(၁၁) ဆ ဂေဟသိတာနိ သောမနဿာနိ

၉၄၇. တတ္ထ ကတမာနိ ဆ ဂေဟသိတာနိ သောမနဿာနိ? မနာပိယေသု ရူပေသု ဂေဟသိတံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ၊ မနာပိယေသု သဒ္ဒေသု။ပေ။ မနာပိယေသု ဂန္ဓေသု။ပေ။ မနာပိယေသု ရသေသု။ပေ။ မနာပိယေသု ဖောဋ္ဌဗ္ဗေသု။ပေ။ မနာပိယေသု ဓမ္မေသု ဂေဟသိတံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣမာနိ ဆ ဂေဟသိတာနိ သောမနဿာနိ.