၇. သတ္တကနိဒ္ဒေသော

(၁) သတ္တာနုသယာ

၉၄၉. တတ္ထ ကတမေ သတ္တာနုသယာ? ကာမရာဂါနုသယော၊ ပဋိဃာနုသယော၊ မာနာနုသယော၊ ဒိဋ္ဌာနုသယော၊ ဝိစိကိစ္ဆာနုသယော၊ ဘဝရာဂါနုသယော၊ အဝိဇ္ဇာနုသယော – ဣမေ သတ္တ အနုသယာ.

(၂) သတ္တ သံယောဇနာနိ

တတ္ထ ကတမာနိ သတ္တ သံယောဇနာနိ? ကာမရာဂသံယောဇနံ၊ ပဋိဃသံယောဇနံ၊ မာနသံယောဇနံ၊ ဒိဋ္ဌိသံယောဇနံ၊ ဝိစိကိစ္ဆာသံယောဇနံ၊ ဘဝရာဂသံယောဇနံ၊ အဝိဇ္ဇာသံယောဇနံ – ဣမာနိ သတ္တ သံယောဇနာနိ.

(၃) သတ္တ ပရိယုဋ္ဌာနာနိ

တတ္ထ ကတမာနိ သတ္တ ပရိယုဋ္ဌာနာနိ? ကာမရာဂပရိယုဋ္ဌာနံ၊ ပဋိဃပရိယုဋ္ဌာနံ၊ မာနပရိယုဋ္ဌာနံ၊ ဒိဋ္ဌိပရိယုဋ္ဌာနံ၊ ဝိစိကိစ္ဆာပရိယုဋ္ဌာနံ၊ ဘဝရာဂပရိယုဋ္ဌာနံ၊ အဝိဇ္ဇာပရိယုဋ္ဌာနံ – ဣမာနိ သတ္တ ပရိယုဋ္ဌာနာနိ.

(၄) သတ္တ အသဒ္ဓမ္မာ

၉၅၀. တတ္ထ ကတမေ သတ္တ အသဒ္ဓမ္မာ? အဿဒ္ဓေါ ဟောတိ၊ အဟိရိကော ဟောတိ၊ အနောတ္တပ္ပီ ဟောတိ၊ အပ္ပဿုတော ဟောတိ၊ ကုသီတော ဟောတိ၊ မုဋ္ဌဿတီ ဟောတိ၊ ဒုပ္ပညော ဟောတိ – ဣမေ သတ္တ အသဒ္ဓမ္မာ.

(၅) သတ္တ ဒုစ္စရိတာနိ

တတ္ထ ကတမာနိ သတ္တ ဒုစ္စရိတာနိ? ပါဏာတိပါတော၊ အဒိန္နာဒါနံ၊ ကာမေသုမိစ္ဆာစာရော၊ မုသာဝါဒေါ၊ ပိသုဏာ ဝါစာ၊ ဖရုသာ ဝါစာ၊ သမ္ဖပ္ပလာပေါ – ဣမာနိ သတ္တ ဒုစ္စရိတာနိ.

(၆) သတ္တ မာနာ

တတ္ထ ကတမေ သတ္တ မာနာ? မာနော၊ အတိမာနော၊ မာနာတိမာနော၊ ဩမာနော၊ အဓိမာနော၊ အသ္မိမာနော၊ မိစ္ဆာမာနော – ဣမေ သတ္တ မာနာ.

(၇) သတ္တ ဒိဋ္ဌိယော

၉၅၁. (က) တတ္ထ ကတမာ သတ္တ ဒိဋ္ဌိယော? ဣဓေကစ္စော သမဏော ဝါ ဗြာဟ္မဏော ဝါ ဧဝံဝါဒီ ဟောတိ ဧဝံဒိဋ္ဌိ – ‘‘ယတော ခေါ၊ ဘော၊ အယံ အတ္တာ ရူပီ စာတုမဟာဘူတိကော [စာတုမ္မဟာဘူတိကော (သီ. သျာ.)] မာတာပေတ္တိကသမ္ဘဝေါ ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(ခ) တမညော ဧဝမာဟ – ‘‘အတ္ထိ ခေါ၊ ဘော၊ ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ ဘော အညော အတ္တာ ဒိဗ္ဗော ရူပီ ကာမာဝစရော ကဗဠီကာရဘက္ခော. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာသမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(ဂ) တမညော ဧဝမာဟ – ‘‘အတ္ထိ ခေါ၊ ဘော၊ ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ၊ ဘော၊ အညော အတ္တာ ဒိဗ္ဗော ရူပီ မနောမယော သဗ္ဗင်္ဂပစ္စင်္ဂီ အဟီနိန္ဒြိယော. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(ဃ) တမညော ဧဝမာဟ – ‘‘အတ္ထိ ခေါ၊ ဘော၊ ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ၊ ဘော၊ အညော အတ္တာ သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ အနန္တော အာကာသောတိ အာကာသာနဉ္စာယတနူပဂေါ. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(င) တမညော ဧဝမာဟ – ‘‘အတ္ထိ ခေါ၊ ဘော၊ ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ၊ ဘော၊ အညော အတ္တာ သဗ္ဗသော အာကာသာနဉ္စာယတနံ သမတိက္ကမ္မ အနန္တံ ဝိညာဏန္တိ ဝိညာဏဉ္စာယတနူပဂေါ. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(စ) တမညော ဧဝမာဟ – ‘‘အတ္ထိ ခေါ၊ ဘော၊ ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ၊ ဘော၊ အညော အတ္တာ သဗ္ဗသော ဝိညာဏဉ္စာယတနံ သမတိက္ကမ္မ နတ္ထိ ကိဉ္စီတိ အာကိဉ္စညာယတနူပဂေါ. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ.

(ဆ) တမညော ဧဝမာဟ – ‘‘အတ္ထိ ခေါ ပန ဧသော အတ္တာ ယံ တွံ ဝဒေသိ. ‘နေသော နတ္ထီ’တိ ဝဒါမိ. နော စ ခေါ၊ ဘော၊ အယံ အတ္တာ ဧတ္တာဝတာ သမ္မာ သမုစ္ဆိန္နော ဟောတိ. အတ္ထိ ခေါ၊ ဘော၊ အညော အတ္တာ သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနူပဂေါ. တံ တွံ န ဇာနာသိ န ပဿသိ. တမဟံ ဇာနာမိ ပဿာမိ. သော ခေါ၊ ဘော၊ အတ္တာ ယတော ကာယဿ ဘေဒါ ဥစ္ဆိဇ္ဇတိ ဝိနဿတိ န ဟောတိ ပရံ မရဏာ၊ ဧတ္တာဝတာ ခေါ၊ ဘော၊ အယံ အတ္တာ သမ္မာ သမုစ္ဆိန္နော ဟောတီ’’တိ. ဣတ္ထေကေ သတော သတ္တဿ ဥစ္ဆေဒံ ဝိနာသံ ဝိဘဝံ ပညပေန္တိ. ဣမာ သတ္တ ဒိဋ္ဌိယော.

သတ္တကံ.