൪. നോചേദംസുത്തം

൧൧൭. സാവത്ഥിയം വിഹരതി…പേ… ‘‘നോ ചേദം, ഭിക്ഖവേ, പഥവീധാതുയാ അസ്സാദോ അഭവിസ്സ, നയിദം സത്താ പഥവീധാതുയാ സാരജ്ജേയ്യും. യസ്മാ ച ഖോ, ഭിക്ഖവേ, അത്ഥി പഥവീധാതുയാ അസ്സാദോ, തസ്മാ സത്താ പഥവീധാതുയാ സാരജ്ജന്തി. നോ ചേദം, ഭിക്ഖവേ, പഥവീധാതുയാ ആദീനവോ അഭവിസ്സ, നയിദം സത്താ പഥവീധാതുയാ നിബ്ബിന്ദേയ്യും. യസ്മാ ച ഖോ, ഭിക്ഖവേ, അത്ഥി പഥവീധാതുയാ ആദീനവോ, തസ്മാ സത്താ പഥവീധാതുയാ നിബ്ബിന്ദന്തി. നോ ചേദം, ഭിക്ഖവേ, പഥവീധാതുയാ നിസ്സരണം അഭവിസ്സ, നയിദം സത്താ പഥവീധാതുയാ നിസ്സരേയ്യും. യസ്മാ ച ഖോ, ഭിക്ഖവേ, അത്ഥി പഥവീധാതുയാ നിസ്സരണം, തസ്മാ സത്താ പഥവീധാതുയാ നിസ്സരന്തി’’.

‘‘നോ ചേദം, ഭിക്ഖവേ, ആപോധാതുയാ അസ്സാദോ അഭവിസ്സ…പേ… നോ ചേദം, ഭിക്ഖവേ, തേജോധാതുയാ…പേ… നോ ചേദം, ഭിക്ഖവേ, വായോധാതുയാ അസ്സാദോ അഭവിസ്സ, നയിദം സത്താ വായോധാതുയാ സാരജ്ജേയ്യും. യസ്മാ ച ഖോ, ഭിക്ഖവേ, അത്ഥി വായോധാതുയാ അസ്സാദോ, തസ്മാ സത്താ വായോധാതുയാ സാരജ്ജന്തി. നോ ചേദം, ഭിക്ഖവേ, വായോധാതുയാ ആദീനവോ അഭവിസ്സ, നയിദം സത്താ വായോധാതുയാ നിബ്ബിന്ദേയ്യും. യസ്മാ ച ഖോ, ഭിക്ഖവേ, അത്ഥി വായോധാതുയാ ആദീനവോ, തസ്മാ സത്താ വായോധാതുയാ നിബ്ബിന്ദന്തി. നോ ചേദം, ഭിക്ഖവേ, വായോധാതുയാ നിസ്സരണം അഭവിസ്സ, നയിദം സത്താ വായോധാതുയാ നിസ്സരേയ്യും. യസ്മാ ച ഖോ, ഭിക്ഖവേ, അത്ഥി വായോധാതുയാ നിസ്സരണം, തസ്മാ സത്താ വായോധാതുയാ നിസ്സരന്തി.

‘‘യാവകീവഞ്ചിമേ, ഭിക്ഖവേ, സത്താ ഇമാസം ചതുന്നം ധാതൂനം അസ്സാദഞ്ച അസ്സാദതോ ആദീനവഞ്ച ആദീനവതോ നിസ്സരണഞ്ച നിസ്സരണതോ യഥാഭൂതം ന അബ്ഭഞ്ഞംസു, നേവ താവിമേ ഭിക്ഖവേ, സത്താ സദേവകാ ലോകാ സമാരകാ സബ്രഹ്മകാ സസ്സമണബ്രാഹ്മണിയാ പജായ സദേവമനുസ്സായ നിസ്സടാ വിസംയുത്താ വിപ്പമുത്താ വിമരിയാദികതേന ചേതസാ വിഹരിംസു.

‘‘യതോ ച ഖോ, ഭിക്ഖവേ, സത്താ ഇമാസം ചതുന്നം ധാതൂനം അസ്സാദഞ്ച അസ്സാദതോ ആദീനവഞ്ച ആദീനവതോ നിസ്സരണഞ്ച നിസ്സരണതോ യഥാഭൂതം അബ്ഭഞ്ഞംസു, അഥ, ഭിക്ഖവേ, സത്താ സദേവകാ ലോകാ സമാരകാ സബ്രഹ്മകാ സസ്സമണബ്രാഹ്മണിയാ പജായ സദേവമനുസ്സായ നിസ്സടാ വിസംയുത്താ വിപ്പമുത്താ വിമരിയാദികതേന ചേതസാ വിഹരന്തീ’’തി. ചതുത്ഥം.