൫. ഏകന്തദുക്ഖസുത്തം

൧൧൮. സാവത്ഥിയം വിഹരതി…പേ… ‘‘പഥവീധാതു ചേ [ച (സീ. സ്യാ. കം.)] ഹിദം, ഭിക്ഖവേ, ഏകന്തദുക്ഖാ അഭവിസ്സ ദുക്ഖാനുപതിതാ ദുക്ഖാവക്കന്താ അനവക്കന്താ സുഖേന, നയിദം സത്താ പഥവീധാതുയാ സാരജ്ജേയ്യും. യസ്മാ ച ഖോ, ഭിക്ഖവേ, പഥവീധാതു സുഖാ സുഖാനുപതിതാ സുഖാവക്കന്താ അനവക്കന്താ ദുക്ഖേന, തസ്മാ സത്താ പഥവീധാതുയാ സാരജ്ജന്തി’’.

‘‘ആപോധാതു ചേ ഹിദം, ഭിക്ഖവേ…പേ… തേജോധാതു ചേ ഹിദം, ഭിക്ഖവേ… വായോധാതു ചേ ഹിദം, ഭിക്ഖവേ, ഏകന്തദുക്ഖാ അഭവിസ്സ ദുക്ഖാനുപതിതാ ദുക്ഖാവക്കന്താ അനവക്കന്താ സുഖേന, നയിദം സത്താ വായോധാതുയാ സാരജ്ജേയ്യും. യസ്മാ ച ഖോ, ഭിക്ഖവേ, വായോധാതു സുഖാ സുഖാനുപതിതാ സുഖാവക്കന്താ അനവക്കന്താ ദുക്ഖേന, തസ്മാ സത്താ വായോധാതുയാ സാരജ്ജന്തി.

‘‘പഥവീധാതു ചേ ഹിദം, ഭിക്ഖവേ, ഏകന്തസുഖാ അഭവിസ്സ സുഖാനുപതിതാ സുഖാവക്കന്താ അനവക്കന്താ ദുക്ഖേന, നയിദം സത്താ പഥവീധാതുയാ നിബ്ബിന്ദേയ്യും. യസ്മാ ച ഖോ, ഭിക്ഖവേ, പഥവീധാതു ദുക്ഖാ ദുക്ഖാനുപതിതാ ദുക്ഖാവക്കന്താ അനവക്കന്താ സുഖേന, തസ്മാ സത്താ പഥവീധാതുയാ നിബ്ബിന്ദന്തി.

‘‘ആപോധാതു ചേ ഹിദം, ഭിക്ഖവേ…പേ… തേജോധാതു ചേ ഹിദം, ഭിക്ഖവേ… വായോധാതു ചേ ഹിദം, ഭിക്ഖവേ, ഏകന്തസുഖാ അഭവിസ്സ സുഖാനുപതിതാ സുഖാവക്കന്താ അനവക്കന്താ ദുക്ഖേന, നയിദം സത്താ വായോധാതുയാ നിബ്ബിന്ദേയ്യും. യസ്മാ ച ഖോ, ഭിക്ഖവേ, വായോധാതു ദുക്ഖാ ദുക്ഖാനുപതിതാ ദുക്ഖാവക്കന്താ അനവക്കന്താ സുഖേന, തസ്മാ സത്താ വായോധാതുയാ നിബ്ബിന്ദന്തീ’’തി. പഞ്ചമം.