၄. အဗ္ဘန္တရဝဂ္ဂေါ
၂၈၁. အဗ္ဘန္တရဇာတကံ (၃-၄-၁)
၉၁. အဗ္ဘန္တရော နာမ ဒုမော၊ ယဿ ဒိဗျမိဒံ ဖလံ၊
ဘုတွာ ဒေါဟဠိနီ နာရီ၊ စက္ကဝတ္တိံ ဝိဇာယတိ.
၉၂. တွမ္ပိ [တွဉ္စ (သီ. ပီ.)၊ တွံ ဟိ (က.)] ဘဒ္ဒေ မဟေသီသိ၊ သာ စာပိ [စာသိ (သီ. ပီ.)] ပတိနော ပိယာ၊
အာဟရိဿတိ တေ ရာဇာ၊ ဣဒံ အဗ္ဘန္တရံ ဖလံ.
၉၃. ဘတ္တုရတ္ထေ ပရက္ကန္တော၊ ယံ ဌာနမဓိဂစ္ဆတိ၊
သူရော အတ္တပရိစ္စာဂီ၊ လဘမာနော ဘဝါမဟန္တိ.
အဗ္ဘန္တရဇာတကံ ပဌမံ.
၂၈၂. သေယျဇာတကံ (၃-၄-၂)
၉၄. သေယျံသော သေယျသော ဟောတိ၊ ယော သေယျမုပသေဝတိ၊
ဧကေန သန္ဓိံ ကတွာန၊ သတံ ဝဇ္ဈေ [မစ္စေ (က.)၊ ဗဇ္ဈေ (က. အဋ္ဌ.)] အမောစယိံ.
၉၅. [ကသ္မာ။ပေ။ သဂ္ဂံ န ဂစ္ဆေယျ (ကတ္ထစိ)] တသ္မာ သဗ္ဗေန လောကေန၊ သန္ဓိံ ကတွာန ဧကတော [ဧကကော (သီ. သျာ. ပီ.)]၊
ပေစ္စ သဂ္ဂံ နိဂစ္ဆေယျ [ကသ္မာ။ပေ။ သဂ္ဂံ န ဂစ္ဆေယျ (ကတ္ထစိ)]၊ ဣဒံ သုဏာထ ကာသိယာ [ကာသယော (သီ. ပီ.)].
၉၆. ဣဒံ ဝတွာ မဟာရာဇာ၊ ကံသော ဗာရာဏသိဂ္ဂဟော၊
ဓနုံ ကဏ္ဍဉ္စ [တူဏိဉ္စ (သီ. ပီ.)] နိက္ခိပ္ပ၊ သံယမံ အဇ္ဈုပါဂမီတိ.
သေယျဇာတကံ ဒုတိယံ.
၂၈၃. ဝဍ္ဎကီသူကရဇာတကံ (၃-၄-၃)
၉၇. ဝရံ ဝရံ တွံ နိဟနံ ပုရေ စရိ၊ အသ္မိံ ပဒေသေ အဘိဘုယျ သူကရေ၊
သော ဒါနိ ဧကော ဗျပဂမ္မ ဈာယသိ၊ ဗလံ နု တေ ဗျဂ္ဃ န စဇ္ဇ ဝိဇ္ဇတိ.
၉၈. ဣမေ သုဒံ [ဣမဿု တာ (သျာ. က.)] ယန္တိ ဒိသောဒိသံ ပုရေ၊ ဘယဋ္ဋိတာ လေဏဂဝေသိနော ပုထု၊
တေ ဒါနိ သင်္ဂမ္မ ဝသန္တိ ဧကတော၊ ယတ္ထဋ္ဌိတာ ဒုပ္ပသဟဇ္ဇမေ [ဒုပ္ပသဟဇ္ဇိမေ (သျာ.)] မယာ.
၉၉. နမတ္ထု သံဃာန သမာဂတာနံ၊ ဒိသွာ သယံ သချ ဝဒါမိ အဗ္ဘုတံ၊
ဗျဂ္ဃံ မိဂါ ယတ္ထ ဇိနိံသု ဒါဌိနော၊ သာမဂ္ဂိယာ ဒါဌဗလေသု မုစ္စရေတိ.
ဝဍ္ဎကီသူကရဇာတကံ တတိယံ.
