൨. ആവാസികവത്തകഥാ

൩൫൯. ആവാസികവത്തേ ഏവം വിനിച്ഛയോ വേദിതബ്ബോതി യോജനാ. സബ്ബം കാതബ്ബന്തി സമ്ബന്ധോ. തസ്സാതി വുഡ്ഢതരസ്സ ആഗന്തുകസ്സ. ‘‘പണ്ഡിതോ’’തിആദിനാ സചേ ബാലോ ‘‘സമ്മജ്ജാഹി താവ ചേതിയങ്ഗണ’’ന്തി ന വദതി, സമ്മജ്ജനിം നിക്ഖിപിത്വാ തസ്സ വത്തമേവ കാതബ്ബന്തി ദസ്സേതി. ഭേസജ്ജമേവ കാതബ്ബന്തി സഹാവധാരണേന വുത്തത്താ ബാലോ ‘‘കരോഹി താവ ഭേസജ്ജ’’ന്തി അവദന്തോപി ഭേസജ്ജമേവ കാതബ്ബം. ‘‘പണ്ഡിതോ ഹീ’’തിആദിനാ പന ആഗന്തുകസ്സ വത്തബ്ബഭാവമത്തമേവ ദസ്സേതി. പാളിമുത്തകവത്തം ദസ്സേന്തോ ആഹ ‘‘അപിചാ’’തിആദി. ബീജനേനാതി ബീജനിയാ. ‘‘ബീജന’’ന്തി ഹി നപുംസകലിങ്ഗോ, ‘‘ബീജനീ’’തി ഇത്ഥിലിങ്ഗോ. ‘‘ബീജിതബ്ബോ’’തി ച ‘‘ബീജിതബ്ബ’’ന്തി ച ഇമിനാ അട്ഠകഥാവചനേന ബീജിയതി അനേനാതി ബീജനം, ബീജിയതി ഏതായാതി ബീജനീതി വചനത്ഥോ കാതബ്ബോ. അസ്സാതി വുഡ്ഢതരആഗന്തുകസ്സ. മക്ഖേതബ്ബാതി അഞ്ജേതബ്ബാ. ഹീതി സച്ചം. ഏത്ഥാതി ഉപാഹനപുഞ്ഛനേ. കത്ഥാതി കസ്മിം വിഹാരേ. പുച്ഛിതേന ആവാസികേനാതി സമ്ബന്ധോ.

‘‘അത്തനോ സന്തികം…പേ… ന ലഭതീ’’തി ഇമിനാ അത്താനം സന്ധായ അനാഗച്ഛന്തോപി അത്തനോ സന്തികം സമ്പത്തസ്സ ആഗന്തുകസ്സ വത്തം അകാതും ന ലഭതീതി ദസ്സേതി.