(၃၅. က) အယောနိသော မနသိကာရော

၉၃၆. တတ္ထ ကတမော အယောနိသော မနသိကာရော? အနိစ္စေ ‘‘နိစ္စ’’န္တိ အယောနိသော မနသိကာရော၊ ဒုက္ခေ ‘‘သုခ’’န္တိ အယောနိသော မနသိကာရော၊ အနတ္တနိ ‘‘အတ္တာ’’တိ အယောနိသော မနသိကာရော၊ အသုဘေ ‘‘သုဘ’’န္တိ အယောနိသော မနသိကာရော၊ သစ္စဝိပ္ပဋိကုလေန ဝါ စိတ္တဿ အာဝဋ္ဋနာ အနာဝဋ္ဋနာ အာဘောဂေါ သမန္နာဟာရော မနသိကာရော – အယံ ဝုစ္စတိ ‘‘အယောနိသော မနသိကာရော’’.

(ခ) ကုမ္မဂ္ဂသေဝနာ

တတ္ထ ကတမာ ကုမ္မဂ္ဂသေဝနာ? တတ္ထ ကတမော ကုမ္မဂ္ဂေါ? မိစ္ဆာဒိဋ္ဌိ၊ မိစ္ဆာသင်္ကပ္ပေါ၊ မိစ္ဆာဝါစာ၊ မိစ္ဆာကမ္မန္တော၊ မိစ္ဆာအာဇီဝေါ၊ မိစ္ဆာဝါယာမော၊ မိစ္ဆာသတိ၊ မိစ္ဆာသမာဓိ – အယံ ဝုစ္စတိ ‘‘ကုမ္မဂ္ဂေါ’’. ယာ ဣမဿ ကုမ္မဂ္ဂဿ သေဝနာ နိသေဝနာ သံသေဝနာ ဘဇနာ သမ္ဘဇနာ ဘတ္တိ သမ္ဘတ္တိ တံသမ္ပဝင်္ကတာ – အယံ ဝုစ္စတိ ‘‘ကုမ္မဂ္ဂသေဝနာ’’.

(ဂ) စေတသော စ လီနတ္တံ

တတ္ထ ကတမံ စေတသော စ လီနတ္တံ? ယာ စိတ္တဿ အကလျတာ အကမ္မညတာ ဩလီယနာ သလ္လီယနာ လီနံ လီယနာ လီယိတတ္တံ ထိနံ ထိယနာ ထိယိတတ္တံ စိတ္တဿ – ဣဒံ ဝုစ္စတိ ‘‘စေတသော စ လီနတ္တံ’’.

တိကံ.