၂၈၄. သိရိဇာတကံ (၃-၄-၄)
၁၀၀. ယံ ဥဿုကာ သင်္ဃရန္တိ၊ အလက္ခိကာ ဗဟုံ ဓနံ၊
သိပ္ပဝန္တော အသိပ္ပါ စ၊ လက္ခိဝါ တာနိ ဘုဉ္ဇတိ.
၁၀၁. သဗ္ဗတ္ထ ကတပုညဿ၊ အတိစ္စညေဝ ပါဏိနော၊
ဥပ္ပဇ္ဇန္တိ ဗဟူ ဘောဂါ၊ အပ္ပနာယတနေသုပိ.
၁၀၂. ကုက္ကုဋော [ကုက္ကုဋ (သီ. ပီ.)၊ ကုက္ကုဋာ (သီ. နိဿယ၊ သဒ္ဒနီတိ)] မဏယော ဒဏ္ဍော၊ ထိယော စ ပုညလက္ခဏာ၊
ဥပ္ပဇ္ဇန္တိ အပါပဿ၊ ကတပုညဿ ဇန္တုနောတိ.
သိရိဇာတကံ စတုတ္ထံ.
၂၈၅. မဏိသူကရဇာတကံ (၃-၄-၅)
၁၀၃. ဒရိယာ သတ္တ ဝဿာနိ၊ တိံသမတ္တာ ဝသာမသေ၊
ဟညာမ [ဟဉ္ဆေမ (သီ. ပီ.)၊ ဟဉ္ဆာမ (?)] မဏိနော အာဘံ၊ ဣတိ နော မန္တနံ အဟု.
၁၀၄. ယာဝတာ မဏိံ ဃံသာမ [ယာဝ ယာဝ နိဃံသာမ (သီ. ပီ.)]၊ ဘိယျော ဝေါဒါယတေ မဏိ၊
ဣဒဉ္စ ဒါနိ ပုစ္ဆာမ၊ ကိံ ကိစ္စံ ဣဓ မညသိ.
၁၀၅. အယံ မဏိ ဝေဠူရိယော၊ အကာစော ဝိမလော [ဝိပုလော (က.)] သုဘော၊
နာဿ သက္ကာ သိရိံ ဟန္တုံ၊ အပက္ကမထ သူကရာတိ.
မဏိသူကရ [မဏိဃံသ (က.)] ဇာတကံ ပဉ္စမံ.
၂၈၆. သာလူကဇာတကံ (၃-၄-၆)
၁၀၆. မာ သာလူကဿ ပိဟယိ၊ အာတုရန္နာနိ ဘုဉ္ဇတိ၊
အပ္ပေါဿုက္ကော ဘုသံ ခါဒ၊ ဧတံ ဒီဃာယုလက္ခဏံ.
၁၀၇. ဣဒါနိ သော ဣဓာဂန္တွာ၊ အတိထီ ယုတ္တသေဝကော၊
အထ ဒက္ခသိ သာလူကံ၊ သယန္တံ မုသလုတ္တရံ.
၁၀၈. ဝိကန္တံ [ဝိကတ္တံ (သီ.)၊ ဝိကန္တိယမာနံ ဆိန္ဒိယမာနံတိ အတ္ထော] သူကရံ ဒိသွာ၊ သယန္တံ မုသလုတ္တရံ၊
ဇရဂ္ဂဝါ ဝိစိန္တေသုံ၊ ဝရမှာကံ ဘုသာမိဝါတိ.
သာလူကဇာတကံ ဆဋ္ဌံ.
၂၈၇. လာဘဂရဟဇာတကံ (၃-၄-၇)
၁၀၉. နာနုမ္မတ္တော နာပိသုဏော၊ နာနဋော နာကုတူဟလော၊
မူဠှေသု လဘတေ လာဘံ၊ ဧသာ တေ အနုသာသနီ.
၁၁၀. ဓိရတ္ထု တံ ယသလာဘံ၊ ဓနလာဘဉ္စ ဗြာဟ္မဏ၊
ယာ ဝုတ္တိ ဝိနိပါတေန၊ အဓမ္မစရဏေန [အဓမ္မစရိယာယ (သီ. သျာ.)] ဝါ.
