နမော တဿ ဘဂဝတော အရဟတော သမ္မာသမ္ဗုဒ္ဓဿ

အဘိဓမ္မပိဋကေ

ဝိဘင်္ဂပါဠိ

၁. ခန္ဓဝိဘင်္ဂေါ

၁. သုတ္တန္တဘာဇနီယံ

၁. ပဉ္စက္ခန္ဓာ – ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော.

၁. ရူပက္ခန္ဓော

၂. တတ္ထ ကတမော ရူပက္ခန္ဓော? ယံ ကိဉ္စိ ရူပံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ရူပက္ခန္ဓော.

၃. တတ္ထ ကတမံ ရူပံ အတီတံ? ယံ ရူပံ အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတံ ဥပ္ပဇ္ဇိတွာ ဝိဂတံ အတီတံ အတီတံသေန သင်္ဂဟိတံ၊ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယရူပံ – ဣဒံ ဝုစ္စတိ ရူပံ အတီတံ.

တတ္ထ ကတမံ ရူပံ အနာဂတံ? ယံ ရူပံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတံ အနုပ္ပန္နံ အသမုပ္ပန္နံ အနုဋ္ဌိတံ အသမုဋ္ဌိတံ အနာဂတံ အနာဂတံသေန သင်္ဂဟိတံ၊ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယရူပံ – ဣဒံ ဝုစ္စတိ ရူပံ အနာဂတံ.

တတ္ထ ကတမံ ရူပံ ပစ္စုပ္ပန္နံ? ယံ ရူပံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတံ ဥပ္ပန္နံ သမုပ္ပန္နံ ဥဋ္ဌိတံ သမုဋ္ဌိတံ ပစ္စုပ္ပန္နံ ပစ္စုပ္ပန္နံသေန သင်္ဂဟိတံ၊ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယရူပံ – ဣဒံ ဝုစ္စတိ ရူပံ ပစ္စုပ္ပန္နံ.

၄. တတ္ထ ကတမံ ရူပံ အဇ္ဈတ္တံ? ယံ ရူပံ တေသံ တေသံ သတ္တာနံ အဇ္ဈတ္တံ ပစ္စတ္တံ နိယကံ ပါဋိပုဂ္ဂလိကံ ဥပါဒိန္နံ၊ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယရူပံ – ဣဒံ ဝုစ္စတိ ရူပံ အဇ္ဈတ္တံ.

တတ္ထ ကတမံ ရူပံ ဗဟိဒ္ဓါ? ယံ ရူပံ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယကံ ပါဋိပုဂ္ဂလိကံ ဥပါဒိန္နံ၊ စတ္တာရော စ မဟာဘူတာ စတုန္နဉ္စ မဟာဘူတာနံ ဥပါဒါယရူပံ – ဣဒံ ဝုစ္စတိ ရူပံ ဗဟိဒ္ဓါ.

၅. တတ္ထ ကတမံ ရူပံ ဩဠာရိကံ? စက္ခာယတနံ။ပေ။ ဖောဋ္ဌဗ္ဗာယတနံ – ဣဒံ ဝုစ္စတိ ရူပံ ဩဠာရိကံ.

တတ္ထ ကတမံ ရူပံ သုခုမံ? ဣတ္ထိန္ဒြိယံ။ပေ။ ကဗဠီကာရော [ကဗဠိံကာရော (သီ. သျာ.)] အာဟာရော – ဣဒံ ဝုစ္စတိ ရူပံ သုခုမံ.

၆. တတ္ထ ကတမံ ရူပံ ဟီနံ? ယံ ရူပံ တေသံ တေသံ သတ္တာနံ ဥညာတံ အဝညာတံ ဟီဠိတံ ပရိဘူတံ အစိတ္တီကတံ ဟီနံ ဟီနမတံ ဟီနသမ္မတံ အနိဋ္ဌံ အကန္တံ အမနာပံ၊ ရူပါ သဒ္ဒါ ဂန္ဓာ ရသာ ဖောဋ္ဌဗ္ဗာ – ဣဒံ ဝုစ္စတိ ရူပံ ဟီနံ.

တတ္ထ ကတမံ ရူပံ ပဏီတံ? ယံ ရူပံ တေသံ တေသံ သတ္တာနံ အနုညာတံ အနဝညာတံ အဟီဠိတံ အပရိဘူတံ စိတ္တီကတံ ပဏီတံ ပဏီတမတံ ပဏီတသမ္မတံ ဣဋ္ဌံ ကန္တံ မနာပံ၊ ရူပါ သဒ္ဒါ ဂန္ဓာ ရသာ ဖောဋ္ဌဗ္ဗာ – ဣဒံ ဝုစ္စတိ ရူပံ ပဏီတံ. တံ တံ ဝါ ပန ရူပံ ဥပါဒါယုပါဒါယ ရူပံ ဟီနံ ပဏီတံ ဒဋ္ဌဗ္ဗံ.

၇. တတ္ထ ကတမံ ရူပံ ဒူရေ? ဣတ္ထိန္ဒြိယံ။ပေ။ ကဗဠီကာရော အာဟာရော၊ ယံ ဝါ ပနညမ္ပိ အတ္ထိ ရူပံ အနာသန္နေ အနုပကဋ္ဌေ ဒူရေ အသန္တိကေ – ဣဒံ ဝုစ္စတိ ရူပံ ဒူရေ.

တတ္ထ ကတမံ ရူပံ သန္တိကေ? စက္ခာယတနံ။ပေ။ ဖောဋ္ဌဗ္ဗာယတနံ၊ ယံ ဝါ ပနညမ္ပိ အတ္ထိ ရူပံ အာသန္နေ ဥပကဋ္ဌေ အဝိဒူရေ သန္တိကေ – ဣဒံ ဝုစ္စတိ ရူပံ သန္တိကေ. တံ တံ ဝါ ပန ရူပံ ဥပါဒါယုပါဒါယ ရူပံ ဒူရေ သန္တိကေ ဒဋ္ဌဗ္ဗံ.

၂. ဝေဒနာက္ခန္ဓော

၈. တတ္ထ ကတမော ဝေဒနာက္ခန္ဓော? ယာ ကာစိ ဝေဒနာ အတီတာနာဂတပစ္စုပ္ပန္နာ အဇ္ဈတ္တာ ဝါ ဗဟိဒ္ဓါ ဝါ ဩဠာရိကာ ဝါ သုခုမာ ဝါ ဟီနာ ဝါ ပဏီတာ ဝါ ယာ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ဝေဒနာက္ခန္ဓော.

၉. တတ္ထ ကတမာ ဝေဒနာ အတီတာ? ယာ ဝေဒနာ အတီတာ နိရုဒ္ဓါ ဝိဂတာ ဝိပရိဏတာ အတ္ထင်္ဂတာ အဗ္ဘတ္ထင်္ဂတာ ဥပ္ပဇ္ဇိတွာ ဝိဂတာ အတီတာ အတီတံသေန သင်္ဂဟိတာ၊ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ – အယံ ဝုစ္စတိ ဝေဒနာ အတီတာ.

တတ္ထ ကတမာ ဝေဒနာ အနာဂတာ? ယာ ဝေဒနာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင်္ဂဟိတာ၊ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ – အယံ ဝုစ္စတိ ဝေဒနာ အနာဂတာ.

တတ္ထ ကတမာ ဝေဒနာ ပစ္စုပ္ပန္နာ? ယာ ဝေဒနာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင်္ဂဟိတာ၊ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ – အယံ ဝုစ္စတိ ဝေဒနာ ပစ္စုပ္ပန္နာ.

၁၀. တတ္ထ ကတမာ ဝေဒနာ အဇ္ဈတ္တာ? ယာ ဝေဒနာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ – အယံ ဝုစ္စတိ ဝေဒနာ အဇ္ဈတ္တာ.

တတ္ထ ကတမာ ဝေဒနာ ဗဟိဒ္ဓါ? ယာ ဝေဒနာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ သုခါ ဝေဒနာ ဒုက္ခာ ဝေဒနာ အဒုက္ခမသုခါ ဝေဒနာ – အယံ ဝုစ္စတိ ဝေဒနာ ဗဟိဒ္ဓါ.

၁၁. တတ္ထ ကတမာ ဝေဒနာ ဩဠာရိကာ သုခုမာ? အကုသလာ ဝေဒနာ ဩဠာရိကာ၊ ကုသလာဗျာကတာ ဝေဒနာ သုခုမာ. ကုသလာကုသလာ ဝေဒနာ ဩဠာရိကာ၊ အဗျာကတာ ဝေဒနာ သုခုမာ. ဒုက္ခာ ဝေဒနာ ဩဠာရိကာ၊ သုခါ စ အဒုက္ခမသုခါ စ ဝေဒနာ သုခုမာ. သုခဒုက္ခာ ဝေဒနာ ဩဠာရိကာ၊ အဒုက္ခမသုခါ ဝေဒနာ သုခုမာ. အသမာပန္နဿ ဝေဒနာ ဩဠာရိကာ၊ သမာပန္နဿ ဝေဒနာ သုခုမာ. သာသဝါ ဝေဒနာ ဩဠာရိကာ၊ အနာသဝါ ဝေဒနာ သုခုမာ. တံ တံ ဝါ ပန ဝေဒနံ ဥပါဒါယုပါဒါယ ဝေဒနာ ဩဠာရိကာ သုခုမာ ဒဋ္ဌဗ္ဗာ.

