൨. പാരിവാസികക്ഖന്ധകവണ്ണനാ

പാരിവാസികവത്തകഥാവണ്ണനാ

൭൫. പാരിവാസികക്ഖന്ധകേ ‘‘മാ മം ഗാമപ്പവേസനം ആപുച്ഛഥാതി വുത്തേ അനാപുച്ഛാപി ഗാമം പവിസിതും വട്ടതീ’’തി വദന്തി. സങ്ഘോ അത്തനോ പത്തട്ഠാനേ ഗഹേതും വട്ടതി. ഓണോജനം നാമ വിസ്സജ്ജനം. ‘‘തം പന പാരിവാസികേന പാപിതസ്സ അത്തനാ സമ്പടിച്ഛിതസ്സേവ പുനദിവസാദിഅത്ഥായ വിസ്സജ്ജനം കാതബ്ബം, അസമ്പടിച്ഛിത്വായേവ ചേ വിസ്സജ്ജേതി, ന ലഭതീ’’തി വുത്തം.

൭൬. പകതിയാവ നിസ്സയോതി ഏത്ഥ ‘‘അന്തേവാസികാനം ആലയസബ്ഭാവേ യാവ വസ്സൂപനായികദിവസോ, താവ കപ്പതി, തസ്സ ആലയസ്സ സബ്ഭാവേ നിസ്സയോ ന പടിപ്പസ്സമ്ഭതീതി ചേ? ന വട്ടതി. തത്ഥ ഇദാനി ഖമാപേയ്യാമീതിആദിനാ വട്ടതീ’’തി വുത്തം. തത്ഥ ഏകന്തേന വിസ്സട്ഠത്താ, ഇധ പന ഏകന്തേനേവ ദ്വിന്നമ്പി സമഭാവോ ഇച്ഛിതബ്ബോ ഏവാതി ഏകേ. പടിബലസ്സ വാ ഭിക്ഖുസ്സാതി ഏത്ഥ ‘‘ലദ്ധസമ്മുതികേന ആണത്തോപി ഗരുധമ്മേഹി, അഞ്ഞേഹി വാ ഓവദിതും ന ലഭതീ’’തി ലിഖിതം. തതോ വാ പാപിട്ഠതരാതി ഏത്ഥ ‘‘അസഞ്ചിച്ച ആപന്നസഞ്ചരിത്തതോ സുക്കവിസ്സട്ഠി പാപിട്ഠതരാതി അയമ്പി നയോ യോജേതബ്ബോ’’തി വുത്തം. പച്ചയന്തി വസ്സാവാസികം. സേനാസനം ന ലഭതി സേയ്യപരിയന്തഭാഗിതായ. ‘‘ഉദ്ദേസാദീനി ദാതുമ്പി ന ലഭതീ’’തി വദന്തി. ‘‘സചേ ദ്വേ പാരിവാസികാ ഗതട്ഠാനേ അഞ്ഞമഞ്ഞം പസ്സന്തി, ഉഭോഹിപി അഞ്ഞമഞ്ഞസ്സ ആരോചേതബ്ബം അവിസേസേന ‘ആഗന്തുകേന ആരോചേതബ്ബം, ആഗന്തുകസ്സ ആരോചേതബ്ബ’ന്തി വുത്തത്താ’’തി വുത്തം. അഞ്ഞവിഹാരഗതേനാപി തത്ഥ പുബ്ബേ ആരോചിതസ്സ പുനാരോചനകിച്ചം നത്ഥി. ‘‘അനിക്ഖിത്തവത്തസ്സ ബഹി ആരോചിതസ്സ യഥാ പുന വിഹാരേ ആരോചനകിച്ചം നത്ഥി, ഏവം ‘ആഗന്തുകസോധനത്ഥം ഉപോസഥദിവസേ ആരോചേതബ്ബ’ന്തി വചനഞ്ഹേത്ഥ സാധക’’ന്തി വദന്തി.

൮൧. ഏകച്ഛന്നേ നിസിന്നസ്സാപി രത്തിച്ഛേദദുക്കടാപത്തിയോ ഹോന്തീതി ഏകേ. അവിസേസേനാതി പാരിവാസികസ്സ ഉക്ഖിത്തകസ്സാതി ഇമം ഭേദം അകത്വാ. ‘‘തദഹുപസമ്പന്നേപി പകതത്തേ’’തി വചനതോ അനുപസമ്പന്നേഹി വസിതും വട്ടതി. ‘‘സമവസ്സാതി ഏതേന അപച്ഛാ അപുരിമം നിപജ്ജനേ ദ്വിന്നമ്പി വത്തഭേദാപത്തിഭാവം ദീപേതീ’’തി ലിഖിതം.

പാരിവാസികവത്തകഥാവണ്ണനാ നിട്ഠിതാ.

മൂലായപടികസ്സനാരഹവത്തകഥാവണ്ണനാ

൮൬. അത്തനോ അത്തനോ നവകതരന്തി പാരിവാസികാദിനവകതരം. പഠമം സങ്ഘമജ്ഝേ പരിവാസം ഗഹേത്വാ നിക്ഖിത്തവത്തേന പുന ഏകസ്സപി സന്തികേ സമാദിയിതും, നിക്ഖിപിതുഞ്ച വട്ടതി. മാനത്തേ പന നിക്ഖിപിതും വട്ടതി. ഊനേ ഗണേ ചരണദോസത്താ ന ഗഹേതുന്തി ഏകേ. പഠമം ആദിന്നവത്തം ഏകസ്സ സന്തികേ യഥാ നിക്ഖിപിതും വട്ടതി, തഥാ സമാദിയിതുമ്പി വട്ടതീതി പോരാണഗണ്ഠിപദേ.

പാരിവാസികക്ഖന്ധകവണ്ണനാ നിട്ഠിതാ.