၁၁၁. အပိ စေ ပတ္တမာဒါယ၊ အနဂါရော ပရိဗ္ဗဇေ၊
ဧသာဝ ဇီဝိကာ သေယျော [သေယျာ (သီ. သျာ. ပီ.)]၊ ယာ စာဓမ္မေန ဧသနာတိ.
လာဘဂရဟဇာတကံ သတ္တမံ.
၂၈၈. မစ္ဆုဒ္ဒါနဇာတကံ (၃-၄-၈)
၁၁၂. အဂ္ဃန္တိ မစ္ဆာ အဓိကံ သဟဿံ၊ န သော အတ္ထိ ယော ဣမံ သဒ္ဒဟေယျ၊
မယှဉ္စ အဿု ဣဓ သတ္တ မာသာ၊ အဟမ္ပိ တံ မစ္ဆုဒ္ဒါနံ ကိဏေယျံ.
၁၁၃. မစ္ဆာနံ ဘောဇနံ ဒတွာ၊ မမ ဒက္ခိဏမာဒိသိ၊
တံ ဒက္ခိဏံ သရန္တိယာ၊ ကတံ အပစိတိံ တယာ.
၁၁၄. ပဒုဋ္ဌစိတ္တဿ န ဖာတိ ဟောတိ၊ န စာပိ တံ [နံ (သီ. သျာ.)] ဒေဝတာ ပူဇယန္တိ၊
ယော ဘာတရံ ပေတ္တိကံ သာပတေယျံ၊ အဝဉ္စယီ ဒုက္ကဋကမ္မကာရီတိ.
မစ္ဆုဒ္ဒါနဇာတကံ အဋ္ဌမံ.
၂၈၉. နာနာဆန္ဒဇာတကံ (၃-၄-၉)
၁၁၅. နာနာဆန္ဒာ မဟာရာဇ၊ ဧကာဂါရေ ဝသာမသေ၊
အဟံ ဂါမဝရံ ဣစ္ဆေ၊ ဗြာဟ္မဏီ စ ဂဝံ သတံ.
၁၁၆. ပုတ္တော စ အာဇညရထံ၊ ကညာ စ မဏိကုဏ္ဍလံ၊
ယာ စေသာ ပုဏ္ဏိကာ ဇမ္မီ၊ ဥဒုက္ခလံဘိကင်္ခတိ.
၁၁၇. ဗြာဟ္မဏဿ ဂါမဝရံ၊ ဗြာဟ္မဏိယာ ဂဝံ သတံ၊
ပုတ္တဿ အာဇညရထံ၊ ကညာယ မဏိကုဏ္ဍလံ၊
ယဉ္စေတံ ပုဏ္ဏိကံ ဇမ္မိံ၊ ပဋိပါဒေထုဒုက္ခလန္တိ.
နာနာဆန္ဒဇာတကံ နဝမံ.
၂၉၀. သီလဝီမံသကဇာတကံ (၃-၄-၁၀)
၁၁၈. သီလံ ကိရေဝ ကလျာဏံ၊ သီလံ လောကေ အနုတ္တရံ၊
ပဿ ဃောရဝိသော နာဂေါ၊ သီလဝါတိ န ဟညတိ.
၁၁၉. သောဟံ သီလံ သမာဒိဿံ၊ လောကေ အနုမတံ သိဝံ၊
အရိယဝုတ္တိသမာစာရော၊ ယေန ဝုစ္စတိ သီလဝါ.
၁၂၀. ဉာတီနဉ္စ ပိယော ဟောတိ၊ မိတ္တေသု စ ဝိရောစတိ၊
ကာယဿ ဘေဒါ သုဂတိံ၊ ဥပပဇ္ဇတိ သီလဝါတိ.
သီလဝီမံသကဇာတကံ ဒသမံ.
အဗ္ဘန္တရဝဂ္ဂေါ စတုတ္ထော.
တဿုဒ္ဒါနံ –
ဒုမ ကံသဝရုတ္တမဗျဂ္ဃမိဂါ၊ မဏယော မဏိ သာလုကမဝှယနော၊
အနုသာသနိယောပိ စ မစ္ဆဝရော၊ မဏိကုဏ္ဍလကေန ကိရေန ဒသာတိ.