൪. ചതുത്ഥപാരാജികസിക്ഖാപദം

൬൭൫. ചതുത്ഥേ മേഥുനരാഗേന അവസ്സുതാ നാധിപ്പേതാ, കായസംസഗ്ഗരാഗേന അവസ്സുതാവാധിപ്പേതാതി ആഹ ‘‘കായസംസഗ്ഗരാഗേന അവസ്സുതാ’’തി. ‘‘പുരിസപുഗ്ഗലസ്സാ’’തിപദം ന ഹത്ഥസദ്ദേന സമ്ബന്ധിതബ്ബം, ഗഹണസദ്ദേനേവ സമ്ബന്ധിതബ്ബന്തി ദസ്സേന്തോ ആഹ ‘‘യം പുരിസപുഗ്ഗലേനാ’’തിആദി. തന്തി ഗഹണം, ‘‘ഹത്ഥഗ്ഗഹണ’’ന്തി വുത്തവചനം ഉപലക്ഖണമത്തമേവാതി ആഹ ‘‘അഞ്ഞമ്പീ’’തിആദി. തത്ഥ ‘‘അഞ്ഞമ്പീ’’തി ഹത്ഥഗഹണതോ ഇതരമ്പി. അപാരാജികക്ഖേത്തേതി ഉബ്ഭക്ഖകേ അധോജാണുമണ്ഡലേ. അസ്സാതി ‘‘ഹത്ഥഗ്ഗഹണ’’ന്തിപദസ്സ. ഏത്ഥാതി ‘‘അസദ്ധമ്മസ്സ പടിസേവനത്ഥായാ’’തിപദേ. കായസംസഗ്ഗോതി കായസംസഗ്ഗോ ഏവ. തേന വുത്തം ‘‘ന മേഥുനധമ്മോ’’തി. ഹീതി സച്ചം, യസ്മാ വാ. ഏത്ഥാതി കായസംസഗ്ഗഗഹണേ. സാധകന്തി ഞാപകം.

തിസ്സിത്ഥിയോതി ഭുമ്മത്ഥേ ചേതം ഉപയോഗവചനം. തീസു ഇത്ഥീസൂതി ഹി അത്ഥോ, തിസ്സോ ഇത്ഥിയോ ഉപഗന്ത്വാതി വാ യോജേതബ്ബോ. ഏസേവ നയോ പരതോപി. യം മേഥുനം അത്ഥി, തം ന സേവേതി യോജനാ. ന സേവേതി ച ന സേവതി. തികാരസ്സ ഹി ഏകാരോ. തയോ പുരിസേതി തീസു പുരിസേസു, തേ വാ ഉപഗന്ത്വാ. തയോ ച അനരിയപണ്ഡകേതി തീസു അനരിയസങ്ഖാതേസു ഉഭതോബ്യഞ്ജനകേസു ച പണ്ഡകേസു ച, തേ വാ ഉപഗന്ത്വാതി യോജനാ. ന ചാചരേ മേഥുനം ബ്യഞ്ജനസ്മിന്തി അത്തനോ നിമിത്തസ്മിം മേഥുനം ന ച ആചരതി. ഇദം അനുലോമപാരാജികം സന്ധായ വുത്തം. ഛേജ്ജം സിയാ മേഥുനധമ്മപച്ചയാതി മേഥുനധമ്മകാരണാ ഛേജ്ജം സിയാ, പാരാജികം ഭവേയ്യാതി അത്ഥോ. കുസലേഹീതി പഞ്ഹാവിസജ്ജനേ ഛേകേഹി, ഛേകകാമേഹി വാ. അയം പഞ്ഹോ അട്ഠവത്ഥുകം സന്ധായ വുത്തോ.

