൯. ദുതിയഉച്ചാരഛഡ്ഡനസിക്ഖാപദവണ്ണനാ

ഭിക്ഖുനിയാപീതി പി-സദ്ദേന ഭിക്ഖും സമുച്ചിനോതി. അനിക്ഖിത്തബീജേസു (പാചി. അട്ഠ. ൮൩൦) പന ഖേത്തേസു കോണാദീസു വാ അസഞ്ജാതരോപിമേസു ഖേത്തമരിയാദാദീസു വാ ഛഡ്ഡേതും വട്ടതി. മനുസ്സാനം കചവരഛഡ്ഡനട്ഠാനേപി വട്ടതിയേവ. ഛഡ്ഡിതഖേത്തേതി മനുസ്സേസു സസ്സം ഉദ്ധരിത്വാ ഗതേസു ഛഡ്ഡിതഖേത്തം നാമ ഹോതി, തത്ഥ വട്ടതി. യത്ഥ പന ‘‘ലായിതമ്പി പുബ്ബണ്ണാദി പുന ഉട്ഠഹിസ്സതീ’’തി രക്ഖന്തി, തത്ഥ യഥാവത്ഥുകമേവ. സാമികേ അപലോകേത്വാതി ഏത്ഥ ഖേത്തപാലകാ, ആരാമാദിഗോപകാ ച സാമികാവ. ഇമിനാ ച സങ്ഘസന്തകേ ഭിക്ഖുസ്സ ഛഡ്ഡേതും വട്ടതി സങ്ഘപരിയാപന്നത്താ, ന ഭിക്ഖുനീനം. ഭിക്ഖുനീനം പന അത്തനോ സന്തകേ ഭിക്ഖുസന്തകേ വുത്തനയേനേവ വട്ടതീതി ദസ്സേതി, ഏവം സന്തേപി സാരുപ്പവസേന കാതബ്ബം.

ദുതിയഉച്ചാരഛഡ്ഡനസിക്ഖാപദവണ്ണനാ നിട്ഠിതാ.