൧൦. കയവിക്കയസിക്ഖാപദവണ്ണനാ

രൂപിയസംവോഹാരസ്സ പന ഹേട്ഠാസിക്ഖാപദേന ഗഹിതത്താ കപ്പിയഭണ്ഡാനമേവേത്ഥ ഗഹണന്തി ആഹ ‘‘ചീവരാദീന’’ന്തിആദി. തത്ഥ ചീവരാദീനം കപ്പിയഭണ്ഡാനന്തി അന്തമസോ ദസികസുത്തം ഉപാദായ ചീവരപിണ്ഡപാതസേനാസനഗിലാനപച്ചയാനം യേസം കേസഞ്ചി കപ്പിയഭണ്ഡാനം. കയം നാമ പരഭണ്ഡസ്സ ഗഹണം. വിക്കയം നാമ അത്തനോ ഭണ്ഡസ്സ ദാനം. തേനാഹ ‘‘ഇമിനാ ഇമം ദേഹീ’’തിആദി. പരസ്സാതി ഠപേത്വാ പഞ്ച സഹധമ്മികേ അഞ്ഞസ്സ. ഏത്ഥ ച ‘‘അഹം, ഭന്തേ, നാനപ്പകാരകം കയവിക്കയം സമാപജ്ജിം, ഇദം മേ നിസ്സഗ്ഗിയം, ഇമാഹം സങ്ഘസ്സ നിസ്സജ്ജാമീ’’തിആദിനാ (പാരാ. ൫൯൫) നയേന നിസ്സജ്ജിതബ്ബം. തേനാഹ ‘‘വുത്തലക്ഖണവസേനാ’’തിആദി. നനു ചേത്ഥ ചീവരധോവനേ വാ കേസച്ഛേദനേ വാ ഭൂമിസോധനാദിനവകമ്മേ വാ പരഭണ്ഡം അത്തനോ ഹത്ഥഗതം നിസ്സജ്ജിതബ്ബം നാമ നത്ഥി, തത്ഥ കിം കാതബ്ബന്തി ആഹ ‘‘അസന്തേ പാചിത്തിയം ദേസേതബ്ബമേവാ’’തി. യഥാ നിസ്സഗ്ഗിയവത്ഥുമ്ഹി പരിഭുത്തേ വാ നട്ഠേ വാ പാചിത്തിയം ദേസേതി, ഏവം ഇധാപി ദേസേതബ്ബമേവാതി അധിപ്പായോ.

ഇദം അമ്ഹാകം അത്ഥീതി ഇദം പടിഗ്ഗഹിതം തേലം വാ സപ്പി വാ അമ്ഹാകം സംവിജ്ജതി. അമ്ഹാകഞ്ച ഇമിനാ ച ഇമിനാ ച അത്ഥോതി അമ്ഹാകഞ്ച തദഞ്ഞേന ഇമിനാ ച ഇമിനാ ച അപ്പടിഗ്ഗഹിതകേന അത്ഥോ. ‘‘രൂപിയസംവോഹാരേ വുത്തനയമേവാ’’തി ഇമിനാ ‘‘തികപാചിത്തിയം അകയവിക്കയേ കയവിക്കയസഞ്ഞിനോ ച വേമതികസ്സ ച ദുക്കട’’ന്തി ഇമം നയമതിദിസതി.

കയവിക്കയസിക്ഖാപദവണ്ണനാ നിട്ഠിതാ.

ഏളകലോമവഗ്ഗോ ദുതിയോ.