൧൪൩. വത്ഥുട്ഠപനാദികഥാ

൨൩൯. ചോരാ അഗമംസു കിരാതി സമ്ബന്ധോ. പോക്ഖരണിതോ നീഹരിത്വാതി സമ്ബന്ധോ. സോതി ഭിക്ഖു, ഏവമാഹാതി സമ്ബന്ധോ. വുത്ഥേനാതി വസന്തേന, യേന കേനചി കതന്തി സമ്ബന്ധോ. തം പുഗ്ഗലന്തി വത്ഥുകതം തം പുഗ്ഗലം. ഏത്ഥാതി ‘‘വത്ഥും ഠപേത്വാ സങ്ഘോ പവാരേയ്യാ’’തി പാഠേ. ഇമിനാ വത്ഥുനാ അപദിസാഹീതി സമ്ബന്ധോ. നന്തി പുഗ്ഗലം. അനുവിജ്ജിത്വാതി അനുയുഞ്ജിത്വാ, പുച്ഛിത്വാതി അത്ഥോ.

ഏകോ ഭിക്ഖു പൂജേസി, പിവീതി സമ്ബന്ധോ. തസ്സാതി ഭിക്ഖുസ്സ. തദനുരൂപോതി തേസം പൂജനപിവനാനം അനുരൂപോ. സോതി ചോദകോ ഭിക്ഖു. തം ഗന്ധന്തി തം സരീരഗന്ധം. യം പുഗ്ഗലന്തി യോജനാ. ഠപേസീതി പവാരണായ ഠപേസി. അയമസ്സാതി അയം ദോസോ അസ്സ പുഗ്ഗലസ്സ.

ഇദാനേവ നന്തി ഏത്ഥ ‘‘ന’’ന്തി പദം ‘‘പുഗ്ഗല’’ന്തി പദേന യോജേതബ്ബം. നം പുഗ്ഗലന്തി ഹി അത്ഥോ. ഉഭയന്തി വത്ഥുഞ്ച പുഗ്ഗലഞ്ചാതി ഉഭയം. കല്ലം വചനായാതി യുത്തം കഥേതും. കസ്മാ കല്ലം വചനായാതി യോജനാ. പവാരണതോ പുബ്ബേ, പച്ഛാ ചാതി സമ്ബന്ധോ. ഇതി തസ്മാ കല്ലം വചനായാതി യോജനാ. ഇദഞ്ഹി ഉഭയന്തി വത്ഥുപുഗ്ഗലസങ്ഖാതം ഇദമേവ ഉഭയം. പവാരണായ പുബ്ബേതി യോജനാ. ഉക്കോടേന്തസ്സാതി ചാലേന്തസ്സ.