(൨) പാരാജികാദിപഞ്ഹാവണ്ണനാ

൪൮൦. സന്ഥതപേയ്യാലഞ്ചാതി പഠമപാരാജികവിഭങ്ഗേ (പാരാ. ൬൫) വുത്തം സന്ഥതപേയ്യാലഞ്ച.

ലിങ്ഗപരിവത്തം സന്ധായാതി സതി ലിങ്ഗേ പരിവത്തേ പടിഗ്ഗഹണസ്സ വിജഹനം സന്ധായ വുത്തം.

യോതി ഭിക്ഖു, പരിണാമേതീതി സമ്ബന്ധോ. അത്തനോ അത്ഥായാതി യോജനാ.

അസ്സാതി ഗാഥായ. കാകഉഹദന്തി കാകേഹി കരീസുസ്സഗ്ഗം. കദ്ദമമക്ഖിതന്തി കദ്ദമേന മക്ഖിതം. കായഗതാനേവ ഹുത്വാതി സമ്ബന്ധോ.

ഹീതി വിത്ഥാരോ. അനരിയം തം ഇത്ഥിം വാ തം പുരിസം വാ ഹനേയ്യാതി യോജനാ. ലിങ്ഗപരിവത്തേന ഹേതുഭൂതേന ഇത്ഥിഭൂതം, പുരിസഭൂതഞ്ചാതി സമ്ബന്ധോ. ഇത്ഥിഭൂതന്തി ച ഇത്ഥീ ഹുത്വാ ഭൂതം, ഇത്ഥിഭാവം വാ പത്തം.

മിഗസിങ്ഗതാപസസീഹകുമാരാദീനം തിരച്ഛാനഗതമാതാപിതരോ വിയാതി യോജനാ. മിഗസിങ്ഗതാപസോതി മിഗസിങ്ഗനാമകോ (ജാ. അട്ഠ. ൫.൧൭.൯൬ ആദയോ) താപസോ. സീഹകുമാരോതി സീഹബാഹുകുമാരോ. ആദിസദ്ദേന ഭൂരിദത്താദയോ സങ്ഗണ്ഹാതി.

കുരുന്ദിയം ആഗതന്തി സമ്ബന്ധോ.

‘‘സച്ചം ഭണന്തോതി ഗാഥായാ’’തി പദം ‘‘സച്ചം ഭാസതോ ലഹുകാപത്തി ഹോതീ’’തി ഏത്ഥ ഇതിസദ്ദേന സമ്ബന്ധിതബ്ബം. ‘‘സച്ചം ഭണന്തോ’’തി ഗാഥായ ഇതി അത്ഥോതി യോജനാ.