൧൦. നന്ദകലിച്ഛവിസുത്തം

൧൦൨൬. ഏകം സമയം ഭഗവാ വേസാലിയം വിഹരതി മഹാവനേ കൂടാഗാരസാലായം. അഥ ഖോ നന്ദകോ ലിച്ഛവിമഹാമത്തോ യേന ഭഗവാ തേനുപസങ്കമി; ഉപസങ്കമിത്വാ ഭഗവന്തം അഭിവാദേത്വാ ഏകമന്തം നിസീദി. ഏകമന്തം നിസിന്നം ഖോ നന്ദകം ലിച്ഛവിമഹാമത്തം ഭഗവാ ഏതദവോച –

‘‘ചതൂഹി ഖോ, നന്ദക, ധമ്മേഹി സമന്നാഗതോ അരിയസാവകോ സോതാപന്നോ ഹോതി അവിനിപാതധമ്മോ നിയതോ സമ്ബോധിപരായണോ. കതമേഹി ചതൂഹി? ഇധ, നന്ദക, അരിയസാവകോ ബുദ്ധേ അവേച്ചപ്പസാദേന സമന്നാഗതോ ഹോതി – ഇതിപി സോ ഭഗവാ…പേ… സത്ഥാ ദേവമനുസ്സാനം ബുദ്ധോ ഭഗവാതി. ധമ്മേ…പേ… സങ്ഘേ…പേ… അരിയകന്തേഹി സീലേഹി സമന്നാഗതോ ഹോതി അഖണ്ഡേഹി…പേ… സമാധിസംവത്തനികേഹി. ഇമേഹി ഖോ, നന്ദക, ചതൂഹി ധമ്മേഹി സമന്നാഗതോ അരിയസാവകോ സോതാപന്നോ ഹോതി അവിനിപാതധമ്മോ നിയതോ സമ്ബോധിപരായണോ.

‘‘ഇമേഹി ച പന, നന്ദക, ചതൂഹി ധമ്മേഹി സമന്നാഗതോ അരിയസാവകോ ആയുനാ സംയുത്തോ ഹോതി ദിബ്ബേനപി മാനുസേനപി; വണ്ണേന സംയുത്തോ ഹോതി ദിബ്ബേനപി മാനുസേനപി; സുഖേന സംയുത്തോ ഹോതി ദിബ്ബേനപി മാനുസേനപി; യസേന സംയുത്തോ ഹോതി ദിബ്ബേനപി മാനുസേനപി; ആധിപതേയ്യേന സംയുത്തോ ഹോതി ദിബ്ബേനപി മാനുസേനപി. തം ഖോ പനാഹം, നന്ദക, നാഞ്ഞസ്സ സമണസ്സ വാ ബ്രാഹ്മണസ്സ വാ സുത്വാ വദാമി. അപി ച യദേവ മയാ സാമം ഞാതം സാമം ദിട്ഠം സാമം വിദിതം, തദേവാഹം വദാമീ’’തി.

ഏവം വുത്തേ അഞ്ഞതരോ പുരിസോ നന്ദകം ലിച്ഛവിമഹാമത്തം ഏതദവോച – ‘‘നഹാനകാലോ, ഭന്തേ’’തി. ‘‘അലം ദാനി, ഭണേ, ഏതേന ബാഹിരേന നഹാനേന. അലമിദം അജ്ഝത്തം നഹാനം ഭവിസ്സതി, യദിദം – ഭഗവതി പസാദോ’’തി. ദസമം.

സരണാനിവഗ്ഗോ തതിയോ.

തസ്സുദ്ദാനം –

മഹാനാമേന ദ്വേ വുത്താ, ഗോധാ ച സരണാ ദുവേ;

ദുവേ അനാഥപിണ്ഡികാ, ദുവേ വേരഭയേന ച;

ലിച്ഛവീ ദസമോ വുത്തോ, വഗ്ഗോ തേന പവുച്ചതീതി.