൭. മഹാനാമസിക്ഖാപദവണ്ണനാ

സബ്ബഞ്ചേതം വത്ഥുവസേന വുത്തന്തി ‘‘അഗിലാനേന ഭിക്ഖുനാ ചതുമാസപച്ചയപവാരണാ സാദിതബ്ബാ അഞ്ഞത്ര പുനപവാരണായ അഞ്ഞത്ര നിച്ചപവാരണായാ’’തി (പാചി. ൩൦൬) ഏതം സബ്ബം സിക്ഖാപദനിദാനസങ്ഖാതസ്സ വത്ഥുനോ വസേന വുത്തം. തത്ഥ ഹി മഹാനാമേന സക്കേന ‘‘ഇച്ഛാമഹം, ഭന്തേ, സങ്ഘം ചതുമാസം ഭേസജ്ജേന പവാരേതു’’ന്തിആദിനാ (പാചി. ൩൦൩) ഉസ്സന്നുസ്സന്നേന ച ഭേസജ്ജേന ചതുമാസം പുന നിച്ചം പവാരണാ കതാ, തസ്മാ ഭഗവതാ തസ്സ വസേന ഏവം വുത്തന്തി വുത്തം ഹോതി. അഞ്ഞത്ര പുനപവാരണായാതി യദി പുനപവാരണാ അത്ഥി, തം ഠപേത്വാ. അഞ്ഞത്ര നിച്ചപവാരണായാതി ഏത്ഥാപി ഏസേവ നയോ. യദി പന താപി അത്ഥി, സാദിതബ്ബാവാതി അധിപ്പായോ. തേനാഹ ‘‘അയം പനേത്ഥ അത്ഥോ’’തിആദി. തത്ഥാതി തിസ്സം പവാരണായം. ഭേസജ്ജേഹി വാ പരിച്ഛേദോ കതോ ഹോതീതി ‘‘സപ്പി തേല’’ന്തി ഏവമാദിനാ നാമവസേന വാ ‘‘പത്ഥേന നാളിയാ ആള്ഹകേനാ’’തിആദിനാ പരിമാണവസേന വാ ‘‘ഏത്തകാനി വാ ഭേസജ്ജാനി വിഞ്ഞാപേതബ്ബാനീ’’തി ഭേസജ്ജേഹി പരിച്ഛേദോ കതോ ഹോതി. നഭേസജ്ജകരണീയേതി മിസ്സകഭത്തേനാപി ചേ യാപേതും സക്കോതി, നഭേസജ്ജകരണീയം നാമ ഹോതി. അഞ്ഞം ഭേസജ്ജന്തി സപ്പിനാ പവാരിതോ തേലം, ആള്ഹകേന പവാരിതോ ദോണം.

യഥാഭൂതം ആചിക്ഖിത്വാതി ‘‘ഇമേഹി തയാ ഭേസജ്ജേഹി പവാരിതമ്ഹാ, അമ്ഹാകഞ്ച ഇമിനാ ച ഇമിനാ ച ഭേസജ്ജേന അത്ഥോ, യാസു തയാ രത്തീസു പവാരിതമ്ഹാ, താ രത്തിയോ വീതിവത്താ, അമ്ഹാകഞ്ച ഭേസജ്ജേന അത്ഥോ’’തി യഥാഭൂതം ആരോചേത്വാ. ഏവഞ്ച വിഞ്ഞാപേതും ഗിലാനോവ ലഭതി, ന ഇതരോ.

മഹാനാമസിക്ഖാപദവണ്ണനാ നിട്ഠിതാ.