൧൪൪. ഭണ്ഡനകാരകവത്ഥുകഥാ

൨൪൦. ചതുത്ഥപഞ്ചമാതി ഛസു പക്ഖേസു പോട്ഠപാദമാസസ്സ ജുണ്ഹപക്ഖകാളപക്ഖസങ്ഖാതാ ചതുത്ഥപഞ്ചമാ. തതിയോതി സാവണമാസസ്സ കാളപക്ഖോ തതിയോ. തതിയചതുത്ഥപഞ്ചമാ വാതി ഏത്ഥ തതിയോതി സാവണമാസസ്സ കാളപക്ഖോ. ചതുത്ഥോതി പോട്ഠപാദമാസസ്സ ജുണ്ഹപക്ഖോ. പഞ്ചമോതി തസ്സേവ കാളപക്ഖോ. ‘‘തതിയ…പേ… പഞ്ചമാ വാ’’തി പദാനി ‘‘ദ്വേ വാ തയോ വാ’’തി പദേഹി യഥാക്കമം യോജേതബ്ബാനി. ചതുത്ഥേ വാ കതേതി ചതുത്ഥപക്ഖേ വാ പന്നരസിഭാവേന കതേ. ദ്വേ ചാതുദ്ദസികാതി തതിയപക്ഖേ ച ചാതുദ്ദസിയാ സദ്ധിം ദ്വേ ചാതുദ്ദസികാ. ഇമേതി ഭണ്ഡനകാരകാ. തേതി ഭണ്ഡനകാരകാ.

അസംവിഹിതാതി ഏത്ഥ അകാരസ്സ വിരഹത്ഥം ദസ്സേന്തോ ആഹ ‘‘സംവിദഹനവിരഹിതാ’’തി. തത്ഥ സംവിദഹനവിരഹിതാതി സംവിദഹനരക്ഖവിരഹിതാ. ആഗമനജാനനത്ഥായാതി ഭണ്ഡനകാരകാനം ആഗമനസ്സ ജാനനത്ഥായ. കിലന്തത്ഥാതി തുമ്ഹേ കിലന്താ ഭവഥ. ‘‘സമ്മോഹം കത്വാ’’തി ഇമിനാ വിക്ഖിത്വാതി പദസ്സ വിക്ഖേപം കത്വാതി അത്ഥം ദസ്സേതി. നോ ചേ ലഭേഥാതി ഏത്ഥ കിമത്ഥായ ന ലഭേഥാതി ആഹ ‘‘ബഹിസീമം ഗന്തു’’ന്തി. ‘‘ഭണ്ഡനകാരകാനം…പേ… ഹോന്തീ’’തി ഇമിനാ അലഭനസ്സ കാരണം ദസ്സേതി. യന്തി ആഗമം ജുണ്ഹം. കോമുദിയാ ചാതുമാസിനിയാതി പച്ഛിമകത്തികപുണ്ണമായം. സാ ഹി കുമുദാനമത്ഥിതായ കോമുദീ, ചതുന്നം വസ്സികാനം മാസാനം പൂരണത്താ ചാതുമാസിനീതി വുച്ചതി. തദാ ഹി കുമുദാനി സുപുപ്ഫിതാനി ഹോന്തി, തസ്മാ കുമുദാനം സമൂഹാ, കുമുദാനി ഏവ വാ കോമുദാ, തേ ഏത്ഥ അത്ഥീതി കോമുദീതി വുച്ചതി, കുമുദവതീതി വുത്തം ഹോതി. അവസ്സം പവാരേതബ്ബന്തി ധുവം പവാരേതബ്ബം. ഹീതി സച്ചം, യസ്മാ വാ. തന്തി കോമുദിം ചാതുമാസിനിം.