၁၂. တတ္ထ ကတမာ ဝေဒနာ ဟီနာ ပဏီတာ? အကုသလာ ဝေဒနာ ဟီနာ၊ ကုသလာဗျာကတာ ဝေဒနာ ပဏီတာ. ကုသလာကုသလာ ဝေဒနာ ဟီနာ၊ အဗျာကတာ ဝေဒနာ ပဏီတာ. ဒုက္ခာ ဝေဒနာ ဟီနာ၊ သုခါ စ အဒုက္ခမသုခါ စ ဝေဒနာ ပဏီတာ. သုခဒုက္ခာ ဝေဒနာ ဟီနာ၊ အဒုက္ခမသုခါ ဝေဒနာ ပဏီတာ. အသမာပန္နဿ ဝေဒနာ ဟီနာ၊ သမာပန္နဿ ဝေဒနာ ပဏီတာ. သာသဝါ ဝေဒနာ ဟီနာ၊ အနာသဝါ ဝေဒနာ ပဏီတာ. တံ တံ ဝါ ပန ဝေဒနံ ဥပါဒါယုပါဒါယ ဝေဒနာ ဟီနာ ပဏီတာ ဒဋ္ဌဗ္ဗာ.

၁၃. တတ္ထ ကတမာ ဝေဒနာ ဒူရေ? အကုသလာ ဝေဒနာ ကုသလာဗျာကတာဟိ ဝေဒနာဟိ ဒူရေ၊ ကုသလာဗျာကတာ ဝေဒနာ အကုသလာယ ဝေဒနာယ ဒူရေ၊ ကုသလာ ဝေဒနာ အကုသလာဗျာကတာဟိ ဝေဒနာဟိ ဒူရေ၊ အကုသလာဗျာကတာ ဝေဒနာ ကုသလာယ ဝေဒနာယ ဒူရေ၊ အဗျာကတာ ဝေဒနာ ကုသလာကုသလာဟိ ဝေဒနာဟိ ဒူရေ၊ ကုသလာကုသလာ ဝေဒနာ အဗျာကတာယ ဝေဒနာယ ဒူရေ. ဒုက္ခာ ဝေဒနာ သုခါယ စ အဒုက္ခမသုခါယ စ ဝေဒနာဟိ ဒူရေ၊ သုခါ စ အဒုက္ခမသုခါ စ ဝေဒနာ ဒုက္ခာယ ဝေဒနာယ ဒူရေ၊ သုခါ ဝေဒနာ ဒုက္ခာယ စ အဒုက္ခမသုခါယ စ ဝေဒနာဟိ ဒူရေ၊ ဒုက္ခာ စ အဒုက္ခမသုခါ စ ဝေဒနာ သုခါယ ဝေဒနာယ ဒူရေ၊ အဒုက္ခမသုခါ ဝေဒနာ သုခဒုက္ခာဟိ ဝေဒနာဟိ ဒူရေ၊ သုခဒုက္ခာ ဝေဒနာ အဒုက္ခမသုခါယ ဝေဒနာယ ဒူရေ. အသမာပန္နဿ ဝေဒနာ သမာပန္နဿ ဝေဒနာယ ဒူရေ၊ သမာပန္နဿ ဝေဒနာ အသမာပန္နဿ ဝေဒနာယ ဒူရေ. သာသဝါ ဝေဒနာ အနာသဝါယ ဝေဒနာယ ဒူရေ၊ အနာသဝါ ဝေဒနာ သာသဝါယ ဝေဒနာယ ဒူရေ – အယံ ဝုစ္စတိ ဝေဒနာ ဒူရေ.

တတ္ထ ကတမာ ဝေဒနာ သန္တိကေ? အကုသလာ ဝေဒနာ အကုသလာယ ဝေဒနာယ သန္တိကေ၊ ကုသလာ ဝေဒနာ ကုသလာယ ဝေဒနာယ သန္တိကေ၊ အဗျာကတာ ဝေဒနာ အဗျာကတာယ ဝေဒနာယ သန္တိကေ. ဒုက္ခာ ဝေဒနာ ဒုက္ခာယ ဝေဒနာယ သန္တိကေ၊ သုခါ ဝေဒနာ သုခါယ ဝေဒနာယ သန္တိကေ၊ အဒုက္ခမသုခါ ဝေဒနာ အဒုက္ခမသုခါယ ဝေဒနာယ သန္တိကေ. အသမာပန္နဿ ဝေဒနာ အသမာပန္နဿ ဝေဒနာယ သန္တိကေ၊ သမာပန္နဿ ဝေဒနာ သမာပန္နဿ ဝေဒနာယ သန္တိကေ. သာသဝါ ဝေဒနာ သာသဝါယ ဝေဒနာယ သန္တိကေ၊ အနာသဝါ ဝေဒနာ အနာသဝါယ ဝေဒနာယ သန္တိကေ. အယံ ဝုစ္စတိ ဝေဒနာ သန္တိကေ. တံ တံ ဝါ ပန ဝေဒနံ ဥပါဒါယုပါဒါယ ဝေဒနာ ဒူရေ သန္တိကေ ဒဋ္ဌဗ္ဗာ.

၃. သညာက္ခန္ဓော

၁၄. တတ္ထ ကတမော သညာက္ခန္ဓော? ယာ ကာစိ သညာ အတီတာနာဂတပစ္စုပ္ပန္နာ အဇ္ဈတ္တာ ဝါ ဗဟိဒ္ဓါ ဝါ ဩဠာရိကာ ဝါ သုခုမာ ဝါ ဟီနာ ဝါ ပဏီတာ ဝါ ယာ ဒူရေ သန္တိကေ ဝါ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ သညာက္ခန္ဓော.

၁၅. တတ္ထ ကတမာ သညာ အတီတာ? ယာ သညာ အတီတာ နိရုဒ္ဓါ ဝိဂတာ ဝိပရိဏတာ အတ္ထင်္ဂတာ အဗ္ဘတ္ထင်္ဂတာ ဥပ္ပဇ္ဇိတွာ ဝိဂတာ အတီတာ အတီတံသေန သင်္ဂဟိတာ၊ စက္ခုသမ္ဖဿဇာ သညာ သောတသမ္ဖဿဇာ သညာ ဃာနသမ္ဖဿဇာ သညာ ဇိဝှါသမ္ဖဿဇာ သညာ ကာယသမ္ဖဿဇာ သညာ မနောသမ္ဖဿဇာ သညာ – အယံ ဝုစ္စတိ သညာ အတီတာ.

တတ္ထ ကတမာ သညာ အနာဂတာ? ယာ သညာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင်္ဂဟိတာ၊ စက္ခုသမ္ဖဿဇာ သညာ သောတသမ္ဖဿဇာ သညာ ဃာနသမ္ဖဿဇာ သညာ ဇိဝှါသမ္ဖဿဇာ သညာ ကာယသမ္ဖဿဇာ သညာ မနောသမ္ဖဿဇာ သညာ – အယံ ဝုစ္စတိ သညာ အနာဂတာ.

တတ္ထ ကတမာ သညာ ပစ္စုပ္ပန္နာ? ယာ သညာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင်္ဂဟိတာ၊ စက္ခုသမ္ဖဿဇာ သညာ သောတသမ္ဖဿဇာ သညာ ဃာနသမ္ဖဿဇာ သညာ ဇိဝှါသမ္ဖဿဇာ သညာ ကာယသမ္ဖဿဇာ သညာ မနောသမ္ဖဿဇာ သညာ – အယံ ဝုစ္စတိ သညာ ပစ္စုပ္ပန္နာ.

၁၆. တတ္ထ ကတမာ သညာ အဇ္ဈတ္တာ? ယာ သညာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ စက္ခုသမ္ဖဿဇာ သညာ သောတသမ္ဖဿဇာ သညာ ဃာနသမ္ဖဿဇာ သညာ ဇိဝှါသမ္ဖဿဇာ သညာ ကာယသမ္ဖဿဇာ သညာ မနောသမ္ဖဿဇာ သညာ – အယံ ဝုစ္စတိ သညာ အဇ္ဈတ္တာ.

တတ္ထ ကတမာ သညာ ဗဟိဒ္ဓါ? ယာ သညာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ စက္ခုသမ္ဖဿဇာ သညာ သောတသမ္ဖဿဇာ သညာ ဃာနသမ္ဖဿဇာ သညာ ဇိဝှါသမ္ဖဿဇာ သညာ ကာယသမ္ဖဿဇာ သညာ မနောသမ္ဖဿဇာ သညာ – အယံ ဝုစ္စတိ သညာ ဗဟိဒ္ဓါ.

၁၇. တတ္ထ ကတမာ သညာ ဩဠာရိကာ သုခုမာ? ပဋိဃသမ္ဖဿဇာ သညာ ဩဠာရိကာ၊ အဓိဝစနသမ္ဖဿဇာ သညာ သုခုမာ. အကုသလာ သညာ ဩဠာရိကာ၊ ကုသလာဗျာကတာ သညာ သုခုမာ. ကုသလာကုသလာ သညာ ဩဠာရိကာ၊ အဗျာကတာ သညာ သုခုမာ. ဒုက္ခာယ ဝေဒနာယ သမ္ပယုတ္တာ သညာ ဩဠာရိကာ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သညာ သုခုမာ. သုခဒုက္ခာဟိ ဝေဒနာဟိ သမ္ပယုတ္တာ သညာ ဩဠာရိကာ၊ အဒုက္ခမသုခါယ ဝေဒနာယ သမ္ပယုတ္တာ သညာ သုခုမာ. အသမာပန္နဿ သညာ ဩဠာရိကာ၊ သမာပန္နဿ သညာ သုခုမာ. သာသဝါ သညာ ဩဠာရိကာ၊ အနာသဝါ သညာ သုခုမာ. တံ တံ ဝါ ပန သညံ ဥပါဒါယုပါဒါယ သညာ ဩဠာရိကာ သုခုမာ ဒဋ္ဌဗ္ဗာ.

