ရူပါဝစရာရူပါဝစရကိရိယံ
၅၇၇. ရူပါဝစရာရူပါဝစရကိရိယနိဒ္ဒေသေသု ဒိဋ္ဌဓမ္မသုခဝိဟာရန္တိ ဒိဋ္ဌဓမ္မေ၊ ဣမသ္မိံယေဝ အတ္တဘာဝေ၊ သုခဝိဟာရမတ္တံ. တတ္ထ ခီဏာသဝဿ ပုထုဇ္ဇနကာလေ နိဗ္ဗတ္တိတာ သမာပတ္တိ ယာဝ န နံ သမာပဇ္ဇတိ တာဝ ကုသလာဝ သမာပန္နကာလေ ကိရိယာ ဟောတိ. ခီဏာသဝကာလေ ပနဿ နိဗ္ဗတ္တိတာ သမာပတ္တိ ကိရိယာဝ ဟောတိ. သေသံ သဗ္ဗံ တံသဒိသတ္တာ ကုသလနိဒ္ဒေသေ ဝုတ္တနယေနေဝ ဝေဒိတဗ္ဗန္တိ.
အဋ္ဌသာလိနိယာ ဓမ္မသင်္ဂဟအဋ္ဌကထာယ
စိတ္တုပ္ပါဒကဏ္ဍကထာ နိဋ္ဌိတာ.
အဗျာကတပဒံ ပန နေဝ တာဝ နိဋ္ဌိတန္တိ.
စိတ္တုပ္ပါဒကဏ္ဍဝဏ္ဏနာ နိဋ္ဌိတာ.