၂၈၃. ဝဍ္ဎကီသူကရဇာတကံ (၃-၄-၃)

၉၇. ဝရံ ဝရံ တွံ နိဟနံ ပုရေ စရိ၊ အသ္မိံ ပဒေသေ အဘိဘုယျ သူကရေ၊

သော ဒါနိ ဧကော ဗျပဂမ္မ ဈာယသိ၊ ဗလံ နု တေ ဗျဂ္ဃ န စဇ္ဇ ဝိဇ္ဇတိ.

၉၈. ဣမေ သုဒံ [ဣမဿု တာ (သျာ. က.)] ယန္တိ ဒိသောဒိသံ ပုရေ၊ ဘယဋ္ဋိတာ လေဏဂဝေသိနော ပုထု၊

တေ ဒါနိ သင်္ဂမ္မ ဝသန္တိ ဧကတော၊ ယတ္ထဋ္ဌိတာ ဒုပ္ပသဟဇ္ဇမေ [ဒုပ္ပသဟဇ္ဇိမေ (သျာ.)] မယာ.

၉၉. နမတ္ထု သံဃာန သမာဂတာနံ၊ ဒိသွာ သယံ သချ ဝဒါမိ အဗ္ဘုတံ၊

ဗျဂ္ဃံ မိဂါ ယတ္ထ ဇိနိံသု ဒါဌိနော၊ သာမဂ္ဂိယာ ဒါဌဗလေသု မုစ္စရေတိ.

ဝဍ္ဎကီသူကရဇာတကံ တတိယံ.