၁၈. တတ္ထ ကတမာ သညာ ဟီနာ ပဏီတာ? အကုသလာ သညာ ဟီနာ၊ ကုသလာဗျာကတာ သညာ ပဏီတာ. ကုသလာကုသလာ သညာ ဟီနာ၊ အဗျာကတာ သညာ ပဏီတာ. ဒုက္ခာယ ဝေဒနာယ သမ္ပယုတ္တာ သညာ ဟီနာ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သညာ ပဏီတာ. သုခဒုက္ခာဟိ ဝေဒနာဟိ သမ္ပယုတ္တာ သညာ ဟီနာ၊ အဒုက္ခမသုခါယ ဝေဒနာယ သမ္ပယုတ္တာ သညာ ပဏီတာ. အသမာပန္နဿ သညာ ဟီနာ၊ သမာပန္နဿ သညာ ပဏီတာ. သာသဝါ သညာ ဟီနာ၊ အနာသဝါ သညာ ပဏီတာ. တံ တံ ဝါ ပန သညံ ဥပါဒါယုပါဒါယ သညာ ဟီနာ ပဏီတာ ဒဋ္ဌဗ္ဗာ.

၁၉. တတ္ထ ကတမာ သညာ ဒူရေ? အကုသလာ သညာ ကုသလာဗျာကတာဟိ သညာဟိ ဒူရေ၊ ကုသလာဗျာကတာ သညာ အကုသလာယ သညာယ ဒူရေ၊ ကုသလာ သညာ အကုသလာဗျာကတာဟိ သညာဟိ ဒူရေ၊ အကုသလာဗျာကတာ သညာ ကုသလာယ သညာယ ဒူရေ. အဗျာကတာ သညာ ကုသလာကုသလာဟိ သညာဟိ ဒူရေ၊ ကုသလာကုသလာ သညာ အဗျာကတာယ သညာယ ဒူရေ. ဒုက္ခာယ ဝေဒနာယ သမ္ပယုတ္တာ သညာ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာဟိ သညာဟိ ဒူရေ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သညာ ဒုက္ခာယ ဝေဒနာယ သမ္ပယုတ္တာယ သညာယ ဒူရေ၊ သုခါယ ဝေဒနာယ သမ္ပယုတ္တာ သညာ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တာဟိ သညာဟိ ဒူရေ၊ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တာ သညာ သုခါယ ဝေဒနာယ သမ္ပယုတ္တာယ သညာယ ဒူရေ၊ အဒုက္ခမသုခါယ ဝေဒနာယ သမ္ပယုတ္တာ သညာ သုခဒုက္ခာဟိ ဝေဒနာဟိ သမ္ပယုတ္တာဟိ သညာဟိ ဒူရေ၊ သုခဒုက္ခာဟိ ဝေဒနာဟိ သမ္ပယုတ္တာ သညာ အဒုက္ခမသုခါယ ဝေဒနာယ သမ္ပယုတ္တာယ သညာယ ဒူရေ. အသမာပန္နဿ သညာ သမာပန္နဿ သညာယ ဒူရေ၊ သမာပန္နဿ သညာ အသမာပန္နဿ သညာယ ဒူရေ. သာသဝါ သညာ အနာသဝါယ သညာယ ဒူရေ၊ အနာသဝါ သညာ သာသဝါယ သညာယ ဒူရေ – အယံ ဝုစ္စတိ သညာ ဒူရေ.

တတ္ထ ကတမာ သညာ သန္တိကေ? အကုသလာ သညာ အကုသလာယ သညာယ သန္တိကေ၊ ကုသလာ သညာ ကုသလာယ သညာယ သန္တိကေ၊ အဗျာကတာ သညာ အဗျာကတာယ သညာယ သန္တိကေ. ဒုက္ခာယ ဝေဒနာယ သမ္ပယုတ္တာ သညာ ဒုက္ခာယ ဝေဒနာယ သမ္ပယုတ္တာယ သညာယ သန္တိကေ၊ သုခါယ ဝေဒနာယ သမ္ပယုတ္တာ သညာ သုခါယ ဝေဒနာယ သမ္ပယုတ္တာယ သညာယ သန္တိကေ၊ အဒုက္ခမသုခါယ ဝေဒနာယ သမ္ပယုတ္တာ သညာ အဒုက္ခမသုခါယ ဝေဒနာယ သမ္ပယုတ္တာယ သညာယ သန္တိကေ. အသမာပန္နဿ သညာ အသမာပန္နဿ သညာယ သန္တိကေ၊ သမာပန္နဿ သညာ သမာပန္နဿ သညာယ သန္တိကေ. သာသဝါ သညာ သာသဝါယ သညာယ သန္တိကေ၊ အနာသဝါ သညာ အနာသဝါယ သညာယ သန္တိကေ. အယံ ဝုစ္စတိ သညာ သန္တိကေ. တံ တံ ဝါ ပန သညံ ဥပါဒါယုပါဒါယ သညာ ဒူရေ သန္တိကေ ဒဋ္ဌဗ္ဗာ.

၄. သင်္ခါရက္ခန္ဓော

၂၀. တတ္ထ ကတမော သင်္ခါရက္ခန္ဓော? ယေ ကေစိ သင်္ခါရာ အတီတာနာဂတပစ္စုပ္ပန္နာ အဇ္ဈတ္တာ ဝါ ဗဟိဒ္ဓါ ဝါ ဩဠာရိကာ ဝါ သုခုမာ ဝါ ဟီနာ ဝါ ပဏီတာ ဝါ ယေ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ သင်္ခါရက္ခန္ဓော.

၂၁. တတ္ထ ကတမေ သင်္ခါရာ အတီတာ? ယေ သင်္ခါရာ အတီတာ နိရုဒ္ဓါ ဝိဂတာ ဝိပရိဏတာ အတ္ထင်္ဂတာ အဗ္ဘတ္ထင်္ဂတာ ဥပ္ပဇ္ဇိတွာ ဝိဂတာ အတီတာ အတီတံသေန သင်္ဂဟိတာ၊ စက္ခုသမ္ဖဿဇာ စေတနာ သောတသမ္ဖဿဇာ စေတနာ ဃာနသမ္ဖဿဇာ စေတနာ ဇိဝှါသမ္ဖဿဇာ စေတနာ ကာယသမ္ဖဿဇာ စေတနာ မနောသမ္ဖဿဇာ စေတနာ – ဣမေ ဝုစ္စန္တိ သင်္ခါရာ အတီတာ.

တတ္ထ ကတမေ သင်္ခါရာ အနာဂတာ? ယေ သင်္ခါရာ အဇာတာ အဘူတာ အသဉ္ဇာတာ အနိဗ္ဗတ္တာ အနဘိနိဗ္ဗတ္တာ အပါတုဘူတာ အနုပ္ပန္နာ အသမုပ္ပန္နာ အနုဋ္ဌိတာ အသမုဋ္ဌိတာ အနာဂတာ အနာဂတံသေန သင်္ဂဟိတာ၊ စက္ခုသမ္ဖဿဇာ စေတနာ သောတသမ္ဖဿဇာ စေတနာ ဃာနသမ္ဖဿဇာ စေတနာ ဇိဝှါသမ္ဖဿဇာ စေတနာ ကာယသမ္ဖဿဇာ စေတနာ မနောသမ္ဖဿဇာ စေတနာ – ဣမေ ဝုစ္စန္တိ သင်္ခါရာ အနာဂတာ.

တတ္ထ ကတမေ သင်္ခါရာ ပစ္စုပ္ပန္နာ? ယေ သင်္ခါရာ ဇာတာ ဘူတာ သဉ္ဇာတာ နိဗ္ဗတ္တာ အဘိနိဗ္ဗတ္တာ ပါတုဘူတာ ဥပ္ပန္နာ သမုပ္ပန္နာ ဥဋ္ဌိတာ သမုဋ္ဌိတာ ပစ္စုပ္ပန္နာ ပစ္စုပ္ပန္နံသေန သင်္ဂဟိတာ၊ စက္ခုသမ္ဖဿဇာ စေတနာ သောတသမ္ဖဿဇာ စေတနာ ဃာနသမ္ဖဿဇာ စေတနာ ဇိဝှါသမ္ဖဿဇာ စေတနာ ကာယသမ္ဖဿဇာ စေတနာ မနောသမ္ဖဿဇာ စေတနာ – ဣမေ ဝုစ္စန္တိ သင်္ခါရာ ပစ္စုပ္ပန္နာ.

၂၂. တတ္ထ ကတမေ သင်္ခါရာ အဇ္ဈတ္တာ? ယေ သင်္ခါရာ တေသံ တေသံ သတ္တာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ စက္ခုသမ္ဖဿဇာ စေတနာ သောတသမ္ဖဿဇာ စေတနာ ဃာနသမ္ဖဿဇာ စေတနာ ဇိဝှါသမ္ဖဿဇာ စေတနာ ကာယသမ္ဖဿဇာ စေတနာ မနောသမ္ဖဿဇာ စေတနာ – ဣမေ ဝုစ္စန္တိ သင်္ခါရာ အဇ္ဈတ္တာ.

တတ္ထ ကတမေ သင်္ခါရာ ဗဟိဒ္ဓါ? ယေ သင်္ခါရာ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယကာ ပါဋိပုဂ္ဂလိကာ ဥပါဒိန္နာ၊ စက္ခုသမ္ဖဿဇာ စေတနာ သောတသမ္ဖဿဇာ စေတနာ ဃာနသမ္ဖဿဇာ စေတနာ ဇိဝှါသမ္ဖဿဇာ စေတနာ ကာယသမ္ဖဿဇာ စေတနာ မနောသမ္ဖဿဇာ စေတနာ – ဣမေ ဝုစ္စန္တိ သင်္ခါရာ ဗဟိဒ္ဓါ.

