၂၈၂. သေယျဇာတကံ (၃-၄-၂)

၉၄. သေယျံသော သေယျသော ဟောတိ၊ ယော သေယျမုပသေဝတိ၊

ဧကေန သန္ဓိံ ကတွာန၊ သတံ ဝဇ္ဈေ [မစ္စေ (က.)၊ ဗဇ္ဈေ (က. အဋ္ဌ.)] အမောစယိံ.

၉၅. [ကသ္မာ။ပေ။ သဂ္ဂံ န ဂစ္ဆေယျ (ကတ္ထစိ)] တသ္မာ သဗ္ဗေန လောကေန၊ သန္ဓိံ ကတွာန ဧကတော [ဧကကော (သီ. သျာ. ပီ.)]၊

ပေစ္စ သဂ္ဂံ နိဂစ္ဆေယျ [ကသ္မာ။ပေ။ သဂ္ဂံ န ဂစ္ဆေယျ (ကတ္ထစိ)]၊ ဣဒံ သုဏာထ ကာသိယာ [ကာသယော (သီ. ပီ.)].

၉၆. ဣဒံ ဝတွာ မဟာရာဇာ၊ ကံသော ဗာရာဏသိဂ္ဂဟော၊

ဓနုံ ကဏ္ဍဉ္စ [တူဏိဉ္စ (သီ. ပီ.)] နိက္ခိပ္ပ၊ သံယမံ အဇ္ဈုပါဂမီတိ.

သေယျဇာတကံ ဒုတိယံ.