൨. പുഗ്ഗലവിസേസനിദ്ദേസവണ്ണനാ

൮. ദ്വേ പുഗ്ഗലാതിആദീഹി പടിസമ്ഭിദപ്പത്തപുഗ്ഗലവിസേസപടിപാടിം ദസ്സേതി. തത്ഥ പുബ്ബയോഗോതി അതീതജാതീസു പടിസമ്ഭിദപ്പത്തിഹേതുഭൂതോ പുഞ്ഞപയോഗോ. തേനാതി തേന പുബ്ബയോഗകാരണേന. ഏവം സേസേസുപി. അതിരേകോ ഹോതീതി അതിരിത്തോ ഹോതി, അതിരേകയോഗതോ വാ ‘‘അതിരേകോ’’തി വുത്തോ. അധികോ ഹോതീതി അഗ്ഗോ ഹോതി. വിസേസോ ഹോതീതി വിസിട്ഠോ ഹോതി, വിസേസയോഗതോ വാ വിസേസോ. ഞാണം പഭിജ്ജതീതി പടിസമ്ഭിദാഞാണപ്പഭേദം പാപുണാതി.

ബഹുസ്സുതോതി ബുദ്ധവചനവസേന. ദേസനാബഹുലോതി ധമ്മദേസനാവസേന. ഗരൂപനിസ്സിതോതി പഞ്ഞായ അധികം ഗരും ഉപനിസ്സിതോ. വിഹാരബഹുലോതി വിപസ്സനാവിഹാരബഹുലോ, ഫലസമാപത്തിവിഹാരബഹുലോ വാ. പച്ചവേക്ഖണാബഹുലോതി വിപസ്സനാവിഹാരേ സതി വിപസ്സനാപച്ചവേക്ഖണാബഹുലോ, ഫലസമാപത്തിവിഹാരേ സതി ഫലസമാപത്തിപച്ചവേക്ഖണാബഹുലോ. സേഖപടിസമ്ഭിദപ്പത്തോതി സേഖോ ഹുത്വാ പടിസമ്ഭിദപ്പത്തോ. ഏവം അസേഖപടിസമ്ഭിദപ്പത്തോ. സാവകപാരമിപ്പത്തോതി ഏത്ഥ മഹാപഞ്ഞാനം അഗ്ഗസ്സ മഹാസാവകസ്സ സത്തസട്ഠിയാ സാവകഞാണാനം പാരഗമനം പാരമീ, സാവകസ്സ പാരമീ സാവകപാരമീ, തം സാവകപാരമിം പത്തോതി സാവകപാരമിപ്പത്തോ. സാവകപാരമിതാപ്പത്തോതി വാ പാഠോ. സത്തസട്ഠിയാ സാവകഞാണാനം പാലകോ പൂരകോ ച സോ മഹാസാവകോ പരമോ, തസ്സ പരമസ്സ അയം സത്തസട്ഠിഭേദാ ഞാണകിരിയാ പരമസ്സ ഭാവോ, കമ്മം വാതി പാരമീ, തസ്സ സാവകസ്സ പാരമീ സാവകപാരമീ, തം പത്തോതി സാവകപാരമിപ്പത്തോ. സാവകപാരമിപ്പത്തോതി മഹാമോഗ്ഗല്ലാനത്ഥേരാദികോ യോ കോചി സാവകോ. സാവകപാരമിപ്പത്തസാവകതോ അതിരേകസ്സ അഞ്ഞസ്സ സാവകസ്സ അഭാവാ ഏകോ പച്ചേകസമ്ബുദ്ധോതി ആഹ. പുന പഞ്ഞാപഭേദകുസലോതിആദീഹി വുത്തത്ഥമേവ നിഗമേത്വാ ദസ്സേസീതി. ഞാണകഥായ യേഭുയ്യേന അനേകാനി ഞാണാനി നിദ്ദിട്ഠാനി. പഞ്ഞാകഥായ യേഭുയ്യേന ഏകാപി പഞ്ഞാ നാനാകാരവസേന നാനാകത്വാ വുത്താതി അയം വിസേസോ.

മഹാപഞ്ഞാകഥാവണ്ണനാ നിട്ഠിതാ.