၂၃. တတ္ထ ကတမေ သင်္ခါရာ ဩဠာရိကာ သုခုမာ? အကုသလာ သင်္ခါရာ ဩဠာရိကာ၊ ကုသလာဗျာကတာ သင်္ခါရာ သုခုမာ. ကုသလာကုသလာ သင်္ခါရာ ဩဠာရိကာ၊ အဗျာကတာ သင်္ခါရာ သုခုမာ. ဒုက္ခာယ ဝေဒနာယ သမ္ပယုတ္တာ သင်္ခါရာ ဩဠာရိကာ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သင်္ခါရာ သုခုမာ. သုခဒုက္ခာဟိ ဝေဒနာဟိ သမ္ပယုတ္တာ သင်္ခါရာ ဩဠာရိကာ၊ အဒုက္ခမသုခါယ ဝေဒနာယ သမ္ပယုတ္တာ သင်္ခါရာ သုခုမာ. အသမာပန္နဿ သင်္ခါရာ ဩဠာရိကာ၊ သမာပန္နဿ သင်္ခါရာ သုခုမာ. သာသဝါ သင်္ခါရာ ဩဠာရိကာ၊ အနာသဝါ သင်္ခါရာ သုခုမာ. တေ တေ ဝါ ပန သင်္ခါရေ ဥပါဒါယုပါဒါယ သင်္ခါရာ ဩဠာရိကာ သုခုမာ ဒဋ္ဌဗ္ဗာ.

၂၄. တတ္ထ ကတမေ သင်္ခါရာ ဟီနာ ပဏီတာ? အကုသလာ သင်္ခါရာ ဟီနာ၊ ကုသလာဗျာကတာ သင်္ခါရာ ပဏီတာ. ကုသလာကုသလာ သင်္ခါရာ ဟီနာ၊ အဗျာကတာ သင်္ခါရာ ပဏီတာ. ဒုက္ခာယ ဝေဒနာယ သမ္ပယုတ္တာ သင်္ခါရာ ဟီနာ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သင်္ခါရာ ပဏီတာ. သုခဒုက္ခာဟိ ဝေဒနာဟိ သမ္ပယုတ္တာ သင်္ခါရာ ဟီနာ၊ အဒုက္ခမသုခါယ ဝေဒနာယ သမ္ပယုတ္တာ သင်္ခါရာ ပဏီတာ. အသမာပန္နဿ သင်္ခါရာ ဟီနာ၊ သမာပန္နဿ သင်္ခါရာ ပဏီတာ. သာသဝါ သင်္ခါရာ ဟီနာ၊ အနာသဝါ သင်္ခါရာ ပဏီတာ. တေ တေ ဝါ ပန သင်္ခါရေ ဥပါဒါယုပါဒါယ သင်္ခါရာ ဟီနာ ပဏီတာ ဒဋ္ဌဗ္ဗာ.

၂၅. တတ္ထ ကတမေ သင်္ခါရာ ဒူရေ? အကုသလာ သင်္ခါရာ ကုသလာဗျာကတေဟိ သင်္ခါရေဟိ ဒူရေ၊ ကုသလာဗျာကတာ သင်္ခါရာ အကုသလေဟိ သင်္ခါရေဟိ ဒူရေ၊ ကုသလာ သင်္ခါရာ အကုသလာဗျာကတေဟိ သင်္ခါရေဟိ ဒူရေ၊ အကုသလာဗျာကတာ သင်္ခါရာ ကုသလေဟိ သင်္ခါရေဟိ ဒူရေ၊ အဗျာကတာ သင်္ခါရာ ကုသလာကုသလေဟိ သင်္ခါရေဟိ ဒူရေ၊ ကုသလာကုသလာ သင်္ခါရာ အဗျာကတေဟိ သင်္ခါရေဟိ ဒူရေ. ဒုက္ခာယ ဝေဒနာယ သမ္ပယုတ္တာ သင်္ခါရာ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တေဟိ သင်္ခါရေဟိ ဒူရေ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ သင်္ခါရာ ဒုက္ခာယ ဝေဒနာယ သမ္ပယုတ္တေဟိ သင်္ခါရေဟိ ဒူရေ၊ သုခါယ ဝေဒနာယ သမ္ပယုတ္တာ သင်္ခါရာ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တေဟိ သင်္ခါရေဟိ ဒူရေ၊ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တာ သင်္ခါရာ သုခါယ ဝေဒနာယ သမ္ပယုတ္တေဟိ သင်္ခါရေဟိ ဒူရေ၊ အဒုက္ခမသုခါယ ဝေဒနာယ သမ္ပယုတ္တာ သင်္ခါရာ သုခဒုက္ခာဟိ ဝေဒနာဟိ သမ္ပယုတ္တေဟိ သင်္ခါရေဟိ ဒူရေ၊ သုခဒုက္ခာဟိ ဝေဒနာဟိ သမ္ပယုတ္တာ သင်္ခါရာ အဒုက္ခမသုခါယ ဝေဒနာယ သမ္ပယုတ္တေဟိ သင်္ခါရေဟိ ဒူရေ. အသမာပန္နဿ သင်္ခါရာ သမာပန္နဿ သင်္ခါရေဟိ ဒူရေ၊ သမာပန္နဿ သင်္ခါရာ အသမာပန္နဿ သင်္ခါရေဟိ ဒူရေ. သာသဝါ သင်္ခါရာ အနာသဝေဟိ သင်္ခါရေဟိ ဒူရေ၊ အနာသဝါ သင်္ခါရာ သာသဝေဟိ သင်္ခါရေဟိ ဒူရေ. ဣမေ ဝုစ္စန္တိ သင်္ခါရာ ဒူရေ.

တတ္ထ ကတမေ သင်္ခါရာ သန္တိကေ? အကုသလာ သင်္ခါရာ အကုသလာနံ သင်္ခါရာနံ သန္တိကေ၊ ကုသလာ သင်္ခါရာ ကုသလာနံ သင်္ခါရာနံ သန္တိကေ၊ အဗျာကတာ သင်္ခါရာ အဗျာကတာနံ သင်္ခါရာနံ သန္တိကေ. ဒုက္ခာယ ဝေဒနာယ သမ္ပယုတ္တာ သင်္ခါရာ ဒုက္ခာယ ဝေဒနာယ သမ္ပယုတ္တာနံ သင်္ခါရာနံ သန္တိကေ၊ သုခါယ ဝေဒနာယ သမ္ပယုတ္တာ သင်္ခါရာ သုခါယ ဝေဒနာယ သမ္ပယုတ္တာနံ သင်္ခါရာနံ သန္တိကေ၊ အဒုက္ခမသုခါယ ဝေဒနာယ သမ္ပယုတ္တာ သင်္ခါရာ အဒုက္ခမသုခါယ ဝေဒနာယ သမ္ပယုတ္တာနံ သင်္ခါရာနံ သန္တိကေ. အသမာပန္နဿ သင်္ခါရာ အသမာပန္နဿ သင်္ခါရာနံ သန္တိကေ၊ သမာပန္နဿ သင်္ခါရာ သမာပန္နဿ သင်္ခါရာနံ သန္တိကေ. သာသဝါ သင်္ခါရာ သာသဝါနံ သင်္ခါရာနံ သန္တိကေ၊ အနာသဝါ သင်္ခါရာ အနာသဝါနံ သင်္ခါရာနံ သန္တိကေ. ဣမေ ဝုစ္စန္တိ သင်္ခါရာ သန္တိကေ. တေ တေ ဝါ ပန သင်္ခါရေ ဥပါဒါယုပါဒါယ သင်္ခါရာ ဒူရေ သန္တိကေ ဒဋ္ဌဗ္ဗာ.

၅. ဝိညာဏက္ခန္ဓော

၂၆. တတ္ထ ကတမော ဝိညာဏက္ခန္ဓော? ယံ ကိဉ္စိ ဝိညာဏံ အတီတာနာဂတပစ္စုပ္ပန္နံ အဇ္ဈတ္တံ ဝါ ဗဟိဒ္ဓါ ဝါ ဩဠာရိကံ ဝါ သုခုမံ ဝါ ဟီနံ ဝါ ပဏီတံ ဝါ ယံ ဒူရေ သန္တိကေ ဝါ၊ တဒေကဇ္ဈံ အဘိသညူဟိတွာ အဘိသင်္ခိပိတွာ – အယံ ဝုစ္စတိ ဝိညာဏက္ခန္ဓော.

၂၇. တတ္ထ ကတမံ ဝိညာဏံ အတီတံ? ယံ ဝိညာဏံ အတီတံ နိရုဒ္ဓံ ဝိဂတံ ဝိပရိဏတံ အတ္ထင်္ဂတံ အဗ္ဘတ္ထင်္ဂတံ ဥပ္ပဇ္ဇိတွာ ဝိဂတံ အတီတံ အတီတံသေန သင်္ဂဟိတံ၊ စက္ခုဝိညာဏံ သောတဝိညာဏံ ဃာနဝိညာဏံ ဇိဝှါဝိညာဏံ ကာယဝိညာဏံ မနောဝိညာဏံ – ဣဒံ ဝုစ္စတိ ဝိညာဏံ အတီတံ.

တတ္ထ ကတမံ ဝိညာဏံ အနာဂတံ? ယံ ဝိညာဏံ အဇာတံ အဘူတံ အသဉ္ဇာတံ အနိဗ္ဗတ္တံ အနဘိနိဗ္ဗတ္တံ အပါတုဘူတံ အနုပ္ပန္နံ အသမုပ္ပန္နံ အနုဋ္ဌိတံ အသမုဋ္ဌိတံ အနာဂတံ အနာဂတံသေန သင်္ဂဟိတံ၊ စက္ခုဝိညာဏံ သောတဝိညာဏံ ဃာနဝိညာဏံ ဇိဝှါဝိညာဏံ ကာယဝိညာဏံ မနောဝိညာဏံ – ဣဒံ ဝုစ္စတိ ဝိညာဏံ အနာဂတံ.

တတ္ထ ကတမံ ဝိညာဏံ ပစ္စုပ္ပန္နံ? ယံ ဝိညာဏံ ဇာတံ ဘူတံ သဉ္ဇာတံ နိဗ္ဗတ္တံ အဘိနိဗ္ဗတ္တံ ပါတုဘူတံ ဥပ္ပန္နံ သမုပ္ပန္နံ ဥဋ္ဌိတံ သမုဋ္ဌိတံ ပစ္စုပ္ပန္နံ ပစ္စုပ္ပန္နံသေန သင်္ဂဟိတံ၊ စက္ခုဝိညာဏံ သောတဝိညာဏံ ဃာနဝိညာဏံ ဇိဝှါဝိညာဏံ ကာယဝိညာဏံ မနောဝိညာဏံ – ဣဒံ ဝုစ္စတိ ဝိညာဏံ ပစ္စုပ္ပန္နံ.

