၆. ဆက္ကနိဒ္ဒေသော

(၁) ဆ ဝိဝါဒမူလာနိ

၉၄၄. တတ္ထ ကတမာနိ ဆ ဝိဝါဒမူလာနိ? ကောဓော၊ မက္ခော၊ ဣဿာ၊ သာဌေယျံ၊ ပါပိစ္ဆတာ၊ သန္ဒိဋ္ဌိပရာမာသိတာ – ဣမာနိ ဆ ဝိဝါဒမူလာနိ.

(၂) ဆ ဆန္ဒရာဂါ

တတ္ထ ကတမေ ဆ ဆန္ဒရာဂါ? ဆန္ဒရာဂါ ဂေဟသိတာ ဓမ္မာ. မနာပိယေသု ရူပေသု ဂေဟသိတော ရာဂေါ သာရာဂေါ စိတ္တဿ သာရာဂေါ၊ မနာပိယေသု သဒ္ဒေသု။ပေ။ မနာပိယေသု ဂန္ဓေသု။ပေ။ မနာပိယေသု ရသေသု။ပေ။ မနာပိယေသု ဖောဋ္ဌဗ္ဗေသု။ပေ။ မနာပိယေသု ဓမ္မေသု ဂေဟသိတော ရာဂေါ သာရာဂေါ စိတ္တဿ သာရာဂေါ – ဣမေ ဆ ဆန္ဒရာဂါ.

(၃) ဆ ဝိရောဓဝတ္ထူနိ

တတ္ထ ကတမာနိ ဆ ဝိရောဓဝတ္ထူနိ? အမနာပိယေသု ရူပေသု စိတ္တဿ အာဃာတော ပဋိဃာတော စဏ္ဍိက္ကံ အသုရောပေါ အနတ္တမနတာ စိတ္တဿ၊ အမနာပိယေသု သဒ္ဒေသု။ပေ။ အမနာပိယေသု ဂန္ဓေသု။ပေ။ အမနာပိယေသု ရသေသု။ပေ။ အမနာပိယေသု ဖောဋ္ဌဗ္ဗေသု။ပေ။ အမနာပိယေသု ဓမ္မေသု စိတ္တဿ အာဃာတော ပဋိဃာတော စဏ္ဍိက္ကံ အသုရောပေါ အနတ္တမနတာ စိတ္တဿ – ဣမာနိ ဆ ဝိရောဓဝတ္ထူနိ.

(၄) ဆ တဏှာကာယာ

တတ္ထ ကတမေ ဆ တဏှာကာယာ? ရူပတဏှာ၊ သဒ္ဒတဏှာ၊ ဂန္ဓတဏှာ၊ ရသတဏှာ၊ ဖောဋ္ဌဗ္ဗတဏှာ၊ ဓမ္မတဏှာ – ဣမေ ဆ တဏှာကာယာ.

(၅) ဆ အဂါရဝါ

၉၄၅. တတ္ထ ကတမေ ဆ အဂါရဝါ? သတ္ထရိ အဂါရဝေါ ဝိဟရတိ အပ္ပတိဿော၊ ဓမ္မေ အဂါရဝေါ ဝိဟရတိ အပ္ပတိဿော၊ သံဃေ အဂါရဝေါ ဝိဟရတိ အပ္ပတိဿော၊ သိက္ခာယ အဂါရဝေါ ဝိဟရတိ အပ္ပတိဿော၊ အပ္ပမာဒေ အဂါရဝေါ ဝိဟရတိ အပ္ပတိဿော၊ ပဋိသန္ထာရေ အဂါရဝေါ ဝိဟရတိ အပ္ပတိဿော – ဣမေ ဆ အဂါရဝါ.

(၆) ဆ ပရိဟာနိယာ ဓမ္မာ

တတ္ထ ကတမေ ဆ ပရိဟာနိယာ ဓမ္မာ? ကမ္မာရာမတာ၊ ဘဿာရာမတာ၊ နိဒ္ဒါရာမတာ၊ သင်္ဂဏိကာရာမတာ၊ သံသဂ္ဂါရာမတာ၊ ပပဉ္စာရာမတာ – ဣမေ ဆ ပရိဟာနိယာ ဓမ္မာ.