പഞ്ഹാവിസജ്ജനത്ഥായ ചിന്തേന്താനം സേദമോചനകാരണത്താ ‘‘സേദമോചനഗാഥാ’’തി വുത്താ. വിരുജ്ഝതീതി ‘‘ന മേഥുനധമ്മോ’’തി വചനേന ‘‘ഛേജ്ജം സിയാ മേഥുനധമ്മപച്ചയാ’’തി വചനം വിരുജ്ഝതി, ന സമേതീതി അത്ഥോ. ഇതി ചേ വദേയ്യ, ന വിരുജ്ഝതി. കസ്മാ? മേഥുനധമ്മസ്സ പുബ്ബഭാഗത്താതി യോജനാ. ഇമിനാ മേഥുനധമ്മസ്സ പുബ്ബഭാഗഭൂതോ കായസംസഗ്ഗോവ ഉപചാരേന തത്ഥ മേഥുനധമ്മസദ്ദേന വുത്തോ, ന ദ്വയംദ്വയസമാപത്തീതി ദീപേതി. ഹിസദ്ദോ വിത്ഥാരജോതകോ. പരിവാരേയേവ വുത്താനീതി സമ്ബന്ധോ. വണ്ണാവണ്ണോതി സുക്കവിസട്ഠി. ധനമനുപ്പാദാനന്തി സഞ്ചരിത്തം. ‘‘ഇമിനാ പരിയായേനാ’’തി ഇമിനാ ലേസേന സമീപൂപചാരേനാതി അത്ഥോ. ഏതേനുപായേനാതി ‘‘ഹത്ഥഗ്ഗഹണം സാദിയേയ്യാ’’തിപദേ വുത്തഉപായേന. സബ്ബപദേസൂതി സബ്ബേസു ‘‘സങ്ഘാടികണ്ണഗ്ഗഹണം സാദിയേയ്യാ’’തിആദീസു പദേസു. അപി ചാതി ഏകംസേന, വിസേസം വക്ഖാമീതി അധിപ്പായോ. ‘‘ഏവംനാമകം ഠാന’’ന്തി ഇമിനാ ‘‘ഇത്ഥംനാമം ഇമസ്സ ഠാനസ്സാ’’തി വചനത്ഥം ദീപേതി.

൬൭൬. ഏകന്തരികായ വാതി ഏത്ഥ വാസദ്ദേന ദ്വന്തരികാദീനിപി സങ്ഗയ്ഹന്തി. യേന തേനാതി യേന വാ തേന വാ. ദ്വിതിചതുപ്പഞ്ചഛവത്ഥൂനി പേയ്യാലവസേന വാ വാസദ്ദേന വാ ഗഹേതബ്ബാനി. അപി ചാതി കിഞ്ച ഭിയ്യോ, വത്തബ്ബവിസേസം വക്ഖാമീതി അധിപ്പായോ. ഏത്ഥാതി ‘‘ആപത്തിയോ ദേസേത്വാ’’തി വചനേ. ഹീതി സച്ചം. വുത്തന്തി പരിവാരേ വുത്തം. തത്രാതി പുരിമവചനാപേക്ഖം. ദേസിതാ ആപത്തി ഗണനൂപികാതി യോജനാ. ഏകം വത്ഥും ആപന്നാ യാ ഭിക്ഖുനീതി യോജനാ. ധുരനിക്ഖേപം കത്വാതി ‘‘ഇമഞ്ച വത്ഥും, അഞ്ഞമ്പി ച വത്ഥും നാപജ്ജിസ്സാമീ’’തി ധുരനിക്ഖേപം കത്വാ. യാ പന സഉസ്സാഹാവ ദേസേതീതി യോജനാതി. ചതുത്ഥം.

സാധാരണാതി ഭിക്ഖുനീഹി സാധാരണാ. ഏത്ഥാതി ‘‘ഉദ്ദിട്ഠാ ഖോ അയ്യായോ’’തിആദിവചനേ.

ഇതി സമന്തപാസാദികായ വിനയസംവണ്ണനായ

ഭിക്ഖുനിവിഭങ്ഗേ പാരാജികകണ്ഡവണ്ണനായ യോജനാ സമത്താ.