၂၈. တတ္ထ ကတမံ ဝိညာဏံ အဇ္ဈတ္တံ? ယံ ဝိညာဏံ တေသံ တေသံ သတ္တာနံ အဇ္ဈတ္တံ ပစ္စတ္တံ နိယကံ ပါဋိပုဂ္ဂလိကံ ဥပါဒိန္နံ၊ စက္ခုဝိညာဏံ သောတဝိညာဏံ ဃာနဝိညာဏံ ဇိဝှါဝိညာဏံ ကာယဝိညာဏံ မနောဝိညာဏံ – ဣဒံ ဝုစ္စတိ ဝိညာဏံ အဇ္ဈတ္တံ.

တတ္ထ ကတမံ ဝိညာဏံ ဗဟိဒ္ဓါ? ယံ ဝိညာဏံ တေသံ တေသံ ပရသတ္တာနံ ပရပုဂ္ဂလာနံ အဇ္ဈတ္တံ ပစ္စတ္တံ နိယကံ ပါဋိပုဂ္ဂလိကံ ဥပါဒိန္နံ၊ စက္ခုဝိညာဏံ သောတဝိညာဏံ ဃာနဝိညာဏံ ဇိဝှါဝိညာဏံ ကာယဝိညာဏံ မနောဝိညာဏံ – ဣဒံ ဝုစ္စတိ ဝိညာဏံ ဗဟိဒ္ဓါ.

၂၉. တတ္ထ ကတမံ ဝိညာဏံ ဩဠာရိကံ သုခုမံ? အကုသလံ ဝိညာဏံ ဩဠာရိကံ၊ ကုသလာဗျာကတာ ဝိညာဏာ သုခုမာ. ကုသလာကုသလာ ဝိညာဏာ ဩဠာရိကာ၊ အဗျာကတံ ဝိညာဏံ သုခုမံ. ဒုက္ခာယ ဝေဒနာယ သမ္ပယုတ္တံ ဝိညာဏံ ဩဠာရိကံ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ ဝိညာဏာ သုခုမာ. သုခဒုက္ခာဟိ ဝေဒနာဟိ သမ္ပယုတ္တာ ဝိညာဏာ ဩဠာရိကာ၊ အဒုက္ခမသုခါယ ဝေဒနာယ သမ္ပယုတ္တံ ဝိညာဏံ သုခုမံ. အသမာပန္နဿ ဝိညာဏံ ဩဠာရိကံ၊ သမာပန္နဿ ဝိညာဏံ သုခုမံ. သာသဝံ ဝိညာဏံ ဩဠာရိကံ၊ အနာသဝံ ဝိညာဏံ သုခုမံ. တံ တံ ဝါ ပန ဝိညာဏံ ဥပါဒါယုပါဒါယ ဝိညာဏံ ဩဠာရိကံ သုခုမံ ဒဋ္ဌဗ္ဗံ.

၃၀. တတ္ထ ကတမံ ဝိညာဏံ ဟီနံ ပဏီတံ? အကုသလံ ဝိညာဏံ ဟီနံ၊ ကုသလာဗျာကတာ ဝိညာဏာ ပဏီတာ. ကုသလာကုသလာ ဝိညာဏာ ဟီနာ၊ အဗျာကတံ ဝိညာဏံ ပဏီတံ. ဒုက္ခာယ ဝေဒနာယ သမ္ပယုတ္တံ ဝိညာဏံ ဟီနံ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ ဝိညာဏာ ပဏီတာ. သုခဒုက္ခာဟိ ဝေဒနာဟိ သမ္ပယုတ္တာ ဝိညာဏာ ဟီနာ၊ အဒုက္ခမသုခါယ ဝေဒနာယ သမ္ပယုတ္တံ ဝိညာဏံ ပဏီတံ. အသမာပန္နဿ ဝိညာဏံ ဟီနံ၊ သမာပန္နဿ ဝိညာဏံ ပဏီတံ. သာသဝံ ဝိညာဏံ ဟီနံ၊ အနာသဝံ ဝိညာဏံ ပဏီတံ. တံ တံ ဝါ ပန ဝိညာဏံ ဥပါဒါယုပါဒါယ ဝိညာဏံ ဟီနံ ပဏီတံ ဒဋ္ဌဗ္ဗံ.

၃၁. တတ္ထ ကတမံ ဝိညာဏံ ဒူရေ? အကုသလံ ဝိညာဏံ ကုသလာဗျာကတေဟိ ဝိညာဏေဟိ ဒူရေ၊ ကုသလာဗျာကတာ ဝိညာဏာ အကုသလာ ဝိညာဏာ ဒူရေ၊ ကုသလံ ဝိညာဏံ အကုသလာဗျာကတေဟိ ဝိညာဏေဟိ ဒူရေ၊ အကုသလာဗျာကတာ ဝိညာဏာ ကုသလာ ဝိညာဏာ ဒူရေ၊ အဗျာကတံ ဝိညာဏံ ကုသလာကုသလေဟိ ဝိညာဏေဟိ ဒူရေ၊ ကုသလာကုသလာ ဝိညာဏာ အဗျာကတာ ဝိညာဏာ ဒူရေ. ဒုက္ခာယ ဝေဒနာယ သမ္ပယုတ္တံ ဝိညာဏံ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တေဟိ ဝိညာဏေဟိ ဒူရေ၊ သုခါယ စ အဒုက္ခမသုခါယ စ ဝေဒနာဟိ သမ္ပယုတ္တာ ဝိညာဏာ ဒုက္ခာယ ဝေဒနာယ သမ္ပယုတ္တာ ဝိညာဏာ ဒူရေ၊ သုခါယ ဝေဒနာယ သမ္ပယုတ္တံ ဝိညာဏံ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တေဟိ ဝိညာဏေဟိ ဒူရေ၊ ဒုက္ခာယ စ အဒုက္ခမသုခါယ စ ဝေဒနာဟိ သမ္ပယုတ္တာ ဝိညာဏာ သုခါယ ဝေဒနာယ သမ္ပယုတ္တာ ဝိညာဏာ ဒူရေ၊ အဒုက္ခမသုခါယ ဝေဒနာယ သမ္ပယုတ္တံ ဝိညာဏံ သုခဒုက္ခာဟိ ဝေဒနာဟိ သမ္ပယုတ္တေဟိ ဝိညာဏေဟိ ဒူရေ၊ သုခဒုက္ခာဟိ ဝေဒနာဟိ သမ္ပယုတ္တာ ဝိညာဏာ အဒုက္ခမသုခါယ ဝေဒနာယ သမ္ပယုတ္တာ ဝိညာဏာ ဒူရေ. အသမာပန္နဿ ဝိညာဏံ သမာပန္နဿ ဝိညာဏာ ဒူရေ၊ သမာပန္နဿ ဝိညာဏံ အသမာပန္နဿ ဝိညာဏာ ဒူရေ. သာသဝံ ဝိညာဏံ အနာသဝါ ဝိညာဏာ ဒူရေ၊ အနာသဝံ ဝိညာဏံ သာသဝါ ဝိညာဏာ ဒူရေ – ဣဒံ ဝုစ္စတိ ဝိညာဏံ ဒူရေ.

တတ္ထ ကတမံ ဝိညာဏံ သန္တိကေ? အကုသလံ ဝိညာဏံ အကုသလဿ ဝိညာဏဿ သန္တိကေ၊ ကုသလံ ဝိညာဏံ ကုသလဿ ဝိညာဏဿ သန္တိကေ၊ အဗျာကတံ ဝိညာဏံ အဗျာကတဿ ဝိညာဏဿ သန္တိကေ. ဒုက္ခာယ ဝေဒနာယ သမ္ပယုတ္တံ ဝိညာဏံ ဒုက္ခာယ ဝေဒနာယ သမ္ပယုတ္တဿ ဝိညာဏဿ သန္တိကေ၊ သုခါယ ဝေဒနာယ သမ္ပယုတ္တံ ဝိညာဏံ သုခါယ ဝေဒနာယ သမ္ပယုတ္တဿ ဝိညာဏဿ သန္တိကေ၊ အဒုက္ခမသုခါယ ဝေဒနာယ သမ္ပယုတ္တံ ဝိညာဏံ အဒုက္ခမသုခါယ ဝေဒနာယ သမ္ပယုတ္တဿ ဝိညာဏဿ သန္တိကေ. အသမာပန္နဿ ဝိညာဏံ အသမာပန္နဿ ဝိညာဏဿ သန္တိကေ၊ သမာပန္နဿ ဝိညာဏံ သမာပန္နဿ ဝိညာဏဿ သန္တိကေ. သာသဝံ ဝိညာဏံ သာသဝဿ ဝိညာဏဿ သန္တိကေ၊ အနာသဝံ ဝိညာဏံ အနာသဝဿ ဝိညာဏဿ သန္တိကေ – ဣဒံ ဝုစ္စတိ ဝိညာဏံ သန္တိကေ. တံ တံ ဝါ ပန ဝိညာဏံ ဥပါဒါယုပါဒါယ ဝိညာဏံ ဒူရေ သန္တိကေ ဒဋ္ဌဗ္ဗံ.

သုတ္တန္တဘာဇနီယံ.

၂. အဘိဓမ္မဘာဇနီယံ

၃၂. ပဉ္စက္ခန္ဓာ – ရူပက္ခန္ဓော၊ ဝေဒနာက္ခန္ဓော၊ သညာက္ခန္ဓော၊ သင်္ခါရက္ခန္ဓော၊ ဝိညာဏက္ခန္ဓော.

