൩. അചരിംസുത്തം

൧൧൬. സാവത്ഥിയം വിഹരതി…പേ… ‘‘പഥവീധാതുയാഹം, ഭിക്ഖവേ, അസ്സാദപരിയേസനം അചരിം, യോ പഥവീധാതുയാ അസ്സാദോ തദജ്ഝഗമം, യാവതാ പഥവീധാതുയാ അസ്സാദോ പഞ്ഞായ മേ സോ സുദിട്ഠോ. പഥവീധാതുയാഹം, ഭിക്ഖവേ, ആദീനവപരിയേസനം അചരിം, യോ പഥവീധാതുയാ ആദീനവോ തദജ്ഝഗമം, യാവതാ പഥവീധാതുയാ ആദീനവോ പഞ്ഞായ മേ സോ സുദിട്ഠോ. പഥവീധാതുയാഹം, ഭിക്ഖവേ, നിസ്സരണപരിയേസനം അചരിം, യം പഥവീധാതുയാ നിസ്സരണം തദജ്ഝഗമം, യാവതാ പഥവീധാതുയാ നിസ്സരണം പഞ്ഞായ മേ തം സുദിട്ഠം’’.

‘‘ആപോധാതുയാഹം, ഭിക്ഖവേ…പേ… തേജോധാതുയാഹം, ഭിക്ഖവേ… വായോധാതുയാഹം, ഭിക്ഖവേ, അസ്സാദപരിയേസനം അചരിം, യോ വായോധാതുയാ അസ്സാദോ തദജ്ഝഗമം, യാവതാ വായോധാതുയാ അസ്സാദോ പഞ്ഞായ മേ സോ സുദിട്ഠോ. വായോധാതുയാഹം, ഭിക്ഖവേ, ആദീനവപരിയേസനം അചരിം, യോ വായോധാതുയാ ആദീനവോ തദജ്ഝഗമം, യാവതാ വായോധാതുയാ ആദീനവോ പഞ്ഞായ മേ സോ സുദിട്ഠോ. വായോധാതുയാഹം, ഭിക്ഖവേ, നിസ്സരണപരിയേസനം അചരിം, യം വായോധാതുയാ നിസ്സരണം തദജ്ഝഗമം, യാവതാ വായോധാതുയാ നിസ്സരണം പഞ്ഞായ മേ തം സുദിട്ഠം.

‘‘യാവകീവഞ്ചാഹം, ഭിക്ഖവേ, ഇമാസം ചതുന്നം ധാതൂനം അസ്സാദഞ്ച അസ്സാദതോ ആദീനവഞ്ച ആദീനവതോ നിസ്സരണഞ്ച നിസ്സരണതോ യഥാഭൂതം ന അബ്ഭഞ്ഞാസിം, നേവ താവാഹം, ഭിക്ഖവേ, സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ അനുത്തരം സമ്മാസമ്ബോധിം അഭിസമ്ബുദ്ധോതി പച്ചഞ്ഞാസിം.

‘‘യതോ ച ഖ്വാഹം, ഭിക്ഖവേ, ഇമാസം ചതുന്നം ധാതൂനം അസ്സാദഞ്ച അസ്സാദതോ ആദീനവഞ്ച ആദീനവതോ നിസ്സരണഞ്ച നിസ്സരണതോ യഥാഭൂതം അബ്ഭഞ്ഞാസിം, അഥാഹം, ഭിക്ഖവേ, സദേവകേ ലോകേ സമാരകേ സബ്രഹ്മകേ സസ്സമണബ്രാഹ്മണിയാ പജായ സദേവമനുസ്സായ അനുത്തരം സമ്മാസമ്ബോധിം അഭിസമ്ബുദ്ധോതി പച്ചഞ്ഞാസിം. ഞാണഞ്ച പന മേ ദസ്സനം ഉദപാദി – ‘അകുപ്പാ മേ വിമുത്തി, അയമന്തിമാ ജാതി, നത്ഥി ദാനി പുനബ്ഭവോ’’’തി. തതിയം.