခိတုမိစ္ဆတိ [မစ္ဆမိစ္ဆတိ (သီ. ပီ.)]၊
ရညော မဟာနသေ ပက္ကံ၊ ပစ္စဂ္ဃံ ရာဇဘောဇနံ.
၁၂၆. တေသာဟံ ပဟိတော ဒူတော၊ ရညော စမှိ ဣဓာဂတော၊
ဘတ္တု အပစိတိံ ကုမ္မိ၊ နာသာယမကရံ [မကရိံ (သီ. နိဿယ)] ဝဏန္တိ.
သုပတ္တဇာတကံ ဒုတိယံ.
၂၉၃. ကာယနိဗ္ဗိန္ဒဇာတကံ (၃-၅-၃)
၁၂၇. ဖုဋ္ဌဿ မေ အညတရေန ဗျာဓိနာ၊ ရောဂေန ဗာဠှံ ဒုခိတဿ ရုပ္ပတော၊
ပရိသုဿတိ ခိပ္ပမိဒံ ကဠေဝရံ၊ ပုပ္ဖံ ယထာ ပံသုနိ အာတပေ ကတံ.
၁၂၈. အဇညံ ဇညသင်္ခါတံ၊ အသုစိံ သုစိသမ္မတံ၊
နာနာကုဏပပရိပူရံ၊ ဇညရူပံ အပဿတော.
၁၂၉. ဓိရတ္ထုမံ အာတုရံ ပူတိကာယံ၊ ဇေဂုစ္ဆိယံ အဿုစိံ ဗျာဓိဓမ္မံ၊
ယတ္ထပ္ပမတ္တာ အဓိမုစ္ဆိတာ ပဇာ၊ ဟာပေန္တိ မဂ္ဂံ သုဂတူပပတ္တိယာတိ.
ကာယနိဗ္ဗိန္ဒ [ကာယဝိစ္ဆန္ဒ (သီ.)၊ ကာယဝိစ္ဆိန္ဒ (ပီ.)] ဇာတကံ တတိယံ.
၂၉၄. ဇမ္ဗုခါဒကဇာတကံ (၃-၅-၄)
၁၃၀. ကောယံ ဗိန္ဒုဿရော ဝဂ္ဂု၊ သရဝန္တာန [ပဝဒန္တာန (သီ. ပီ.)] မုတ္တမော၊
အစ္စုတော ဇမ္ဗုသာခါယ၊ မောရစ္ဆာပေါဝ ကူဇတိ.
၁၃၁. ကုလပုတ္တောဝ ဇာနာတိ [ကုလပုတ္တော ပဇာနာတိ (သျာ. က.)]၊ ကုလပုတ္တံ [ကုလပုတ္တေ (သီ. ပီ.)] ပသံသိတုံ၊
ဗျဂ္ဃစ္ဆာပသရီဝဏ္ဏ၊ ဘုဉ္ဇ သမ္မ ဒဒါမိ တေ.
၁၃၂. စိရဿံ ဝတ ပဿာမိ၊ မုသာဝါဒီ သမာဂတေ၊
ဝန္တာဒံ ကုဏပါဒဉ္စ၊ အညမညံ ပသံသကေတိ.
ဇမ္ဗုခါဒကဇာတကံ စတုတ္ထံ.
၂၉၅. အန္တဇာတကံ (၃-၅-၅)
၁၃၃. ဥသဘဿေဝ တေ ခန္ဓော၊ သီဟဿေဝ ဝိဇမ္ဘိတံ၊
မိဂရာဇ နမော တျတ္ထု၊ အပိ ကိဉ္စိ လဘာမသေ.
၁၃၄. ကုလပုတ္တောဝ ဇာနာတိ၊ ကုလပုတ္တံ ပသံသိတုံ၊
မယူရဂီဝသင်္ကာသ၊ ဣတော ပရိယာဟိ ဝါယသ.
၁၃၅. မိဂါနံ သိင်္ဂါလော [ကောတ္ထုကော (သီ. ပီ.)၊ ကောဋ္ဌုကော (သျာ.)] အန္တော၊ ပက္ခီနံ ပန ဝါယသော၊
ဧရဏ္ဍော အန္တော ရုက္ခာနံ၊ တယော အန္တာ သမာဂတာတိ.
အန္တဇာတကံ ပဉ္စမံ.
၂၉၆. သမုဒ္ဒဇာတကံ (၃-၅-၆)
၁၃၆. ကော နာယံ [ကော နွာယံ (သျာ.)] လောဏတောယသ္မိံ၊ သမန္တာ ပရိဓာဝတိ၊
မစ္ဆေ မကရေ စ ဝါရေတိ၊ ဦမီသု စ ဝိဟညတိ.
၁၃၇. အနန္တပါယီ သကုဏော၊ အတိတ္တောတိ ဒိသာသုတော၊
သမုဒ္ဒံ ပါတုမိစ္ဆာမိ၊ သာဂရံ သရိတံ ပတိံ.
၁၃၈. သော အယံ ဟာယတိ စေဝ၊ ပူရတေ စ မဟောဒဓိ၊
နာဿ နာယတိ ပီတန္တော၊ အပေယျော ကိရ သာဂရောတိ.
သမုဒ္ဒဇာတကံ ဆဋ္ဌံ.
၂၉၇. ကာမဝိလာပဇာတကံ (၃-၅-၇)
၁၃၉. ဥစ္စေ သကုဏ ဍေမာန၊ ပတ္တယာန ဝိဟင်္ဂမ၊
ဝဇ္ဇာသိ ခေါ တွံ ဝါမူရုံ၊ စိရံ ခေါ သာ ကရိဿတိ [သရိဿတိ (က.)].