၁. ရူပက္ခန္ဓော

၃၃. တတ္ထ ကတမော ရူပက္ခန္ဓော? ဧကဝိဓေန ရူပက္ခန္ဓော – သဗ္ဗံ ရူပံ န ဟေတု၊ အဟေတုကံ၊ ဟေတုဝိပ္ပယုတ္တံ၊ သပ္ပစ္စယံ၊ သင်္ခတံ၊ ရူပံ၊ လောကိယံ၊ သာသဝံ၊ သံယောဇနိယံ၊ ဂန္ထနိယံ၊ ဩဃနိယံ၊ ယောဂနိယံ၊ နီဝရဏိယံ၊ ပရာမဋ္ဌံ၊ ဥပါဒါနိယံ၊ သံကိလေသိကံ၊ အဗျာကတံ၊ အနာရမ္မဏံ၊ အစေတသိကံ၊ စိတ္တဝိပ္ပယုတ္တံ၊ နေဝဝိပါကနဝိပါကဓမ္မဓမ္မံ၊ အသံကိလိဋ္ဌသံကိလေသိကံ၊ န သဝိတက္ကသဝိစာရံ၊ န အဝိတက္ကဝိစာရမတ္တံ၊ အဝိတက္ကအဝိစာရံ၊ န ပီတိသဟဂတံ၊ န သုခသဟဂတံ၊ န ဥပေက္ခာသဟဂတံ၊ နေဝ ဒဿနေန န ဘာဝနာယ ပဟာတဗ္ဗံ၊ နေဝ ဒဿနေန န ဘာဝနာယ ပဟာတဗ္ဗဟေတုကံ၊ နေဝါစယဂါမိနာပစယဂါမီ၊ နေဝသေက္ခနာသေက္ခံ၊ ပရိတ္တံ၊ ကာမာဝစရံ၊ န ရူပါဝစရံ၊ န အရူပါဝစရံ၊ ပရိယာပန္နံ၊ နော အပရိယာပန္နံ၊ အနိယတံ၊ အနိယျာနိကံ၊ ဥပ္ပန္နံ၊ ဆဟိ ဝိညာဏေဟိ ဝိညေယျံ၊ အနိစ္စံ၊ ဇရာဘိဘူတံ. ဧဝံ ဧကဝိဓေန ရူပက္ခန္ဓော.

ဒုဝိဓေန ရူပက္ခန္ဓော – အတ္ထိ ရူပံ ဥပါဒါ၊ အတ္ထိ ရူပံ နော ဥပါဒါ [နုပါဒါ (သီ. က.)]. အတ္ထိ ရူပံ ဥပါဒိန္နံ၊ အတ္ထိ ရူပံ အနုပါဒိန္နံ. အတ္ထိ ရူပံ ဥပါဒိန္နုပါဒါနိယံ၊ အတ္ထိ ရူပံ အနုပါဒိန္နုပါဒါနိယံ. အတ္ထိ ရူပံ သနိဒဿနံ၊ အတ္ထိ ရူပံ အနိဒဿနံ. အတ္ထိ ရူပံ သပ္ပဋိဃံ၊ အတ္ထိ ရူပံ အပ္ပဋိဃံ. အတ္ထိ ရူပံ ဣန္ဒြိယံ၊ အတ္ထိ ရူပံ န ဣန္ဒြိယံ. အတ္ထိ ရူပံ မဟာဘူတံ၊ အတ္ထိ ရူပံ န မဟာဘူတံ. အတ္ထိ ရူပံ ဝိညတ္တိ၊ အတ္ထိ ရူပံ န ဝိညတ္တိ. အတ္ထိ ရူပံ စိတ္တသမုဋ္ဌာနံ၊ အတ္ထိ ရူပံ န စိတ္တသမုဋ္ဌာနံ. အတ္ထိ ရူပံ စိတ္တသဟဘု၊ အတ္ထိ ရူပံ န စိတ္တသဟဘု. အတ္ထိ ရူပံ စိတ္တာနုပရိဝတ္တိ၊ အတ္ထိ ရူပံ န စိတ္တာနုပရိဝတ္တိ. အတ္ထိ ရူပံ အဇ္ဈတ္တိကံ၊ အတ္ထိ ရူပံ ဗာဟိရံ. အတ္ထိ ရူပံ ဩဠာရိကံ၊ အတ္ထိ ရူပံ သုခုမံ. အတ္ထိ ရူပံ ဒူရေ၊ အတ္ထိ ရူပံ သန္တိကေ။ပေ။ အတ္ထိ ရူပံ ကဗဠီကာရော အာဟာရော၊ အတ္ထိ ရူပံ န ကဗဠီကာရော အာဟာရော. ဧဝံ ဒုဝိဓေန ရူပက္ခန္ဓော.

(ယထာ ရူပကဏ္ဍေ ဝိဘတ္တံ၊ တထာ ဣဓ ဝိဘဇိတဗ္ဗံ.)

တိဝိဓေန ရူပက္ခန္ဓော – ယံ တံ ရူပံ အဇ္ဈတ္တိကံ တံ ဥပါဒါ၊ ယံ တံ ရူပံ ဗာဟိရံ တံ အတ္ထိ ဥပါဒါ၊ အတ္ထိ နော ဥပါဒါ. ယံ တံ ရူပံ အဇ္ဈတ္တိကံ တံ ဥပါဒိန္နံ၊ ယံ တံ ရူပံ ဗာဟိရံ တံ အတ္ထိ ဥပါဒိန္နံ၊ အတ္ထိ အနုပါဒိန္နံ. ယံ တံ ရူပံ အဇ္ဈတ္တိကံ တံ ဥပါဒိန္နုပါဒါနိယံ၊ ယံ တံ ရူပံ ဗာဟိရံ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ။ပေ။ ယံ တံ ရူပံ အဇ္ဈတ္တိကံ တံ န ကဗဠီကာရော အာဟာရော၊ ယံ တံ ရူပံ ဗာဟိရံ တံ အတ္ထိ ကဗဠီကာရော အာဟာရော၊ အတ္ထိ န ကဗဠီကာရော အာဟာရော. ဧဝံ တိဝိဓေန ရူပက္ခန္ဓော.

စတုဗ္ဗိဓေန ရူပက္ခန္ဓော – ယံ တံ ရူပံ ဥပါဒါ တံ အတ္ထိ ဥပါဒိန္နံ၊ အတ္ထိ အနုပါဒိန္နံ၊ ယံ တံ ရူပံ နော ဥပါဒါ တံ အတ္ထိ ဥပါဒိန္နံ၊ အတ္ထိ အနုပါဒိန္နံ. ယံ တံ ရူပံ ဥပါဒါ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ၊ ယံ တံ ရူပံ နော ဥပါဒါ တံ အတ္ထိ ဥပါဒိန္နုပါဒါနိယံ၊ အတ္ထိ အနုပါဒိန္နုပါဒါနိယံ. ယံ တံ ရူပံ ဥပါဒါ တံ အတ္ထိ သပ္ပဋိဃံ၊ အတ္ထိ အပ္ပဋိဃံ၊ ယံ တံ ရူပံ နော ဥပါဒါ တံ အတ္ထိ သပ္ပဋိဃံ၊ အတ္ထိ အပ္ပဋိဃံ. ယံ တံ ရူပံ ဥပါဒါ တံ အတ္ထိ ဩဠာရိကံ၊ အတ္ထိ သုခုမံ၊ ယံ တံ ရူပံ နော ဥပါဒါ တံ အတ္ထိ ဩဠာရိကံ၊ အတ္ထိ သုခုမံ. ယံ တံ ရူပံ ဥပါဒါ တံ အတ္ထိ ဒူရေ၊ အတ္ထိ သန္တိကေ၊ ယံ တံ ရူပံ နော ဥပါဒါ တံ အတ္ထိ ဒူရေ၊ အတ္ထိ သန္တိကေ။ပေ။ ဒိဋ္ဌံ၊ သုတံ၊ မုတံ၊ ဝိညာတံ ရူပံ. ဧဝံ စတုဗ္ဗိဓေန ရူပက္ခန္ဓော.

ပဉ္စဝိဓေန ရူပက္ခန္ဓော – ပထဝီဓာတု၊ အာပေါဓာတု၊ တေဇောဓာတု၊ ဝါယောဓာတု၊ ယဉ္စ ရူပံ ဥပါဒါ. ဧဝံ ပဉ္စဝိဓေန ရူပက္ခန္ဓော.

ဆဗ္ဗိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ၊ မနောဝိညေယျံ ရူပံ. ဧဝံ ဆဗ္ဗိဓေန ရူပက္ခန္ဓော.

သတ္တဝိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ၊ မနောဓာတုဝိညေယျံ ရူပံ၊ မနောဝိညာဏဓာတုဝိညေယျံ ရူပံ. ဧဝံ သတ္တဝိဓေန ရူပက္ခန္ဓော.

အဋ္ဌဝိဓေန ရူပက္ခန္ဓော – စက္ခုဝိညေယျံ ရူပံ၊ သောတဝိညေယျံ ရူပံ၊ ဃာနဝိညေယျံ ရူပံ၊ ဇိဝှါဝိညေယျံ ရူပံ၊ ကာယဝိညေယျံ ရူပံ အတ္ထိ သုခသမ္ဖဿံ၊ အတ္ထိ ဒုက္ခသမ္ဖဿံ၊ မနောဓာတုဝိညေယျံ ရူပံ၊ မနောဝိညာဏဓာတုဝိညေယျံ ရူပံ. ဧဝံ အဋ္ဌဝိဓေန ရူပက္ခန္ဓော.

နဝဝိဓေန ရူပက္ခန္ဓော – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ ယဉ္စ ရူပံ န ဣန္ဒြိယံ. ဧဝံ နဝဝိဓေန ရူပက္ခန္ဓော.

