൧൪൫. പവാരണാസങ്ഗഹകഥാ

൨൪൧. അഞ്ഞതരോ ഫാസുവിഹാരോതി ഏത്ഥ ഫാസുവിഹാരോ നാമ കോതി ആഹ ‘‘തരുണസമഥോ വാ തരുണവിപസ്സനാ വാ’’തി. ഇമിനാ തരുണസമഥവിപസ്സനാ ഫാസും വിഹരതി അനേനാതി ഫാസുവിഹാരോതി ദസ്സേതി. പരിബാഹിരാ ഭവിസ്സാമാതി ഏത്ഥ കസ്മാ ഇമമ്ഹാ ഫാസുവിഹാരാ പരിബാഹിരാ ഭവിസ്സന്തീതി ആഹ ‘‘അനിബദ്ധരത്തിട്ഠാനദിവാട്ഠാനാദിഭാവേനാ’’തിആദി. തത്ഥ അനിബദ്ധരത്തിട്ഠാനദിവാട്ഠാനാദിഭാവേനാതി അനിബദ്ധദിവാട്ഠാനാദിഭാവേന ഹേതുഭൂതേന, അസക്കോന്താതി സമ്ബന്ധോ. ആദിസദ്ദേന അനിബദ്ധചങ്കമാദയോ സങ്ഗണ്ഹാതി. ‘‘ഛന്ദദാനം പടിക്ഖിപതീ’’തി ഇമിനാ ‘‘സബ്ബേഹേവ ഏകജ്ഝം സന്നിപതിതബ്ബ’’ന്തി വാക്യസ്സ അഞ്ഞത്ഥാപോഹനം ദസ്സേതി. ഹീതി സച്ചം, യസ്മാ വാ. ഇമേസു തീസു ഛന്ദദാനം ന വട്ടതി, തസ്മാ പടിക്ഖിപതീതി യോജനാ. അയം പവാരണാസങ്ഗഹോ നാമ ന ദാതബ്ബോതി യോജനാ. തരുണസമഥവിപസ്സനാലാഭീ ഏകപുഗ്ഗലോ വാ ഹോതൂതി യോജനാ. ‘‘ഏകസ്സപി ദാതബ്ബോയേവാ’’തി ഇമിനാ അയം പവാരണാസങ്ഗഹോ ഏകസ്സ ദിന്നോപി സബ്ബേസം ദിന്നോ ഹോതീതി ദസ്സേതി. പവാരണാസങ്ഗഹേ ദിന്നേ സതീതി യോജനാ. ആഗന്തുകാതി സട്ഠിവസ്സാപി ആഗന്തുകാ. തേസന്തി ദിന്നപവാരണാസങ്ഗഹാനം. അന്തരാപീതി കോമുദിയാ ചാതുമാസിനിയാ അന്തരാപി.

ഇതി പവാരണാക്ഖന്ധകവണ്ണനായ യോജനാ സമത്താ.