൧൪൮. ദിഗുണാദിഉപാഹനപടിക്ഖേപകഥാ

൨൪൫. അഞ്ഞം ബ്യാകരോന്തീതി ഏത്ഥ അഞ്ഞസദ്ദോ സബ്ബനാമസുദ്ധനാമവസേന ദുവിധോ. തേസു ഇധ സുദ്ധനാമം, തം പന ബാലേ ച ദാരകേ ച അരഹത്തേ ച പവത്തതി, ഇധ പന അരഹത്തേതി ദസ്സേന്തോ ആഹ ‘‘അരഹത്തം ബ്യാകരോന്തീ’’തി. യേനാതി സഭാവേന. അരഹാതി ഞായതീതി അരഹാഇതി അത്ഥോ ഞായതി. സോതി സഭാവോ. സുത്തവണ്ണനാതോയേവാതി അങ്ഗുത്തരട്ഠകഥാതോ ഏവ. ന ഉപനീതോതി ന ഉപരി നീതോ. ഏകച്ചേ മോഘപുരിസാതി ഏകച്ചേസദ്ദോ അഞ്ഞേപരിയായോ, മോഘസദ്ദോ തുച്ഛവേവചനോതി ആഹ ‘‘അഞ്ഞേ പന തുച്ഛപുരിസാ’’തി. ‘‘ഹസമാനാ വിയാ’’തി ഇമിനാ ഹസമാനകം മഞ്ഞേതി ഏത്ഥ മഞ്ഞേസദ്ദോ വിയത്ഥോതി ദസ്സേതി. അസന്തമേവാതി അവിജ്ജമാനംയേവ. ഏകപലാസികന്തി ഏത്ഥ പലാസസദ്ദോ പണ്ണവാചകോ. പടലം നാമ പണ്ണം വിയ ഹോതി, തസ്മാ ‘‘ഏകപടല’’ന്തി വുത്തം. അസീതിസകടവാഹേതി ഏത്ഥ അസീതി പദം സകടപദേന സമ്ബന്ധം കത്വാ അസീതിസകടേഹി വഹിതബ്ബേതി അത്ഥോ ദട്ഠബ്ബോ. ‘‘ദ്വേ സകടഭാരാ ഏകോ വാഹോ’’തി ഇമിനാ വാഹാനം ചത്താലീസഭാവം ദസ്സേതി. സത്തഹത്ഥികഞ്ച അനീകന്തി ഏത്ഥ അനീകസ്സ സരൂപം ദസ്സേന്തോ ആഹ ‘‘ഛ ഹത്ഥിനിയോ ചാ’’തിആദി. സത്തന്നം ഹത്ഥീനം സമൂഹോ സത്തഹത്ഥികം. സത്തഅനീകത്താ ഏകൂനപഞ്ഞാസഹത്ഥിനോ ഹോന്തി. തേസു സത്ത ഹത്ഥിനോ, ദ്വാചത്താലീസ ഹത്ഥിനിയോ ഹോന്തി. ദ്വിഗുണാതി ഏത്ഥ ഗുണസദ്ദോ പടലത്ഥോതി ആഹ ‘‘ദ്വിപടലാ’’തി. ഗുണങ്ഗുണൂപാഹനാതി ഏത്ഥ ദ്വിഗുണതിഗുണാനം വിസും ഗഹിതത്താ പാരിസേസതോ ഗുണങ്ഗുണഭാവം ദസ്സേന്തോ ആഹ ‘‘ചതുപടലതോ പട്ഠായ വുച്ചതീ’’തി. ഗുണങ്ഗുണൂപാഹനാതി പടലപടലാ ഉപാഹനാ, ബഹുപടലാ ഉപാഹനാതി അത്ഥോ. ഉകാരേന സഹ യോജേത്വാ ഗകാരോ സജ്ഝായിതബ്ബോ ച ലിഖിതബ്ബോ ച. ഇദാനി പോത്ഥകേസു പന ഉകാരോ ന ദിസ്സതി.