၁၄၀. ဣဒံ ခေါ သာ န ဇာနာတိ၊ အသိံ သတ္တိဉ္စ ဩဍ္ဍိတံ၊
သာ စဏ္ဍီ ကာဟတိ ကောဓံ၊ တံ မေ တပတိ နော ဣဒံ [နော ဣဓ (သီ. သျာ. ပီ.)].
၁၄၁. ဧသ ဥပ္ပလသန္နာဟော၊ နိက္ခဉ္စုဿီသကောဟိတံ [နိက္ခမုဿီသကေ ကတံ (သီ. ပီ.)၊ နိက္ခဉ္စုဿီသကေ ကတံ (သျာ.)]၊
ကာသိကဉ္စ မုဒုံ ဝတ္ထံ၊ တပ္ပေတု ဓနိကာ ပိယာတိ [ဓနကာမိယာတိ (သျာ. ပီ.)၊ ဓနကာမိကာတိ (သီ.)].
ကာမဝိလာပဇာတကံ သတ္တမံ.
၂၉၈. ဥဒုမ္ဗရဇာတကံ (၃-၅-၈)
၁၄၂. ဥဒုမ္ဗရာ စိမေ ပက္ကာ၊ နိဂြောဓာ စ ကပိတ္ထနာ၊
ဧဟိ နိက္ခမ ဘုဉ္ဇဿု၊ ကိံ ဇိဃစ္ဆာယ မိယျသိ.
၁၄၃. ဧဝံ သော သုဟိတော ဟောတိ၊ ယော ဝုဍ္ဎမပစာယတိ၊
ယထာဟမဇ္ဇ သုဟိတော၊ ဒုမပက္ကာနိ မာသိတော.
၁၄၄. ယံ ဝနေဇော ဝနေဇဿ၊ ဝဉ္စေယျ ကပိနော ကပိ၊
ဒဟရော ကပိ [ဒဟရောပိ တံ န (သီ. ပီ.)၊ ဒဟရောပိ န (သျာ.)] သဒ္ဓေယျ၊ န ဟိ ဇိဏ္ဏော ဇရာကပီတိ.
ဥဒုမ္ဗရဇာတကံ အဋ္ဌမံ.
၂၉၉. ကောမာရပုတ္တဇာတကံ (၃-၅-၉)
၁၄၅. ပုရေ တုဝံ သီလဝတံ သကာသေ၊ ဩက္ကန္တိကံ [ဩက္ကန္ဒိကံ (သီ. သျာ. ပီ.)] ကီဠသိ အဿမမှိ၊
ကရောဟရေ [ကရောဟိ ရေ (က.)] မက္ကဋိယာနိ မက္ကဋ၊ န တံ မယံ သီလဝတံ ရမာမ.
၁၄၆. သုတာ ဟိ မယှံ ပရမာ ဝိသုဒ္ဓိ၊ ကောမာရပုတ္တဿ ဗဟုဿုတဿ၊
မာ ဒါနိ မံ မညိ တုဝံ ယထာ ပုရေ၊ ဈာနာနုယုတ္တော ဝိဟရာမိ [ဈာနာနုယုတ္တာ ဝိဟရာမ (သီ. ပီ.)] အာဝုသော.
၁၄၇. သစေပိ သေလသ္မိ ဝပေယျ ဗီဇံ၊ ဒေဝေါ စ ဝဿေ န ဟိ တံ ဝိရူဠှေ [နေဝ ဟိ တံ ရုဟေယျ (သီ. ပီ.)၊ န ဟိ တံ ဝိရူဟေ (?)]၊
သုတာ ဟိ တေ သာ ပရမာ ဝိသုဒ္ဓိ၊ အာရာ တုဝံ မက္ကဋ ဈာနဘူမိယာတိ.
ကောမာရပုတ္တဇာတကံ နဝမံ.
၃၀၀. ဝကဇာတကံ (၃-၅-၁၀)
၁၄၈. ပရပါဏရောဓာ [ပရပါဏဃာတေ (သျာ.)၊ ပရပါဏရောစံ (က.)] ဇီဝန္တော၊ မံသလောဟိတဘောဇနော၊
ဝကော ဝတံ သမာဒါယ၊ ဥပပဇ္ဇိ ဥပေါသထံ.
၁၄၉. တဿ သက္ကော ဝတညာယ၊ အဇရူပေနုပါဂမိ၊
ဝီတတပေါ အဇ္ဈပ္ပတ္တော၊ ဘဉ္ဇိ လောဟိတပေါ တပံ.
၁၅၀. ဧဝမေဝ ဣဓေကစ္စေ၊ သမာဒါနမှိ ဒုဗ္ဗလာ၊
လဟုံ ကရောန္တိ အတ္တာနံ၊ ဝကောဝ အဇကာရဏာတိ.
ဝကဇာတကံ ဒသမံ.
ကုမ္ဘဝဂ္ဂေါ ပဉ္စမော.
တဿုဒ္ဒါနံ –
ဝရကုမ္ဘ သုပတ္တသိရိဝှယနော၊ သုစိသမ္မတ ဗိန္ဒုသရော စုသဘော၊
သရိတံပတိ စဏ္ဍိ ဇရာကပိနာ၊ အထ မက္ကဋိယာ ဝကကေန ဒသာတိ.
အထ ဝဂ္ဂုဒ္ဒါနံ –
သင်္ကပ္ပေါ ပဒုမော စေဝ၊ ဥဒပါနေန တတိယံ၊
အဗ္ဘန္တရံ ဃဋဘေဒံ၊ တိကနိပါတမှိလင်္ကတန္တိ.
တိကနိပါတံ နိဋ္ဌိတံ.