ဒသဝိဓေန ရူပက္ခန္ဓော – စက္ခုန္ဒြိယံ၊ သောတိန္ဒြိယံ၊ ဃာနိန္ဒြိယံ၊ ဇိဝှိန္ဒြိယံ၊ ကာယိန္ဒြိယံ၊ ဣတ္ထိန္ဒြိယံ၊ ပုရိသိန္ဒြိယံ၊ ဇီဝိတိန္ဒြိယံ၊ န ဣန္ဒြိယံ ရူပံ အတ္ထိ သပ္ပဋိဃံ၊ အတ္ထိ အပ္ပဋိဃံ. ဧဝံ ဒသဝိဓေန ရူပက္ခန္ဓော.

ဧကာဒသဝိဓေန ရူပက္ခန္ဓော – စက္ခာယတနံ၊ သောတာယတနံ၊ ဃာနာယတနံ၊ ဇိဝှါယတနံ၊ ကာယာယတနံ၊ ရူပါယတနံ၊ သဒ္ဒါယတနံ၊ ဂန္ဓာယတနံ၊ ရသာယတနံ၊ ဖောဋ္ဌဗ္ဗာယတနံ၊ ယဉ္စ ရူပံ အနိဒဿနအပ္ပဋိဃံ ဓမ္မာယတနပရိယာပန္နံ. ဧဝံ ဧကာဒသဝိဓေန ရူပက္ခန္ဓော.

အယံ ဝုစ္စတိ ရူပက္ခန္ဓော.

၂. ဝေဒနာက္ခန္ဓော

၃၄. တတ္ထ ကတမော ဝေဒနာက္ခန္ဓော? ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော.

စတုဗ္ဗိဓေန ဝေဒနာက္ခန္ဓော – အတ္ထိ ကာမာဝစရော၊ အတ္ထိ ရူပါဝစရော၊ အတ္ထိ အရူပါဝစရော၊ အတ္ထိ အပရိယာပန္နော.

ပဉ္စဝိဓေန ဝေဒနာက္ခန္ဓော – အတ္ထိ သုခိန္ဒြိယံ၊ အတ္ထိ ဒုက္ခိန္ဒြိယံ၊ အတ္ထိ သောမနဿိန္ဒြိယံ၊ အတ္ထိ ဒေါမနဿိန္ဒြိယံ၊ အတ္ထိ ဥပေက္ခိန္ဒြိယံ. ဧဝံ ပဉ္စဝိဓေန ဝေဒနာက္ခန္ဓော.

ဆဗ္ဗိဓေန ဝေဒနာက္ခန္ဓော – စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ၊ မနောသမ္ဖဿဇာ ဝေဒနာ. ဧဝံ ဆဗ္ဗိဓေန ဝေဒနာက္ခန္ဓော.

သတ္တဝိဓေန ဝေဒနာက္ခန္ဓော – စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ၊ မနောဓာတုသမ္ဖဿဇာ ဝေဒနာ၊ မနောဝိညာဏဓာတုသမ္ဖဿဇာ ဝေဒနာ. ဧဝံ သတ္တဝိဓေန ဝေဒနာက္ခန္ဓော.

အဋ္ဌဝိဓေန ဝေဒနာက္ခန္ဓော – စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ အတ္ထိ သုခါ၊ အတ္ထိ ဒုက္ခာ၊ မနောဓာတုသမ္ဖဿဇာ ဝေဒနာ၊ မနောဝိညာဏဓာတုသမ္ဖဿဇာ ဝေဒနာ. ဧဝံ အဋ္ဌဝိဓေန ဝေဒနာက္ခန္ဓော.

နဝဝိဓေန ဝေဒနာက္ခန္ဓော – စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ၊ မနောဓာတုသမ္ဖဿဇာ ဝေဒနာ၊ မနောဝိညာဏဓာတုသမ္ဖဿဇာ ဝေဒနာ အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ နဝဝိဓေန ဝေဒနာက္ခန္ဓော.

ဒသဝိဓေန ဝေဒနာက္ခန္ဓော – စက္ခုသမ္ဖဿဇာ ဝေဒနာ၊ သောတသမ္ဖဿဇာ ဝေဒနာ၊ ဃာနသမ္ဖဿဇာ ဝေဒနာ၊ ဇိဝှါသမ္ဖဿဇာ ဝေဒနာ၊ ကာယသမ္ဖဿဇာ ဝေဒနာ အတ္ထိ သုခါ၊ အတ္ထိ ဒုက္ခာ၊ မနောဓာတုသမ္ဖဿဇာ ဝေဒနာ၊ မနောဝိညာဏဓာတုသမ္ဖဿဇာ ဝေဒနာ အတ္ထိ ကုသလာ၊ အတ္ထိ အကုသလာ၊ အတ္ထိ အဗျာကတာ. ဧဝံ ဒသဝိဓေန ဝေဒနာက္ခန္ဓော.

၃၅. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝေဒနာက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော. အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော. အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော. အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော. အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော. အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ. အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော. အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော. အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော. အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော. အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော. အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ. အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ. အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော. အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော. အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ. အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝေဒနာက္ခန္ဓော.

၃၆. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော။ပေ။ အတ္ထိ န ဟေတုသဟေတုကော၊ အတ္ထိ န ဟေတုအဟေတုကော. အတ္ထိ လောကိယော၊ အတ္ထိ လောကုတ္တရော. အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော. အတ္ထိ သာသဝေါ၊ အတ္ထိ အနာသဝေါ. အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော. အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ. အတ္ထိ သံယောဇနိယော၊ အတ္ထိ အသံယောဇနိယော. အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော. အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော. အတ္ထိ ဂန္ထနိယော၊ အတ္ထိ အဂန္ထနိယော. အတ္ထိ ဂန္ထသမ္ပယုတ္တော၊ အတ္ထိ ဂန္ထဝိပ္ပယုတ္တော. အတ္ထိ ဂန္ထဝိပ္ပယုတ္တဂန္ထနိယော၊ အတ္ထိ ဂန္ထဝိပ္ပယုတ္တအဂန္ထနိယော. အတ္ထိ ဩဃနိယော၊ အတ္ထိ အနောဃနိယော. အတ္ထိ ဩဃသမ္ပယုတ္တော၊ အတ္ထိ ဩဃဝိပ္ပယုတ္တော. အတ္ထိ ဩဃဝိပ္ပယုတ္တဩဃနိယော၊ အတ္ထိ ဩဃဝိပ္ပယုတ္တအနောဃနိယော. အတ္ထိ ယောဂနိယော၊ အတ္ထိ အယောဂနိယော. အတ္ထိ ယောဂသမ္ပယုတ္တော၊ အတ္ထိ ယောဂဝိပ္ပယုတ္တော. အတ္ထိ ယောဂဝိပ္ပယုတ္တယောဂနိယော၊ အတ္ထိ ယောဂဝိပ္ပယုတ္တအယောဂနိယော. အတ္ထိ နီဝရဏိယော၊ အတ္ထိ အနီဝရဏိယော. အတ္ထိ နီဝရဏသမ္ပယုတ္တော၊ အတ္ထိ နီဝရဏဝိပ္ပယုတ္တော. အတ္ထိ နီဝရဏဝိပ္ပယုတ္တနီဝရဏိယော၊ အတ္ထိ နီဝရဏဝိပ္ပယုတ္တအနီဝရဏိယော. အတ္ထိ ပရာမဋ္ဌော၊ အတ္ထိ အပရာမဋ္ဌော. အတ္ထိ ပရာမာသသမ္ပယုတ္တော၊ အတ္ထိ ပရာမာသဝိပ္ပယုတ္တော. အတ္ထိ ပရာမာသဝိပ္ပယုတ္တပရာမဋ္ဌော၊ အတ္ထိ ပရာမာသဝိပ္ပယုတ္တအပရာမဋ္ဌော. အတ္ထိ ဥပါဒိန္နော၊ အတ္ထိ အနုပါဒိန္နော. အတ္ထိ ဥပါဒါနိယော၊ အတ္ထိ အနုပါဒါနိယော. အတ္ထိ ဥပါဒါနသမ္ပယုတ္တော၊ အတ္ထိ ဥပါဒါနဝိပ္ပယုတ္တော. အတ္ထိ ဥပါဒါနဝိပ္ပယုတ္တဥပါဒါနိယော၊ အတ္ထိ ဥပါဒါနဝိပ္ပယုတ္တအနုပါဒါနိယော. အတ္ထိ သံကိလေသိကော၊ အတ္ထိ အသံကိလေသိကော. အတ္ထိ သံကိလိဋ္ဌော၊ အတ္ထိ အသံကိလိဋ္ဌော. အတ္ထိ ကိလေသသမ္ပယုတ္တော၊ အတ္ထိ ကိလေသဝိပ္ပယုတ္တော. အတ္ထိ ကိလေသဝိပ္ပယုတ္တသံကိလေသိကော၊ အတ္ထိ ကိလေသဝိပ္ပယုတ္တအသံကိလေသိကော. အတ္ထိ ဒဿနေန ပဟာတဗ္ဗော၊ အတ္ထိ န ဒဿနေန ပဟာတဗ္ဗော. အတ္ထိ ဘာဝနာယ ပဟာတဗ္ဗော၊ အတ္ထိ န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ န ဒဿနေန ပဟာတဗ္ဗဟေတုကော. အတ္ထိ ဘာဝနာယ ပဟာတဗ္ဗဟေတုကော၊ အတ္ထိ န ဘာဝနာယ ပဟာတဗ္ဗဟေတုကော. အတ္ထိ သဝိတက္ကော၊ အတ္ထိ အဝိတက္ကော. အတ္ထိ သဝိစာရော၊ အတ္ထိ အဝိစာရော. အတ္ထိ သပ္ပီတိကော၊ အတ္ထိ အပ္ပီတိကော. အတ္ထိ ပီတိသဟဂတော၊ အတ္ထိ န ပီတိသဟဂတော. အတ္ထိ ကာမာဝစရော၊ အတ္ထိ န ကာမာဝစရော. အတ္ထိ ရူပါဝစရော၊ အတ္ထိ န ရူပါဝစရော. အတ္ထိ အရူပါဝစရော၊ အတ္ထိ န အရူပါဝစရော. အတ္ထိ ပရိယာပန္နော၊ အတ္ထိ အပရိယာပန္နော. အတ္ထိ နိယျာနိကော၊ အတ္ထိ အနိယျာနိကော. အတ္ထိ နိယတော၊ အတ္ထိ အနိယတော. အတ္ထိ သဥတ္တရော၊ အတ္ထိ အနုတ္တရော. အတ္ထိ သရဏော၊ အတ္ထိ အရဏော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝေဒနာက္ခန္ဓော.

