൬. ചാരിത്തസിക്ഖാപദവണ്ണനാ

അന്തോഉപചാരസീമായ ദസ്സനൂപചാരേ ഭിക്ഖും ദിസ്വാതി യത്ഥ ഠിതസ്സ കുലാനി പയിരുപാസനചിത്തം ഉപ്പന്നം, തതോ പട്ഠായ ഗച്ഛന്തോ അന്തോഉപചാരസീമായ ദസ്സനൂപചാരേ ഭിക്ഖും പസ്സേ വാ അഭിമുഖേ വാ ദിസ്വാ. പകതിവചനേനാതി യം ദ്വാദസഹത്ഥബ്ഭന്തരേ ഠിതേന സോതും സക്കാ, താദിസേന വചനേന, ഇതോ ചിതോ ച പരിയേസിത്വാ ആരോചനകിച്ചം പന നത്ഥി. യോ ഹി ഏവം പരിയേസിതബ്ബോ, സോ അസന്തോയേവ. തേനാഹ ‘‘താദിസ’’ന്തിആദി. അനാപുച്ഛിത്വാതി അനാരോചേത്വാ.

അന്തരാരാമഭിക്ഖുനുപസ്സയതിത്ഥിയസേയ്യപടിക്കമനഭത്തിയഘരാനീതി ഏത്ഥ അന്തരാരാമന്തി അന്തോഗാമേ വിഹാരോ. പടിക്കമനന്തി ആസനസാലാ. ഭത്തിയഘരന്തി നിമന്തിതഘരം വാ സലാകഭത്താദിദായകാനം വാ ഘരം. ആപദാസൂതി ജീവിതബ്രഹ്മചരിയന്തരായേസു. കിരിയാകിരിയന്തി ഏത്ഥ കുലേസു ചാരിത്താപജ്ജനം കിരിയം, അനാപുച്ഛനം അകിരിയന്തി വേദിതബ്ബം.

ചാരിത്തസിക്ഖാപദവണ്ണനാ നിട്ഠിതാ.