(၇) အပရေပိ ဆ ပရိဟာနိယာ ဓမ္မာ

၉၄၆. တတ္ထ ကတမေ အပရေပိ ဆ ပရိဟာနိယာ ဓမ္မာ? ကမ္မာရာမတာ၊ ဘဿာရာမတာ၊ နိဒ္ဒါရာမတာ၊ သင်္ဂဏိကာရာမတာ၊ ဒေါဝစဿတာ၊ ပါပမိတ္တတာ – ဣမေ ဆ ပရိဟာနိယာ ဓမ္မာ.

(၈) ဆ သောမနဿုပဝိစာရာ

တတ္ထ ကတမေ ဆ သောမနဿုပဝိစာရာ? စက္ခုနာ ရူပံ ဒိသွာ သောမနဿဋ္ဌာနိယံ ရူပံ ဥပဝိစရတိ၊ သောတေန သဒ္ဒံ သုတွာ။ပေ။ ဃာနေန ဂန္ဓံ ဃာယိတွာ။ပေ။ ဇိဝှါယ ရသံ သာယိတွာ။ပေ။ ကာယေန ဖောဋ္ဌဗ္ဗံ ဖုသိတွာ။ပေ။ မနသာ ဓမ္မံ ဝိညာယ သောမနဿဋ္ဌာနိယံ ဓမ္မံ ဥပဝိစရတိ – ဣမေ ဆ သောမနဿုပဝိစာရာ.

(၉) ဆ ဒေါမနဿုပဝိစာရာ

တတ္ထ ကတမေ ဆ ဒေါမနဿုပဝိစာရာ? စက္ခုနာ ရူပံ ဒိသွာ ဒေါမနဿဋ္ဌာနိယံ ရူပံ ဥပဝိစရတိ၊ သောတေန သဒ္ဒံ သုတွာ။ပေ။ ဃာနေန ဂန္ဓံ ဃာယိတွာ။ပေ။ ဇိဝှါယ ရသံ သာယိတွာ ။ပေ။ ကာယေန ဖောဋ္ဌဗ္ဗံ ဖုသိတွာ။ပေ။ မနသာ ဓမ္မံ ဝိညာယ ဒေါမနဿဋ္ဌာနိယံ ဓမ္မံ ဥပဝိစရတိ – ဣမေ ဆ ဒေါမနဿုပဝိစာရာ.

(၁၀) ဆ ဥပေက္ခုပဝိစာရာ

တတ္ထ ကတမေ ဆ ဥပေက္ခုပဝိစာရာ? စက္ခုနာ ရူပံ ဒိသွာ ဥပေက္ခာဋ္ဌာနိယံ ရူပံ ဥပဝိစရတိ၊ သောတေန သဒ္ဒံ သုတွာ။ပေ။ ဃာနေန ဂန္ဓံ ဃာယိတွာ။ပေ။ ဇိဝှါယ ရသံ သာယိတွာ။ပေ။ ကာယေန ဖောဋ္ဌဗ္ဗံ ဖုသိတွာ။ပေ။ မနသာ ဓမ္မံ ဝိညာယ ဥပေက္ခာဋ္ဌာနိယံ ဓမ္မံ ဥပဝိစရတိ – ဣမေ ဆ ဥပေက္ခုပဝိစာရာ.

(၁၁) ဆ ဂေဟသိတာနိ သောမနဿာနိ

၉၄၇. တတ္ထ ကတမာနိ ဆ ဂေဟသိတာနိ သောမနဿာနိ? မနာပိယေသု ရူပေသု ဂေဟသိတံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ၊ မနာပိယေသု သဒ္ဒေသု။ပေ။ မနာပိယေသု ဂန္ဓေသု။ပေ။ မနာပိယေသု ရသေသု။ပေ။ မနာပိယေသု ဖောဋ္ဌဗ္ဗေသု။ပေ။ မနာပိယေသု ဓမ္မေသု ဂေဟသိတံ စေတသိကံ သာတံ စေတသိကံ သုခံ စေတောသမ္ဖဿဇံ သာတံ သုခံ ဝေဒယိတံ စေတောသမ္ဖဿဇာ သာတာ သုခါ ဝေဒနာ – ဣမာနိ ဆ ဂေဟသိတာနိ သောမနဿာနိ.