၃၇. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သရဏော၊ အတ္ထိ အရဏော.

တိဝိဓေန ဝေဒနာက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော. အတ္ထိ ဥပါဒိန္နုပါဒါနိယော။ပေ။ အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝေဒနာက္ခန္ဓော.

ဒုကမူလကံ.

၃၈. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝေဒနာက္ခန္ဓော.

၃၉. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝေဒနာက္ခန္ဓော.

၄၀. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ န ဟေတုသဟေတုကော၊ အတ္ထိ န ဟေတုအဟေတုကော. အတ္ထိ လောကိယော၊ အတ္ထိ လောကုတ္တရော. အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော. အတ္ထိ သာသဝေါ၊ အတ္ထိ အနာသဝေါ. အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော. အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ။ပေ။ အတ္ထိ သရဏော၊ အတ္ထိ အရဏော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝေဒနာက္ခန္ဓော.

၄၁. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝေဒနာက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော. အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော. အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော. အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော. အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော. အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော. အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ. အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော. အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော. အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော. အတ္ထိ ဟီနော၊ အတ္ထိ မဇ္ဈိမော၊ အတ္ထိ ပဏီတော. အတ္ထိ မိစ္ဆတ္တနိယတော၊ အတ္ထိ သမ္မတ္တနိယတော၊ အတ္ထိ အနိယတော. အတ္ထိ မဂ္ဂါရမ္မဏော၊ အတ္ထိ မဂ္ဂဟေတုကော၊ အတ္ထိ မဂ္ဂါဓိပတိ. အတ္ထိ ဥပ္ပန္နော၊ အတ္ထိ အနုပ္ပန္နော၊ အတ္ထိ ဥပ္ပါဒီ. အတ္ထိ အတီတော၊ အတ္ထိ အနာဂတော၊ အတ္ထိ ပစ္စုပ္ပန္နော. အတ္ထိ အတီတာရမ္မဏော၊ အတ္ထိ အနာဂတာရမ္မဏော၊ အတ္ထိ ပစ္စုပ္ပန္နာရမ္မဏော. အတ္ထိ အဇ္ဈတ္တော၊ အတ္ထိ ဗဟိဒ္ဓေါ၊ အတ္ထိ အဇ္ဈတ္တဗဟိဒ္ဓေါ. အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝေဒနာက္ခန္ဓော.

၄၂. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော. အတ္ထိ န ဟေတုသဟေတုကော၊ အတ္ထိ န ဟေတုအဟေတုကော. အတ္ထိ လောကိယော၊ အတ္ထိ လောကုတ္တရော. အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော. အတ္ထိ သာသဝေါ၊ အတ္ထိ အနာသဝေါ. အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော. အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ. အတ္ထိ သံယောဇနိယော၊ အတ္ထိ အသံယောဇနိယော။ပေ။ အတ္ထိ သရဏော၊ အတ္ထိ အရဏော.

တိဝိဓေန ဝေဒနာက္ခန္ဓော – အတ္ထိ အဇ္ဈတ္တာရမ္မဏော၊ အတ္ထိ ဗဟိဒ္ဓါရမ္မဏော၊ အတ္ထိ အဇ္ဈတ္တဗဟိဒ္ဓါရမ္မဏော။ပေ။. ဧဝံ ဒသဝိဓေန ဝေဒနာက္ခန္ဓော.

တိကမူလကံ.

၄၃. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သဟေတုကော၊ အတ္ထိ အဟေတုကော.

တိဝိဓေန ဝေဒနာက္ခန္ဓော – အတ္ထိ ကုသလော၊ အတ္ထိ အကုသလော၊ အတ္ထိ အဗျာကတော။ပေ။. ဧဝံ ဒသဝိဓေန ဝေဒနာက္ခန္ဓော.

၄၄. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ ဟေတုသမ္ပယုတ္တော၊ အတ္ထိ ဟေတုဝိပ္ပယုတ္တော.

တိဝိဓေန ဝေဒနာက္ခန္ဓော – အတ္ထိ ဝိပါကော၊ အတ္ထိ ဝိပါကဓမ္မဓမ္မော၊ အတ္ထိ နေဝဝိပါကနဝိပါကဓမ္မဓမ္မော။ပေ။. ဧဝံ ဒသဝိဓေန ဝေဒနာက္ခန္ဓော.

၄၅. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ န ဟေတုသဟေတုကော၊ အတ္ထိ န ဟေတုအဟေတုကော.

တိဝိဓေန ဝေဒနာက္ခန္ဓော – အတ္ထိ ဥပါဒိန္နုပါဒါနိယော၊ အတ္ထိ အနုပါဒိန္နုပါဒါနိယော၊ အတ္ထိ အနုပါဒိန္နအနုပါဒါနိယော။ပေ။. ဧဝံ ဒသဝိဓေန ဝေဒနာက္ခန္ဓော.

၄၆. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ လောကိယော၊ အတ္ထိ လောကုတ္တရော.

တိဝိဓေန ဝေဒနာက္ခန္ဓော – အတ္ထိ သံကိလိဋ္ဌသံကိလေသိကော၊ အတ္ထိ အသံကိလိဋ္ဌသံကိလေသိကော၊ အတ္ထိ အသံကိလိဋ္ဌအသံကိလေသိကော။ပေ။. ဧဝံ ဒသဝိဓေန ဝေဒနာက္ခန္ဓော.

၄၇. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ ကေနစိ ဝိညေယျော၊ အတ္ထိ ကေနစိ န ဝိညေယျော.

တိဝိဓေန ဝေဒနာက္ခန္ဓော – အတ္ထိ သဝိတက္ကသဝိစာရော၊ အတ္ထိ အဝိတက္ကဝိစာရမတ္တော၊ အတ္ထိ အဝိတက္ကအဝိစာရော။ပေ။. ဧဝံ ဒသဝိဓေန ဝေဒနာက္ခန္ဓော.

၄၈. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သာသဝေါ၊ အတ္ထိ အနာသဝေါ.

တိဝိဓေန ဝေဒနာက္ခန္ဓော – အတ္ထိ ဒဿနေန ပဟာတဗ္ဗော၊ အတ္ထိ ဘာဝနာယ ပဟာတဗ္ဗော၊ အတ္ထိ နေဝ ဒဿနေန န ဘာဝနာယ ပဟာတဗ္ဗော။ပေ။. ဧဝံ ဒသဝိဓေန ဝေဒနာက္ခန္ဓော.

၄၉. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ အာသဝသမ္ပယုတ္တော၊ အတ္ထိ အာသဝဝိပ္ပယုတ္တော.

တိဝိဓေန ဝေဒနာက္ခန္ဓော – အတ္ထိ ဒဿနေန ပဟာတဗ္ဗဟေတုကော၊ အတ္ထိ ဘာဝနာယ ပဟာတဗ္ဗဟေတုကော၊ အတ္ထိ နေဝ ဒဿနေန န ဘာဝနာယ ပဟာတဗ္ဗဟေတုကော။ပေ။. ဧဝံ ဒသဝိဓေန ဝေဒနာက္ခန္ဓော.

၅၀. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ အာသဝဝိပ္ပယုတ္တသာသဝေါ၊ အတ္ထိ အာသဝဝိပ္ပယုတ္တအနာသဝေါ.

တိဝိဓေန ဝေဒနာက္ခန္ဓော – အတ္ထိ အာစယဂါမီ၊ အတ္ထိ အပစယဂါမီ၊ အတ္ထိ နေဝါစယဂါမိနာပစယဂါမီ။ပေ။. ဧဝံ ဒသဝိဓေန ဝေဒနာက္ခန္ဓော.

၅၁. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သံယောဇနိယော၊ အတ္ထိ အသံယောဇနိယော.

တိဝိဓေန ဝေဒနာက္ခန္ဓော – အတ္ထိ သေက္ခော၊ အတ္ထိ အသေက္ခော၊ အတ္ထိ နေဝသေက္ခနာသေက္ခော။ပေ။. ဧဝံ ဒသဝိဓေန ဝေဒနာက္ခန္ဓော.

၅၂. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သံယောဇနသမ္ပယုတ္တော၊ အတ္ထိ သံယောဇနဝိပ္ပယုတ္တော.

တိဝိဓေန ဝေဒနာက္ခန္ဓော – အတ္ထိ ပရိတ္တော၊ အတ္ထိ မဟဂ္ဂတော၊ အတ္ထိ အပ္ပမာဏော။ပေ။. ဧဝံ ဒသဝိဓေန ဝေဒနာက္ခန္ဓော.

၅၃. ဧကဝိဓေန ဝေဒနာက္ခန္ဓော – ဖဿသမ္ပယုတ္တော.

ဒုဝိဓေန ဝေဒနာက္ခန္ဓော – အတ္ထိ သံယောဇနဝိပ္ပယုတ္တသံယောဇနိယော၊ အတ္ထိ သံယောဇနဝိပ္ပယုတ္တအသံယောဇနိယော.

တိဝိဓေန ဝေဒနာက္ခန္ဓော – အတ္ထိ ပရိတ္တာရမ္မဏော၊ အတ္ထိ မဟဂ္ဂတာရမ္မဏော၊ အတ္ထိ အပ္ပမာဏာရမ္မဏော။ပေ။. ဧဝံ ဒသဝိဓေန ဝေဒနာက္ခန္ဓော.