൨൭൫. പാലിലേയ്യകഗമനകഥാ

൪൬൭. പാലിലേയ്യകന്തി പലിലവനസണ്ഡേ വസന്തഹത്ഥിനാഗം. ‘‘ഹത്ഥീ’’തി ച ‘‘നാഗോ’’തി ച ദ്വിന്നം സദ്ദാനം പരിയായഭാവേന വുത്തത്താ അധികത്ഥോതി ആഹ ‘‘മഹാഹത്ഥീ’’തി. പുരതോ പുരതോ ഗച്ഛന്തേഹി തേഹി ഹത്ഥിആദീഹി ഛിന്നഗ്ഗാനീതി യോജനാ. ഓഭഗ്ഗോഭഗ്ഗന്തി ഭഞ്ജിത്വാ അധോപാതിതം ഓഭഗ്ഗന്തി ദസ്സേന്തോ ആഹ ‘‘ഭഞ്ജിത്വാ ഭഞ്ജിത്വാ പാതിത’’ന്തി. ‘‘ഉച്ചട്ഠാനതോ’’തി ഇമിനാ അവത്യൂപസഗ്ഗസ്സ അധോത്ഥം നയേന ദസ്സേതി. ഏതസ്സാതി ഹത്ഥിനാഗസ്സ. തേതി ഹത്ഥിആദയോ. തേഹീതി ഹത്ഥിആദീഹി. പിവന്തേഹി തേഹീതി യോജനാ. കദ്ദമോദകാനീതി കദ്ദമേന സംസട്ഠാനി ഉദകാനി.

ഈസാദന്തസ്സാതി ഏത്ഥ ഈസായ സദിസോ ദന്തോ ഇമസ്സാതി ഈസാദന്തോതി ദസ്സേന്തോ ആഹ ‘‘രഥഈസാസദിസദന്തസ്സാ’’തി. ‘‘രഥഈസാ’’തി ഇമിനാ നങ്ഗലഈസം നിവത്തേതി. യദേകോതി യം ഏകോ. യംസദ്ദോ കാരണത്ഥോതി ആഹ ‘‘യസ്മാ’’തി. അസ്സ നാഗസ്സാതി ഹത്ഥിനാഗസ്സ. നാഗേനാതി ബുദ്ധനാഗേന.

യഥാഭിരന്തന്തി ഏത്ഥ കിത്തകം കാലം രമതീതി ആഹ ‘‘തേമാസ’’ന്തി. ഏത്താവതാതി ഏത്തകേന തേമാസവിഹരണേന. പത്ഥടാ അഹോസീതി സമ്ബന്ധോ. സബ്ബത്ഥാതി സബ്ബസ്മിം ജമ്ബുദീപതലേ.

‘‘കോസമ്ബിനിവാസിനോ’’തി ഇമിനാ കോസമ്ബിയം നിവസന്തീതി കോസമ്ബകാതി വചനത്ഥം ദസ്സേതി.