൧. ആഗന്തുകവത്തകഥാ

൩൫൭. വത്തക്ഖന്ധകേ ആരാമന്തി ഉപചാരസീമം സന്ധായ വുത്തന്തി ആഹ ‘‘ഉപചാരസീമസമീപ’’ന്തി. ‘‘ഗഹേത്വാ’’തി പദസ്സ ‘‘ഉപാഹനാ’’തി കമ്മം പാകടം, കരണം പന അപാകടം. തസ്മാ കരണം ദസ്സേന്തോ ആഹ ‘‘ഉപാഹനദണ്ഡകേന ഗഹേത്വാ’’തി. ഇമിനാ ‘‘ഹത്ഥേനാ’’തി കരണം നിവത്തേതി. പടിക്കമന്തീതി ഏത്ഥ പവിസന്തീതി ച അപക്കമന്തീതി ച അത്ഥം പടിക്ഖിപന്തോ ആഹ ‘‘സന്നിപതന്തീ’’തി. ഉപാഹനാ…പേ… പുച്ഛിതബ്ബാതി ഏത്ഥ ‘‘പുച്ഛിതബ്ബാ’’തി പദസ്സ സഹ കമ്മേന പുച്ഛിതബ്ബാകാരം ദസ്സേന്തോ ആഹ ‘‘കതരസ്മിം ഠാനേ’’തിആദി. തത്ഥ ‘‘കതരസ്മിം…പേ… ചോളക’’ന്തി ഇമിനാ പുച്ഛിതബ്ബാകാരം ദസ്സേതി. ‘‘ആവാസികാ ഭിക്ഖൂ’’തി ഇമിനാ കമ്മം ദസ്സേതി. ‘‘പത്ഥരിതബ്ബ’’ന്തി ഇമിനാ വിസ്സജ്ജേതബ്ബന്തി ഏത്ഥ സജധാതുയാ ചജനത്ഥം പടിക്ഖിപതി. ഗോചരോ പുച്ഛിതബ്ബോതി ഏത്ഥ ഗോചരസദ്ദോ ഭിക്ഖാചാരസദ്ദേന അത്ഥതോ ഏകന്തി ദസ്സേന്തോ ആഹ ‘‘ഭിക്ഖാചാരോ പുച്ഛിതബ്ബോ’’തി. ഭിക്ഖായ ചരന്തി ഏത്ഥാതി ഭിക്ഖാചാരോ, ഗോചരഗാമോ. യത്ഥാതി യസ്മിം ഗാമേ. ‘‘കി’’ന്തിആദിനാ പാനീയം പുച്ഛിതബ്ബന്തിആദീസു പുച്ഛിതബ്ബാകാരം ദസ്സേതി. കം കാലന്തി കസ്മിം കാലേ.

ബഹി നിക്ഖമന്തസ്സാതി വിഹാരതോ ബഹി നിക്ഖമന്തസ്സ. നില്ലോകേതബ്ബോതി ഓലോകേതബ്ബോ. ‘‘യദി സക്കോതീ’’തി ഇമിനാ സചേ ഉസ്സഹതീതി ഏത്ഥ സചേസദ്ദോ യദിപരിയായോ, ഉസ്സഹതിസദ്ദോ സക്കോതി പരിയായോതി ദസ്സേതി. സക്കോന്തസ്സ വിഹാരസോധനവത്തേതി സമ്ബന്ധോ.