൭. സഹമ്പതിബ്രഹ്മസുത്തം

൫൨൭. ഏകം സമയം ഭഗവാ ഉരുവേലായം വിഹരതി നജ്ജാ നേരഞ്ജരായ തീരേ അജപാലനിഗ്രോധേ പഠമാഭിസമ്ബുദ്ധോ. അഥ ഖോ ഭഗവതോ രഹോഗതസ്സ പടിസല്ലീനസ്സ ഏവം ചേതസോ പരിവിതക്കോ ഉദപാദി – ‘‘പഞ്ചിന്ദ്രിയാനി ഭാവിതാനി ബഹുലീകതാനി അമതോഗധാനി ഹോന്തി അമതപരായണാനി അമതപരിയോസാനാനി. കതമാനി പഞ്ച? സദ്ധിന്ദ്രിയം ഭാവിതം ബഹുലീകതം അമതോഗധം ഹോതി അമതപരായണം അമതപരിയോസാനം. വീരിയിന്ദ്രിയം…പേ… സതിന്ദ്രിയം…പേ… സമാധിന്ദ്രിയം…പേ… പഞ്ഞിന്ദ്രിയം ഭാവിതം ബഹുലീകതം അമതോഗധം ഹോതി അമതപരായണം അമതപരിയോസാനം. ഇമാനി പഞ്ചിന്ദ്രിയാനി ഭാവിതാനി ബഹുലീകതാനി അമതോഗധാനി ഹോന്തി അമതപരായണാനി അമതപരിയോസാനാനീ’’തി.

അഥ ഖോ ബ്രഹ്മാ സഹമ്പതി ഭഗവതോ ചേതസാ ചേതോപരിവിതക്കമഞ്ഞായ – സേയ്യഥാപി നാമ ബലവാ പുരിസോ സമിഞ്ജിതം വാ ബാഹം പസാരേയ്യ, പസാരിതം വാ ബാഹം സമിഞ്ജേയ്യ; ഏവമേവ ബ്രഹ്മലോകേ അന്തരഹിതോ ഭഗവതോ പുരതോ പാതുരഹോസി. അഥ ഖോ ബ്രഹ്മാ സഹമ്പതി ഏകംസം ഉത്തരാസങ്ഗം കരിത്വാ യേന ഭഗവാ തേനഞ്ജലിം പണാമേത്വാ ഭഗവന്തം ഏതദവോച – ‘‘ഏവമേതം, ഭഗവാ, ഏവമേതം സുഗത! പഞ്ചിന്ദ്രിയാനി ഭാവിതാനി ബഹുലീകതാനി അമതോഗധാനി ഹോന്തി അമതപരായണാനി അമതപരിയോസാനാനി. കതമാനി പഞ്ച? സദ്ധിന്ദ്രിയം ഭാവിതം ബഹുലീകതം അമതോഗധം ഹോതി അമതപരായണം അമതപരിയോസാനം…പേ… പഞ്ഞിന്ദ്രിയം ഭാവിതം ബഹുലീകതം അമതോഗധം ഹോതി അമതപരായണം അമതപരിയോസാനം. ഇമാനി പഞ്ചിന്ദ്രിയാനി ഭാവിതാനി ബഹുലീകതാനി അമതോഗധാനി ഹോന്തി അമതപരായണാനി അമതപരിയോസാനാനി’’.

‘‘ഭൂതപുബ്ബാഹം, ഭന്തേ, കസ്സപേ സമ്മാസമ്ബുദ്ധേ ബ്രഹ്മചരിയം അചരിം. തത്രപി മം ഏവം ജാനന്തി – ‘സഹകോ ഭിക്ഖു, സഹകോ ഭിക്ഖൂ’തി. സോ ഖ്വാഹം, ഭന്തേ, ഇമേസംയേവ പഞ്ചന്നം ഇന്ദ്രിയാനം ഭാവിതത്താ ബഹുലീകതത്താ കാമേസു കാമച്ഛന്ദം വിരാജേത്വാ കായസ്സ ഭേദാ പരം മരണാ സുഗതിം ബ്രഹ്മലോകം ഉപപന്നോ. തത്രപി മം ഏവം ജാനന്തി – ‘ബ്രഹ്മാ സഹമ്പതി, ബ്രഹ്മാ സഹമ്പതീ’’’തി. ‘‘ഏവമേതം, ഭഗവാ, ഏവമേതം സുഗത! അഹമേതം ജാനാമി, അഹമേതം പസ്സാമി യഥാ ഇമാനി പഞ്ചിന്ദ്രിയാനി ഭാവിതാനി ബഹുലീകതാനി അമതോഗധാനി ഹോന്തി അമതപരായണാനി അമതപരിയോസാനാനീ’’തി. സത്തമം.