(၁၂) ဆ ဂေဟသိတာနိ ဒေါမနဿာနိ

တတ္ထ ကတမာနိ ဆ ဂေဟသိတာနိ ဒေါမနဿာနိ? အမနာပိယေသု ရူပေသု ဂေဟသိတံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ၊ အမနာပိယေသု သဒ္ဒေသု။ပေ။ အမနာပိယေသု ဂန္ဓေသု။ပေ။ အမနာပိယေသု ရသေသု။ပေ။ အမနာပိယေသု ဖောဋ္ဌဗ္ဗေသု။ပေ။ အမနာပိယေသု ဓမ္မေသု ဂေဟသိတံ စေတသိကံ အသာတံ စေတသိကံ ဒုက္ခံ စေတောသမ္ဖဿဇံ အသာတံ ဒုက္ခံ ဝေဒယိတံ စေတောသမ္ဖဿဇာ အသာတာ ဒုက္ခာ ဝေဒနာ – ဣမာနိ ဆ ဂေဟသိတာနိ ဒေါမနဿာနိ.

(၁၃) ဆ ဂေဟသိတာ ဥပေက္ခာ

တတ္ထ ကတမာ ဆ ဂေဟသိတာ ဥပေက္ခာ? ဥပေက္ခာဋ္ဌာနိယေသု ရူပေသု ဂေဟသိတံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ၊ ဥပေက္ခာဋ္ဌာနိယေသု သဒ္ဒေသု။ပေ။ ဥပေက္ခာဋ္ဌာနိယေသု ဂန္ဓေသု။ပေ။ ဥပေက္ခာဋ္ဌာနိယေသု ရသေသု။ပေ။ ဥပေက္ခာဋ္ဌာနိယေသု ဖောဋ္ဌဗ္ဗေသု။ပေ။ ဥပေက္ခာဋ္ဌာနိယေသု ဓမ္မေသု ဂေဟသိတံ စေတသိကံ နေဝ သာတံ နာသာတံ စေတောသမ္ဖဿဇံ အဒုက္ခမသုခံ ဝေဒယိတံ စေတောသမ္ဖဿဇာ အဒုက္ခမသုခါ ဝေဒနာ – ဣမာ ဆ ဂေဟသိတာ ဥပေက္ခာ.

(၁၄) ဆ ဒိဋ္ဌိယော

၉၄၈. တတ္ထ ကတမာ ဆ ဒိဋ္ဌိယော? ‘‘အတ္ထိ မေ အတ္တာ’’တိ ဝါ အဿ သစ္စတော ထေတတော ဒိဋ္ဌိ ဥပ္ပဇ္ဇတိ၊ ‘‘နတ္ထိ မေ အတ္တာ’’တိ ဝါ အဿ သစ္စတော ထေတတော ဒိဋ္ဌိ ဥပ္ပဇ္ဇတိ၊ ‘‘အတ္တနာ ဝါ အတ္တာနံ သဉ္ဇာနာမီ’’တိ ဝါ အဿ သစ္စတော ထေတတော ဒိဋ္ဌိ ဥပ္ပဇ္ဇတိ၊ ‘‘အတ္တနာ ဝါ အနတ္တာနံ သဉ္ဇာနာမီ’’တိ ဝါ အဿ သစ္စတော ထေတတော ဒိဋ္ဌိ ဥပ္ပဇ္ဇတိ၊ ‘‘အနတ္တနာ ဝါ အတ္တာနံ သဉ္ဇာနာမီ’’တိ ဝါ အဿ သစ္စတော ထေတတော ဒိဋ္ဌိ ဥပ္ပဇ္ဇတိ၊ အထ ဝါ ပနဿ ဧဝံဒိဋ္ဌိ ဟောတိ – ‘‘သော မေ အယံ အတ္တာ ဝဒေါ ဝေဒေယျော တတြ တတြ ဒီဃရတ္တံ ကလျာဏပါပကာနံ ကမ္မာနံ ဝိပါကံ ပစ္စနုဘောတိ. န သော ဇာတော နာဟောသိ၊ န သော ဇာတော န ဘဝိဿတိ၊ နိစ္စော ဓုဝေါ သဿတော အဝိပရိဏာမဓမ္မော’’တိ ဝါ ပနဿ သစ္စတော ထေတတော ဒိဋ္ဌိ ဥပ္ပဇ္ဇတိ. ဣမာ ဆ ဒိဋ္ဌိယော.

ဆက္ကံ.